KAN KO KAN THLAK A HUN TA E...

Covid 19 hi thil thar a nih miau avangin World Health Orga­nisation (WHO) meuh pawhin a la hre chiang lo hle tih hi thu dik a ni. A inven dan tur piah lamah pawh vaccine thleng hian a ṭha tak tak em tih chianna hi 100% a la awm hauh lo bawk.

Hetihlai hian kan state bikah chuan mihring chevel a tlem hian a darh loh beiseiin Lockdown, Semi Lockdown kan kalpui chamchi a. A vei chu sawi loh, an bulhnai a awm te, an bul hnaiha lo awm te bula mi leh chhawng thlengin kan in chhui chiam chiam a. Barhluih quarantine system-in chhungkaw tam tak kan dang kawlawk bawk a. Mahse engnge tuna kan dinhmun hi ni ta ber? Kan kalphung hi a hlawhling ta em le? Kan chhanna chu a inang vek lo ang, mahse kan pawm tlan tur chu tuna kan kalphung hi a hlawh­tling lo, tih hi a ni.

Covid 19 hi kan hre chiang lo, mahse thu dik tak chu mi zawng zawng hian he natna hi thihpui thamin kan haw lo tih hi a ni. Ka hmelhriat tam tak Covid 19 test positive vanga CCC emaw CCCC a lut a chhuak leh tawhte zing­ah boral ka la hre lo.

A tam zawk chu hritlang, khawsik tenau leh taksa sil ṭhemṭhum ni khat vel te an nei ve a, a hnuah chuan Centre lama ṭhut tlawk tlawk kha an hna a ni mai awm e. Dt 23.09.2021 zan Zonet news a an puan danah chuan tuna Covid 19 hrikai boral zat chu a kai zawng zawng aṭangin 0.33 % a ni a, mi 1000 in vei ta se, mi 33 an boral tihna ang a ni.

Chutianga mi tam takin kan thihpui ni si lo kan do dan erawh hi chu kan ti mah mah tawh ni ngeiin a lang.

Kan ṭhenawmte chhungkua hi first contact, 2nd contact emaw avangin vawi 4 quarantine an ni tawh a, vawi khatmah an la positive lo. Pa ber hi gazetted officer a ni a, a ni khat hlawh hi cheng 3400 vel ni turah ngai ta ila, ṭul miah lova quarantine a nih vanga sorkarin ṭum li a tlem berah ni 7 zel a in quarantine avanga a hloh hi

(ni 28 x 3400) Rs 95000 vel zet a ni. Ani hi chu sorkar hnathawk a nih avangin a hlawh a la la zel thei a, mahse nitin eichawp zawngte hi kan ngaihtuah ngai em le?

He natna hi kan hlau lo ang a, kan fim­khur lo tur a ni tihna ni lovin kan kal dan hi kan thlak a hun tawh viau a ni. Contact tracing hmanga in chhui vak vak ai chuan he natna nei ni a inhria te hian test leh in enkawl ti vat zawk ila. RAT test ai pawhin RTPCr test zel hi hmang thei tawh ila. Kan inkhuahkhirhna dang hi chu i hlip ngam teh ang u.

Mask vuah ṭhat te, sanitiser hman ṭhat te hi chu strict takin kalpui zel thung ila, natna hi tun aiin a darh phah hauh chuang lo ang. Tracing kan tih loh avanga kai darh an lo awm ta a, boral phah kan lo awm hial a nih pawhin chunglam rorelnaah ngai mai ila. Kan hmalam hun kan ngaihtuah luatah tunge kan dam chhung hun pawtsei thei awm le? Kan Kristian Bible ngeiin a sawi chian em hi maw.

- Dingtea