Remna hi a hlu, i roh ang u

Kum 1966 aṭang­in Mizo hnamin inde­pendent kan sual a, mi tam takin nunna an chan a, mi tam tak ramtuilei loin an awm phah a. Chhungkaw tam tak an kehdarh phah bakah in leh lo chan an tam em em a nih kha.

Kum 20 hnu-ah Mizoram leh Mizo hnamin kan tawrhna hi a zozai ta lo e, tiin inremna zawngin kohhran, political party zirlai pawl leh pawl hrang hrangin hma an la a, MNF-te khan mipui au aw kha chhangin inremna kan nei ta a nih kha. MNF-te baka inrem­na tluantling thlen khawvelah an awm bikin a rinawm loh.

Ramhnuaiah kum 20 tal tap ram leh hnam tan tiin an rammu a, kum 20 lai an silai leh hmanrua nen an rammutna aṭangin an lo haw kha a ni a. Mi pakhat pawhin silai leh ralthuam chheprelh a, lo haw ve lo emaw, mahni tana thukru emaw sawi tur a awm lo kha an fakawm takzet a ni.

MNF leh India sorkar inremna kha tuna kan Chief Mi­nister Pu Lal Than­hawla'n a lalṭhutthleng a ken ngam vang a ni kan ti lo thei lo ang. Politics taka la an awm a, Pu Hawla lalṭhutthleng a ken vang ni loa sawi ṭalh te pawh an awm a, mahse politics-a inhnamhnawih lo mipui nawlpui chuan Pu Hawla inpekna a ropuizia kha kan la theihnghilh lo a ni.

Hun a lokal zel a, kan hmar unaute'n an hnam tan zalenna sualin an rammu a, HPC angin Mizo­ramah pawh bu khuar­in harsatna hrang hrang min siamsak a, pawisawi lo nunna an lak leh sorkar pawi an khawih dan pawh kan hre vek. Khang hunlai khan Pu Lal Thanhawla sorkar lai kum 1994 khan remna an siampui a nih kha.

A hnuah HPC aṭangin HPCD a lo piang leh a, kan police-te thatin an ralthuamte an laksak a nih kha. Mizoram mipui a bikin hmar lam bial a ralmuang lo hle a ni.

Pu Hawla sorkar bawkin, 'inrem hi a ṭha e,' tiin kum eng emawzat kal ta aṭang khan remna zawngin hmalak leh a ni a. Mizoram sorkar chuan thiam taka biain remna tluantling nei turin thutlukna an siam ta a ni. April 13, 2018 khan Sesawnga CTI-ah an ralthuam neih zawng zawng nen an rawn inpe ta a nih kha. Rammu leh rammu lo mi 114 lai an rawn inpe fel kha a ropui ngawt mai.

Mizoram hi India rama state ralmuang ber tiin kan sawi ṭhin a, vawiinah pawh hei ṭawngkam chhuan­awm tak hi a la dik viau mai. Chu­vangin, remna leh muanna kan neih hi a ropuiin a hlu a, Mizoram mipuite hian he remna leh muanna kan neih hi a hlutzia hriain i roh zel ang u.

- Lalthlamuana