HOME SCIENCE - I fanu tan a ṭha em? (Home Science/ Home Economic bihchianna)
Khawvel hmasawn zelna karah Mizoram Education Board-a HSLC & HSSLC Result pawh chhuak mai turin ruahman mek a ni a. Zirlaite leh nu leh pate pawhin rilru dang pu hleithei lovin, tu leh fate tan zir zelna tur leh subject lak tur ṭha leh duh zawng kan thlir kual mek a, ngaihtuahna fim tak nen, kan hmalam hun tur thlir chunga rilru siam a ngaih hun lai tak a ni.
Hniak tam lam lam tih ngawt hun a ni awm love. Zirlai sang rual teh meuhin an pass chhuak leh ang a, a tam zawk chu hmeichhia an nih leh ngei a rinawm. Eng stream nge zawh tur ni a, eng subject nge ṭha ang tih kan ngaihtuah hunlai tur tak a ni. A tlangpuiin kan subject hriat lar leh mi tam tak kalna lamah hian kan rilru a kal ṭhin. He Article hi zirlaite leh nu leh paten an career an ngaihtuahna lamah rilru thar a siamsak beiseina avanga rawn ziah a ni.
Hmeichhe kaihhnawih deuh bik, mi nawlpui hriat leh sawi rik hlawh lo tak ni mah se Mizorama zirna lo luang lut zinga subject hlun ber pakhat Home Science Subject hi 1965 (vel) aṭang daih tawh khan Mizorama zirna pawimawh tak a ni tawh ṭhin.
Kum 1899 chho khan North America a mithiam rualten mihring khawsak chawikanna turin Home Economics hmingchawiin hma nasa takin an lo la tawh a. 1909-ah American Home Economic Association dinin khawtlang ram leh Asia leh khawchhak ram hrang hrangah zirtirna pawimawh taka hman zui a ni ta zel a, a bik takin, hmeichhia te zingah he subject hian hmun a luah thuk ta hle.
Home Science chu eng nge ni? Mi tam tak ngaihdan chuan Home Science han tih hian choka lam a kawk deuh ber a, miin Home Science subject a lak chuan eirawngbawl a thiam turah kan dah. Hei hi a dik a, mahse a dik famkim lo.
Home Science hnuaiah hian department hrang panga a awm a, Food and Nutrition, Human Development and Childhood Studies, Development Communication and Extension, Resource Management and Design Application leh Fabric and Apparel Science te an ni.
Food and Nutrition (F&N): Undergraduate level-ah chuan B.Sc Home Science pass leh Honours a awm a. Hei bakah hian one-year post graduate Diploma course Dietetics and Public Health Nutrition leh Master degree Food and Nutrition-ah te a awm.
F&N Department-ah hi chuan a hming landan ang hian kan ei leh in chungchang te, ei leh in siam leh sawngbawl dan te scientific takin a bulṭhut (basic) aṭangin an zirtir a. Undergraduate level-ah chuan Food Science chungchang te zirtirin, Nutritional Biochemistry, Diet Therapy leh Food Processing te an zir a. Therapeutic Nutritions, Food Microbiology, adt. pawh an zirtir tel.
Human Development and Childhood Studies (HDCS): HDCS Department hnuai-ah hi chuan mihring taksa leh ngaihtuahna lo ṭhan dan stage hrang hrang zirtirin naupang leh a lo ṭhanlenna chhungkhua leh khawvel nunphung mila enkawl dan te an zir.
Gender issues te, Child and Human Rights te bakah kum upa leh rualbanlo naupangte enkawl leh bawihsawm dante pawh an zir.
Field work te neiin case study te pawh an nei ṭhin.
Development Communication and Extension (DCE): He department ah hi chuan Communication subject-in a kaihhnawih hrang hrang- Extension Programme Management, Mass Communication, Media Studies, Gender Studies, Sustainable Development, Media Management, Social Work or Business Management te leh Development Communication and Journalism te an zirtir a.
Resource Management and Design Application (RMDA): Undergraduate level-ah chuan Housing and Space Planning, Family Finance and Consumer Studies, Resources & Sustainable Development, Interior Design and Decoration leh Ergonomic Design te an zir tel a. Tin, zirtir hnaa tui tan pawh school leh university-ah te an thawk thei bawk.
A ṭhen chuan research leh project te an ti chhunzawm bawk.
Fabric and Apparel Science (FAS): Department of Fabric and Apparel Science hnuaiah hian B.Sc degree Home Science-ah Honours leh pass bakah, M.Sc. Fabric and Apparel Science-ah a zir theih. He course-ah hian Traditional Textiles and Designing bakah, Fabric and Garment processing te leh Quality Control chungchang te pawh an zirtir tel. FAS Department pawh hian a huam zau hle a, World Textiles te, Pattern Making and Apparel Production, Historic Costume and Textiles, Dyeing and Printing bakah Fashion Marketing and Merchandising te, Textile Conservation, Extension Programme Designs, Textiles for Home and Hospitality, adt. an zirtir tel bawk.
Home Science hian zirlai naupangte in chhung khawsak enkawlna bakah professional career ṭha an neih theih nan a buatsaih a. Secondary school-ah te, college leh university mai bakah vocational school-ah te pawh zirtir an ni. Zirna lam (academic) a kal duh ten research te tiin thil thar leh ngaihtuahna thar khawtlang leh ram tan an zir chhuak/ hmu chhuak zel a.
India rama Home Science zir theihna college ṭhenkhat:
• Assam Agricultural University, Assam
• Banaras Hindu University, Varanasi, Uttar Pradesh
• Calcutta University, Senate House, West Bengal
• Lady Irwin College, University of Delhi
• M S Baroda University, Baroda
• Institute of Home Economics, University of Delhi
• S.N.D.T. Women’s University, Mumbai
- Dr. Lisa Lalmuankimi Pachuau, Delhi University