TUIRIAL BIAL BY- ELECTION HMANHMAWH LO ILA
Representative of People Act 1951 chuan MP leh MLA bial ruak thla ruk chhunga By-Election neih turin a sawi a. Mahse Indona, Tuilian, Hripui leng etc vangin thlaruk chhungah By- Election tih theih loh a awm bawk ṭhin.
Lok Sabha member bial ruak 3 leh Assembly member bial ruak 32 By poll ngai a awm mek a. Chung zinga MLA bial 4 - W.Bengal bial 3, Odhisa MLA bial 1 By-Election tur chauh ECI hian 4th Sept 2021 khan By- poll turin a puang. MP bial 3 ruak bakah MLA bial ruak ṭhenkhatte hi thla ruk pel tawh an awm nual chungin, By-poll turin puan an ni lo.
Bengal hian MLA bial ruak 7 an nei a, Ruling Party TMC hian By- Election nei vek turin an dil nasa, bial 3 chiah By-Election tura puan sak an ni. CM Mamata dinna tura bial tih ruah Bhawanipur Constituency puan tel a ni hi Opposition Party dangten ECI an sawisel phah nasa hle. CM Mamata hi thla ruk chhunga MLA a thlantlin a ngai si a, a dinhmunah Constitutional crisis harsatna thleng lo a, ECI-in Bhawanipur MLA bial By-Election tur a ti tel hi special veng veng tak a ni. India ram Covid 19 hripui leng karah MLA bial 4 by-poll nei turte hi Election Model Code of Conduct Rule, Covid SOP pawh ECI in a siam khirh viau a ni.
Nikum (2020), National Lockdown 24th March aṭanga 31st May (68 days),1st June aṭangin Unlock in kan kal ṭan a. Mizoram Positive chu July thla khan 253 kan ni. 5th August khan VC/ LC Election tur 27th August puan a ni a, August khan 599 positive thar kan ni nghal a, September khan positive thar 1006 kan kai belh leh a. Aizawl Veng hrang hrang leh hmun ṭhenkhat kan Lockdown/ Containment Zone deuh zur zut bawk. Kan han hniam chho a, mahse India mithiamten Covid 19 1st Wave, 2nd Wave, 3rd Wave leh 4th Wave thleng pawh awmthei a ni, fimkhur a ngai an ti sup sup a. Chuti chungin By-Election ngai turin Serchhip Bialtu MLA, Pu D Lalduhawma kan han disqualified ta tho a! Serchhip by-election vote thlak ni 17th April, 2021, khami hma March thla chhung khan Positive thar 53 hmuh a ni, By-Election thla April khan 1655 positive thar hmuhchhuah a ni chho ta dawrh a.
Thla tin, nitin Positive kan pung chho ta zel a. 20th April aṭangin 23rd Sept khan ni 155 Lockdown/ Restriction hnuaiah Mizoram kan awm ta a, a beidawnthlak tak zet a nih hi.
23rd August, 2021 aṭang khan NE State 8 zingah, nitin Positive thar tam ber pakhatna niin ni 31 chhung kan awm ta a, 24th Sept kan dinhmun Total Positive 85, 336, Discharged 69,333, Positive lai 15,575, Covid vanga thi 281 kan ni ta. Total positive tam leh Covid vei mekah, Sikkim, Nagaland, Arunachal, Meghalaya leh Tripura te kan lehpel hle a, thi tam lam kan inchhuannaah pawh Arunachal Pradesh kan khum leh tawh.
India ram pumah Kerala State nen Covid hrileng control thei lo, Covid vei enkawl dam chak lo, recovery kawngah Mizoram State kan hniam fal hle bawk. Kerala State CM Vijayan an kawh rawn nasa hle, State sawrkar ṭheuh chalah Phung a tawp.
Heng ka sawi duhna chu engatinge Covid Hripui leng hi kan do duh tak tak loh a, Politics Election hi kan ruihchilh viau le! 17th August-ah Tuirial bialtu MLA Pu Andrew a boral hlauh a (RIP), Covid laka mipui fimkhurna hlauh leh Covid umbo tumna lam aia, MLA By-Election tura inbuatsaihna kalpui nghal hi Political Party te tih tur niin a lang lo. A zialo tih hian a hril zo lo.
State dangah nikum (2020 October) daiha MP (LS), MLA boralte bial pawh a la ruak hlawm a. ECI hian bial ruak awmna State, Chief Secretary te rawnin Covid len dan dinhmun uluk takin a thlir a, thla ruk pela By-Election tur la puan loh an awm fur a nih hi a. ECI hian Mizoram State Covid darh nasat dinhmun pawh a hmuh hmaih a rinawm loh viau.
Tuirial MLA by-Election nei tur chuan Covid 19 control hniam hmasak viau a ṭul hmasa lo maw? Lo hmanhmawh khu-ruai lo deuh ila...
- Lalrozara