ENG NGE I NGAIHDAN?
Covid hri leng vangin kan buai a, chutihrualin a aia hluarin hlauh dan kan in zirtir em ni tih mai turin kan in hlauh siak a. Hetiang lo deuha hmachhawn dan inzirtir kan mamawh tawh zawk e.
Hna thawh duhin kan han au chhuak ve ṭhin nain, ka aw (voice) chuan ngaihsak a hlawh meuh lo. Mi thil phal leh ringtu ṭha tak tak awmna state ni lo phei se chuan ruk ruk leh sualna a va pung nasa tawh dawn em. Tunah pawh hian huan thlai a him lo ṭan tawh.
Nitin mamawh theih tawpa kan tihniam chung hian, loh theih loh kan ngah viau mai. Naupang school fee, bill, in luah man etc.. a tel loa awm hleihtheih tawh loh hi kan nunah hian a bet nual a ni. Chuvangin buhfai leh chawhmeha inṭanpuina ringawt hi chuan dam khaw chhuah a har ta e.
Sumdawnna te hi loan laa kalpui a ni tlangpui a, midang chhawr tel zel hi za zelah 50 vel an ni ang. Mite tana hna thawh tur siamtu tam tak hi sumdawngte an ni tlat nia. Sumdawng chuan dawr a luah a ngai tlangpui a, a ṭhen phei chuan kudam thlengin an mamawh.
Sawrkar hna thawkin thla 3 hlawh la lo ta se. Sumdawng hian dawr thla 3 hawng lo se an dinhmun a inang ta tlat lo laite hi chhutpui a ngaiin a ṭul ta takzet mai.
Sawrkar hna thawk hlawh la lo cuan chawi belh a nei ve lo. Sumdawng dawr hawng lo leh in hralh miah lo chuan hlawh a neih loh bakah heng hi a chawi belh char char - Dawr luah man + mi chhawrte hlawh + loan rulhna.
Sumdawngte leh nitin ei bar dap chawpte hi kan tun hri lengah chuan dinhmun ṭha lo takah kan awm mek tawh a ni. Sawrkar hna thawk chuan hlawh an lak theih tho avangin lockdown chu kalpui reng mahse an tan a pawi lo. An hlawh a kiam lo a. (Sawrkar hna thawk kan han sawi zel chhan hi sumdawngte dinhmun tarlan nan mai a ni.)
Lockdown hi kalpui zui tawh lo a, he hri leng hi nunpui dan kan zir a hun ta viau. Ram ropui zawk leh hausa zawkte pawhin he hri hi an inveng zo lo. Kan ramah pawh theih tawp kan chhuah ta a, kan beih vak a, dan kan tum hian tunah chuan a sawt lo niin a lang ta. Mahni a thiam dan ang anga kan lo inven a ṭul ta zawk tih kan inzirtir tam a ṭul ta.
Hri a leng a, hei hi Bible lo sawi lawk tawh a ni. Lalpaah innghatin, kan tih theih tawk, awlsam tak si, hmai tuam leh kut sil ngun hi uar i la. Nunphung pangngai kan zawm vat hi a hun takzet tawh a ni.
- RMS Dawngkimi, Ramhlun South