He ti lo liam maw le...

Kum 30 vel lai kal taah khan Pu KC Lalvunga IFS (L) chuan Aizawla a chhuṭi hmang a lo hawnin Delhi-ah hetiang deuh hian a sawi a. "E, tunah chuan Mizote zingah hmangaihna a dai zo ta a ni ber mai. Mahni hmasialna leh sum um-in kan phe suau suau mai a, ṭhenawm khawveng inhmangaihna leh induhsakna pawh a awm tawh love...."

A hnu deuh hlekah Dr. RK Nghakliana (L) chuan hetiang deuh hian a rawn sawi ve thung a. "Aizawl Dawrpui Presbyterian Biakin-ah Crusade kan nei chu kan hlim khawp mai, Biakin-a leng lovin pawna kawng ko-ah te mi tam tak an ṭhu a. Mi tam takin Lal Isua chu Lal leh Chhandamtu-ah an pawm a, Missionary-a inpe pawh an awm nual mai. Thlarau Thianghlim hnathawh a lang nasa hle a ni... An report khi a in persan hle a, a engnge dik zawkin rin zawk tur ni ang le? "A dik ve ve" a tih theih mai awm e.

Kelkang harhnaa khati zozai lâm leh

ṭawngṭai kha a thla­muan thlakin a, "khati lo liam maw le," ka lo ti a. Nikum November thla khan Zoram puma Baptist Mipa Pawl Inkhawmpui leh kumin February thlaa Mizoram Baptist Kohhran Hmeichhe Pawl Inkhawmpui, Lunglawn Mual-a an neih khan Pathian fakin an lâm leh a, "heti lo liam maw le," tih loh rual a ni lo.

West Phaileng-a KṬP Conference-ah khan ṭhalai khati zozai leh a chhimtute lam kan hmu leh bawk a. Kohhran dang - UPC leh Salvation Army leh a dangah te pawh chutiang tho a ni.

Tunlai hian Zoram pumah hlima lam­na hi kohhran tin deuhthawah a awm niin a lang. An lawm­na hla te lah chu a inang deuh ṭhûm a; hla pali/ panga, a tam lamah sawm emaw vel a ni ang. Kan Hlabu chhunga hla 600 dawn zingah heti zawng hi kan sa lar ta hi engemawti zâwnga ngaihtuah chuan mak tih bakah beidawnthlak te pawh a tih theih hial awm e. Pulpit-a thusawitute hian an sermon hmeh zâwng hla aiin lamna lam hla an thlan zawk fo vang te pawh a ni maithei. Solfa key-a lungleng ho tan chuan a hrilhhaithlak thei viau ang.

Politician ho co­rrupt zia, mahni pawl te hleihluak taka duhsak, pawl dangte thil tih ṭhat hmu thei lo thawm a ri reng a. Sorkar hnathawkho eiruk thu leh in-la milian ta te, mahni hna thawk ṭha peih lo, zawmthaw leh thatchhia, office hun vawng dik peih lo tih vel te. Mipui mimir lah mahni tlaktlumna leh zar zo theih tur chauh pak huam, mahni chhia leh ṭha pawh hmang ngam lo, Kristian nun dik leh Biakin chhung bakah chuan belhchian dawl lo tih thawm a ri ring hle bawk a!

A eng ber hi nge dik a, pawm tur ni leh ta ang? "A dik ve ve" kan ti leh mai dawn em ni? Heti reng renga kohhran tina hlimna hi "heti lo liam maw le," i ti phawt mai teh ang u.

- C.Lalsangliana