One day Chief Minister

Tuk khat chu ka mangangin Upa Thanglawta Dam Veng chu One Day Chief Minister turin ka va sawm ta ngawt a. Thingpui a lo chawk rak rak a, hlim hmel pu takin 'a thlum nge, a hang' a ti a. Kei chuan, 'Aizawl lo kal ve manah rial chini thlum ngat le,' ka ti a. Thingpui in chungin ka len chhan te ka sawi ta a.

Hei, hun rei tak chhung phenglawngte kan tum a, phenglawng leh ṭingṭang te pawh an rul zo ta. Mizoram Map dik lo te kan hal khuk ngial pawhin thomitchhaih pawh kan tluk thei lo, tumah an lam ṭha duh chuang lo. Kan ṭhalai ram hmangaihtu MZP hmalakna azarah central sawrkar an ko haw ta rup mai. Hip hip hip hurrah tiin ka au ve chel chul ringawt a. Hetiang hun ṭha a lo inher chhuah leh tak avangin One Day Chief Minister atan ka rawn sawm che a ni ka ti ta a.

A ni chuan phur zet hian, "Beng zawngin an hre na ang a, a ngaihna an hre tawp lovang, tih ziak a nih kha. Hetia min rawn sawm takah chuan darkar chanve chhung lekin ka sawi fel vek ang. 'Kan ram Inner Line Reseved Forest sq mile 50g hi kan enkawl ve tawh dawn' tih mai a ni. Rambuai hma lawk 1965 kuma Pu H.K. Bawichhuaka CEM, Mizo pa fing, huaisen, remhria hma lo lak tawhna ram buai avanga tihfel hman loh, chhunzawm leh mai kha a ni e. Tun hnaia central sawrkar aiawh Jt. Secretary NE khan, 'ramri buaina a nih tawp loh hi, Inner Line Reserved Forest chhunga dan lo va in sa leh bawhchhiatna hrang hrang April thla chhung ngeia endik vek ni rawh se,' tiin a rawn nemnghet ta hlauh mai. A lawmawm ngei mai. Ruling party te hun rangkachak a nih hi, zuk kham an la tum lo tak tak a nih chuan sem policy mai mai dah ṭhain inthlan hma ngei hian Cachar Forest Division kut aṭang hian thuneihna (Admin. Control) laksak a, Mizoram Forest kuta dah nise, mipui pawhin kan zuk zawm tir leh mai ta lawng," tiin One Day CM chuan a sawi zui zel a.

Kei chuan, a nih leh, vai an tam tawh si a, vai MLA tam tak min chimral mai lo’ng maw? Tun hnaia PM Vision buatsaihtu Sameer Kumar Khare, Jt. Secretary, Deptt. of Economic Affairs, Ministry of Finance Government of India report ang chuan Hai­lakandi District ah 98% chu Bangladesh Illegal Immigrant an ni a, 60% chu Mosolman tih a ni. Cachar District-ah leh Karimganj District-ah te pawh hetiang ve tho hi a nih hmel, a ram neitu Cachari te chu thehhmeh ang mai an ni zo ta. Heng ho hian Assam aṭanga U.T. demand-in Islamic State hial an la din duh mai lo’ng maw? Kan ram ṭhalai ber, Inner Line Reserve Forest ram ruak zau taka ti hian finrawl chhuahin Cachar Forest Division te nen ṭangrualin heng foreigner te hi eng zat tak awm tawh ang maw! Vai an tam tawh em mai tiin kan en liam zel mai dawn em ni? North Eastern tan a bik takin Assam leh Mizoram tan ‘security’ bak National Security thleng khawih pawi thei a ni lo’ng maw? Nang, One Day CM hian engtin nge hma i lak dawn?

One Day CM chuan vai an tam tawh em mai tih hi insawiṭhaihna mawlmang ber, ram hmelma hial a ni. MLA seta 40-ah General seat 2 chuah a awm, engzat pawh nise an chuh ve thiang lo. A thu hrimah Foreginer, dan lova Reserved Forest chhunga awmten vote an nei thiang bawk hek lo. Tuna Central Team-in April thla chhunga dan lova hmalakna endik tur a tih rual hian dan lova ramdang mi, Reseved Forest chhunga awmte zawn chhuah nghal ni rawh se. Indian Foreigner Act leh Forest Act te hmang hian hnawhchhuah nghal ni rawh se. Assam sawrkarin National Register of Citizens (NRC) a buaipui mup mup lai hian an ni nen ṭanrual ni rawh se. Cachar Forest Division aṭangin kan sawi Inner Line Reserved Forest hi Mizoram kutah hlan ni rawh se. Leiman UT aṭanga an bat khawl tawh pawh a pung nen min pe rawh se, tiin order ka chhuah nghal ang, a ti a, a fel ta duak duak mai.

One Day CM chuan kan ram ṭhalaite (ILRF) chu ei leh bar intodelh nan, Rice Mill te kan siam ang. Chenna tlakin settlement area, Mission Field, ramri tluanin Police Outpost leh Forest Office dah a ni ang. Ṭhalaite eizawnna tur industry tam tak din a ni ang, tiin a vision chu a tlangzarh ta nghal a. Leng fuh ka in ti hle mai. Mr. One Day Chief Minister ka lawm e.

- Vanlalngaia