Syria - May - Normalisation
Tun hnaiah US, UK leh France indo thlawhnaten Syria ram an bei a, an túr ralthuam hmun pawimawhte an chhu nek mai tih kan lo hria a, thil dang chu sawi lo ila.
British PM, Theresa May-i ṭawngkam bawk hian ka rilru a luah... PM ka nih hnuah hetianga ral bei tura kan sipaite tirh chhuahna thupek ka siam vawi khatna a ni a, ka ngaihtuah ngun hle. Kan ram tana ṭha ber tur nia ngaiin he thu hi ka titlu ta a ni. Syria ramah, London kawtthlerah, khawvel hmun dangah pawh ni rawh se, túr ralthuam hman leh ngawt ṭhin hi 'ngaia neih, thil narana chantir' kan remti thei lo.
Hei tak hian mi luah tlat pek a, khu lam thil chu sawi sen loh a awm a, thu dang ni se' Túr ralthuam hman leh ngawt ṭhin hi 'ngaia neih, thil narana chantir' kan remti thei lo' Ka ngaihtuah zui dan chu hetiang deuh hi a ni. Kan ni tin nun, mimal, chhungkua, khawtlang leh Pathian rawng kan bawlnaah hian Setana hmanraw chi hrang hrang, ... túr ralthuam tam tak hi 'ngaia neih, thil narana chantir' kan remti thui ta hle mai, tih hi a ni.
Thil lo thleng apiang hi Pathian thu leh A ram himna chungchang aṭanga teh aiin, ngaih thiam leh pawmzam zel kan zir ta a ni ber a. Setana túr ralthuamte bei tura Pathian thu leh a thiltihtheihna missile kah chhuahna thupek siam ai chuan, lo dodal chu phunchiar, khawvel hmasawnna pawm thiam lo-ah kan inchhuah a, Pi May-i erawh chuan, 'Kan ram tana ṭha ber tur nia ngaiin he thu hi ka titlu ta a ni... ' a ti mai. Pathian ram tana ṭha ber tur ngaihtuah takzet chungin thu titlu ve ?hin ila, indona hi LALPA indona, hnehna pawh Ama ta a ni zel ang.
Setana'n túr ralthuam hmanga he khawvel a beih rengna hnehna tur thu-ah hian, Pi May-i'n, 'PM ka nih hnua thupek ka siam vawi khatna... ka ngaihtuah ngun hle... Kan ram tana ṭha ber tur nia ngaiin he thu hi ka titlu ta a ni...' a tih ang hian, ka mimal nun leh rawngbawlna kawngah hetiang thu hi ka la titlu ngai lo.. mahse Pathian lalram tun din a ṭul avangin ka tih a ṭul ta... tih tur kan nei ve em? Sualna leh Setana ralthuam thar apiang, '...ngaia neih, thil narana chantir a, lo pawm thiam zel tur ni lo, a kulh ṭhiat a, indonaa LALPA tana hnehna puang zel turin Amah ngei chuan min tichak ṭheuh rawh se.
- RK Lianzuala