Mizoram PWD hnathawh...
Tun hnaiah Lunglei Ṭhalai Pawl (a hnuah chuan LṬP tiin kan ziak tawh ang) chêt dan leh PWD kawng siam danin sawi a hlawh hle mai a. Ni e, PWD-te hian kawngpui siam chungchangah hian theihtawp chhuah an inti ngeiin a rinawm a, chutih rualin, tuna kawng an siam dan aia ṭha zawk hian an la siam thei ngeiin a rinawm ve bawk.
LṬP-te'n Tlawng leh Pukpui inkar kawngpui siam mek, a siamtute'n an siam dan a chhe lutuka an hriat vanga hma an la hi a ṭha khawp mai a; an hmalak zui dan chu eng pawh ni se, an hmalakna avangin kawngpui ṭha zawk Mizoram chhim lamin an neih phah dawn niin a lang a, a lawmawm hrim hrim e.
LṬP-in hma an lak chhan, Pukpui-Tlawng kawng siam chhe lutuk ang hi Aizawl lamah pawh a awm ve tho mai a, mahse, kan khawpui ber lamah chuan LṬP anga hma latu tur an awm lo a nih hmel. Tun hnaiah Zemabawk-Tuirial inkar national highway kawngpui siam a ni a; Pukpui-Tlawng inkar kawng ang thoin, a siam dan chhe lutuk, khawh theih a awm ve nual a ni. Opposition party ṭhalaite'n an en a, thlalakte nen an thehdarh bakah, media-te pawhin an puangzar a. Chuta ruling party, Congress party-te insawifiahna chu, kawng siam chhe laiah 'R' tih ziah a ni a, 'R' tih awmzia chu, 'Rejected' tihna a ni, an ti. Kawng siam chu a chhiat em avangin sorkarin a pawm lo a, a hnâwl (reject) a, siamṭhat leh tur, tihna a hni ber awm e.
Engtin nge kawng siamtu contractor-te'n pawm theih loh khawpa kawng an siam theih? A chhanna pahnih awm thei chu - (1) Mizoram leh Mizo mipuite hmangaihna nei reng reng loin, an hlâwkna tur chauh ûmin hna an thawk, tih leh, (2) Contractor-te'n kawng an siam laiin PWD engineer-te'n an vil ṭha lo hle, tihna a ni.
Mi rama engineer-te chu hnathawhna field tak takah lukhum khawng (helmet) khumin, hnathawh kawr hâ in, hna an thawk ṭhin a; Mizorama engineer-te erawh chu office-ah an ṭhu a, labour ho kawng siam kan ring ve thung, tiin an sawi ṭhin. Hei hi Zemabawk-Tuirial kawng an siam a chhiat dan ngaihtuahin a dik tak tak a nih a rinawm. PWD engineer-te'n kawng siam laiin vil ṭha ni se, hnâwl ngai khawp leh siamṭhat ngai khawpin contractor-te'n an siam bik lo ang. Nge, contractor-te leh PWD engineer-te hlâwkna insem turin an inremsiam zawk?
LṬP hmalak dan ṭhenkhat kha a tuartu tan a na lutuk a ni mai thei; chutih rualin, Mizoram PWD-te hi an insiamṭhat theih nan mipui lamin na taka hma an lak a ngai tawh zawkte pawh a ni thei. LṬP hmalak dan kha na viau mah se, PWD engineer-te hi han pâwngpawrh viau ngam tur an ni em, tih ngaihtuah tham a ni. A chhan chu - an hnathawh aia an in leh lo ṭhatzia hi tláng hriat a ni. PWD engineer, a bikin EE ni pha tawh chin hi chuan in ṭha tak an nei deuh vek a nih hmel a, an awmna veng ṭheuhah hian sawisep an kai deuh vek hial âwm asin. Chutih rualin, PWD engineer zingah hna ṭha duh, hlemhletna duh lo, Pathian ṭih tlat mi an awm ngei ang tih erawh a rinawm.
PWD engineer-te u, in hnathawh danah mipui thâwm a lo ring ta deuh a nih pawhin, inen lêt nan lo hmang ve ula; in hnathawh danah hian Zoram mipui hi an lungawi tak zet em tihte lo inngaihtuah ve ula. LṬP chet dan pawh hi in hnathawhin a cho chhuah a ni em, tihte pawh lo ngaihtuah ve neuh neuh ula, insiamṭhat ngaihna laiah insiamṭhat nan lo hmang ve hram teh u khai!
- K.T. Zoramchhana