Huan enkawltu fel lo chu...

Mizoram hi ka huan neih chhun, ka mamawh engkim awmna a ni.

Ka hriat lohin min tichhetu thil ṭhenkhat huan pawn lam aṭanga lakluhte an awm ṭhin, chu chuan nasa takin min tibuai ṭhin. Huan chhunga pangpar chi hrang hrang chuan min tihlim a, ka mamawhte pawh min pein ka hria a, mahse chungte chuan tun hnu hian hling chhun ang maiin kei leh ka chhungte nun a tichhe zo ta.

Pangpar te chu an lo pung a, kan chhungkaw chenna In ngei pawh chu an dipdal zo ta a. Chungte chu huan ka siam lai khan ka lo ngaihtuah pha ngai lova, a pawi zo ta a ni. Pangpar chite chu leiah an tlak tam tawh avangin engti kawng mahin ka ti rem thei tawh lova, a awmsa te chu uluk tak leh fimkhur taka ka enkawl zui a ṭul ta zawk a ni.

Ka huan hungna pal chu hmun nga laiah a pawp a, chuta ṭang chuan ka hriat lohvin mite an lo lut ru ṭhin a. Huan hungna pal chu hmun ṭhenkhatah pawn lam avangin an rawn nek puar a, ka hriat lohvin pal bante chu an lo phun sawn a, tah chuan awm hmunte an lo bengbel ta zel a. Huan pu chuan huan chhunga thlai chin ten rah ṭha an chhuah theihna turin thlaite chu a tifaiin, a vil uluk ang a, pal pawh a thuam ṭha fo tur a ni.

Ka hriat pui loha pal pawp aṭanga lo lutte pawh chuan ka huan chhungah awm hmunte an lo bengbel a, chungte chu pawn lamah theh chhuak leh turin tih rual a ni ta lova, ka huan chu ṭha taka ka enkawl angin, min enkawlpui turin ka sawm ta zawk a. Ka huan pal pawp chu keimah mai chuan ka ping phui zo lova, kan chhungkuain kan ṭangrual a, kan ping­phui leh ta a. Chuta ṭang chuan ka phalna chauhin huan kawng­kaah chuan an lut ṭhin.

He Mizoram mawi leh nuam tak hi ram pawn leh a chhung aṭanga lo chhuak nun dan ṭha lo te chuan a laia awm, rinawmna leh tlawmngaihna te chu an nek tlu leh ṭep

ṭhin. Mizoram enkawltu ka nih lai khan kei leh ka chhungte hmasial ranin hna ka lo thawk a. Ka dinhmun sawh ngheh nan te, sum leh pai hmannaah te, hmingṭhat nan te, ka hun ka lo hmang liam zo a. Nakina kan ram ṭhatna tur leh keimah ngei pawhin ka chhawr tur ka ngaihtuah pha lova, ka huan chu ka ngaihsak tawk lo a, ka enkawl ṭha tawk lo a ni.

Ka thiltih rah chu ka tu leh fa ten an phur a, a rih em avangin an tlukpui ṭep ṭhin a, kei lah chu ka upa tawhin ka pui thei tawh si lova, "Aw Zoram, ṭang fan fan" tiin ka thlah liam ta ringawt mai a ni. Huan pu ṭha chuan hnathawh kawr a ha a, a chem a tat hriam a, huan hnim laiah a lut a, phun nawi lovin a sur a sa hnuaiah a thawk mawlh mawlh ṭhin. A huan thlai tharte pawh a ṭhenawmte a sem ve hial ṭhin.

Mizoram hmangaih­tu dik tak chuan, dikna leh rinawmna in ro a rel ang a, tlawmna nunin bul a ṭan ang a, taimakna in ram kaihhruaina hna a thawk tur a ni. He Zoram hian hmangaihtu a mamawh a, mi nazawng thawh chi a ni lo. Hausakna te, chakna te, hmingthanna te, chungnungna te, finna te, thiamna tein Mizoram hi an hruai ṭha thei lo. Dikna leh rinawmna keng tel, tlawmna nun chuan, hmangaih takin Zoram hi kaihruai sela, taimak chhuahin Mizoram hi kaihruai sela, a va duhawm tawh em!

Chutiang ang ram hmangaihtu, Mizoram tana huan pu ṭha chu inthlan leh hunah ngaih­tuahin thlang chhuak ila, chutin, Zoram thar kan din thei ang.

- H. Neihchungnunga, Durtlang North