Vibrant Chakma Nation khan ka rilru a tinâ
Central YMA General Conference-a Mizo ṭhalai, khawtlang hruaitu rual kal khawm chuan thil harsa tak a ni dawn tih hre reng chungin, ram leh hnam humhalh duh vangin, ‘Dan loa din Chakma Autonomous District hi dan anga ṭhiah a nih theih nan hmalak ni rawh se,” tiin an rel. Tuna kan hmuh chu ‘A vibrant Chakma nation’ din tuma hmalakna a ni - he Mizo thinlung hi a na takzet zet a ni e.
Congress hi chu ‘vai pawl’ tih an ni mai a, vai tih âwm tak tak an ti ṭhin. Congress hi chu ngaih khatah kan ngai mai a, Chakma minister hmasa ber min petu an nih avangin he party hi chu Mizo party angin mipui nawlpui hian kan ngai lova, Congress chu vai pawl an ni tihah hi chuan anmahni ngei pawhin sawi tur an hre lo.
MNF chu Mizo pawl tura ngaih a ni. MNF ram mute khan Mizo ram leh hnam tan nun an hlan. Miin a nun a hlan aia sang pek theih a nei lo he khawvelah hian. Mizo hnam sipaite khan ‘Mizo nation’ din tumin an in an chhuahsan a, ramhnuaiah khawhar rilṭamin an awm a, thih hlauhawmah an khawsa a, heng an tih chhan chu ‘Mizo nation’ neih an duh vang a ni a, a ṭhente chuan an neih chhun an nunna hial an hlan.
Tichuan, chu pawl, MNF chu a kal zel a, vote a duh luatah, "Pathian leh kan ram (Mizoram) tan” tih chu an duhtawk ta lova, ‘Chakma ram’ din an tum thu an puang a, ziakin an dah a, a bulah an President chu hlim takin a awm thei bawk a, he thlalak hian ka rilru a tina takzet a ni. MNF êm hi chuan a tih duh ka ring ngai lo. He hnam movement kengtu nia inchhal ngam, ‘hnama chiang’ chin awm khawmna party inti
ṭhin hian Mizoram chhungah ngei ‘Chakma Nation’ din an tum thu an puang ta - martarte thisen a zahawm ka ti a, ‘Mizo nation’ din tuma nun hlantute phatsanna ang hialah a ngaih theih a ni.
‘Chakma nation’ din tum hi a la ziaawm a, ‘VIBRANT Chakma nation’ hi eng chiah nge ni ta ang le? Oxford dictionary chuan ‘vibrant a hrilhfiahnaah ‘full of energy and enthusiasm’ tih a ni. MNF-in Chakma hnena din an tiam chu ‘Chakma ram/ rorelna chak tak, phûr tak leh thiltithei tak’ tiin a sawi theih ang.
Mizo hnam tana Mizo ta tur ‘ram’ min dinsak tumtu emaw kan tih khan, Congress aia hniama indahin, ‘Chakma ram ropui’ din an tiam zu nia - vote zawnnaah pawh hnam hralh kher hi chu a nâ ka ti ngawih ngawih a, hnam pasalṭhate kha ka lainat mang e!
- F Lalchhandama (Mapuia)