PRSS natna leh Mizo rinawm lohna

Sik leh sa inthlak danglam lai hian eng natna hri emaw a leng kumtin ṭhin.

Tunah pawh hian vawk natna chi khat PRRS chuan Aizawl khawpui leh thingtlang khaw hrang hrang a run mek a, vawk pawh sang chuang an thih phah tawh. Vawk thite hi mi pangngai chuan an phum bo mai a, mi ṭhenkhat chuan a hri an kai tih an hriat chuan sa sertute hnenah an hralh mai ṭhin nia sawi a ni.

Vawk hi thil ṭawp tireng ei, kan ning­nawi duh loh fawm khawm eia vulh len an tam ber awm e. A sa hrim hrim pawh hi sa hrisel a ni hauh lo. Mizote hi Inrinni-ah Pathianni atana vawksa ei duh kher kan ni hlawm a, Pathianni zinga puar lawiha kan han ei chuan Biak inah kan mu thlu lawp lawp mai ṭhin a, heta ṭang mai pawh hian a hrisel lem lo tih a lang.

Chutih nakalai chuan vawk natna vei an zawrh lo ei tawk kan awm nawk­in a rinawm a, mihring hrisel nana pawi tak a thleng ang tih a hlauhawm hle a ni. Mizote hi hnam rinawm nia inchal ni mahila, kan hlawkna turah chuan miin an hriat lem loh bawk chuan a ruka thil tih duh mai kan tam em em a; rinawmna kan tlachham ta hle ni pawhin a lang.

Tuna vawk natna hrilengah hian mi tam tak chuan he natna hi a vei hlau-in an talh sup sup a, a thianghlim tih hriata talhtute chu dem ngawt theih a ni lo. Mahse, natna hri an vei tih hriat reng reng, damdawi hmanga enkawl mek lai zawrh ṭalh ching an awm nualin a rinawm.

A sa hlanga hralh lo a, a sarep anga hralh­tute thlengin vawk neitute'n an leitir nia sawi a tam mai a; a pawi ngawt mai.

Hmanni khan chhungkaw pakhat chuan an vawkpui thau ṭha tak PRSS natna vangin a thi a, a thih hlimah a sarep tute hnenah pawh cheng sing fe-a hralh theih a nih hmel.

Mahse kha mite chhung khan hralh an tum bau lo. A phumna tur khur an lai a, an phum hmiah mai a ni; an fakawm khawp mai. Hetiang chhungkua vek hi ni ila hnam rinawm kan ni mai tur, mahse kan kan ni vek lo hian hnam rinawm nih kan hlauh chho mek chu a nih hi.

- Lalthlanawma