Lei verh leh kawng chhâwng a siam theih
Kan CM-in an sorkar tirh khan kawng chhâwng a sawi a, kan nuih a, fiamthu thawh nan kan hmansak a. Tunhnaiah lei verh chungchang a sawi leh a, kan nuihzat leh. Kawng chhawng a ni emaw, lei verh a ni emaw a tih theih a, ram tam tak leh India ram ngeiah pawh a theihzia kan hmu.
Saikhamakawn aṭangin Ṭhuampui emawa chhuak turin lei verh ila, kâwn remchang laiah a hlet (luh chhuahna) siam zel bawk ila, khawpui chhunga traffic jam nasa hian a thawl phah viau ang.
Motor veivah nan kher ni loin, metro turte ni ta se, kan ṭangkaipui viau dawn a ni. Tin, kawng chhawng pawh hi khawi emaw junction pawimawh lai deuh, kawngpui zau sa deuh siah, in ding lai ṭhenkhat ṭhiah hisapin a siam theih hlawm ngeiin a rinawm.
Lei verh leh kawng chhâwng chung changa mipui kan nuiha fiamthu kan thawh zuina chhan hi eng dang vang a ni lo, a sawitu avang zawk a ni.
Kawng chhâwng chungchang pawh, a theih dan leh theih loh dan pawh sawi leh a awm zui lo ta vang vang a, a hnuah lei verh lamah kan kal leh daih a. Hei pawh hi eng ruai a nih leh a rinawm chuang loh a; nakinah ropeway velah min pakai-san leh maiin a rinawm.
A sawitu hian a tihhlawhtlin lem loh tur a sawi ngun tawh a, chuvang chuan mipui hian kan ring tawh lo a. A hmunah ngei kalin phar vel chiam mah se, a tak takah engmah phar chhuah a awm ngai lo tih kan hre tawh a, chuvang chuan kan nuih a za a; kan beisei ngam tawh lo a, fiamthu thawh nan kan hmang zui ta mai mai a ni.
A tak taka tih theih a nih leh nih loh chian hmain hma la tawh ang maia sawi kan ching a. Ram hruaitute rilruah a awm ṭan dêk dêk tihin a tihhlawhtlin hna an thawk ṭan ni tawh mai âwma sawi kan chîn avangin kan awi tawh lo a ni.
Ṭhenkhat chuan hetiang hi fiamthu angin an la ngai thei zawk a; mi tam tak chuan fiamthu angah pawh an ngai thei tawh lo a, an thin a tirim zawk tawh a ni.
Tunlai chuan video-in thla kan la a, kan dah ṭha thei zel tawh a. Hengte hre reng hian kan ram hruaitute pawh hi ṭawng fimkhur ve deuh tawh se. A hnuah video kan phawrh chhuak a, a hmaa an lo sawi tawh zawng zawng nen khaikhin theihin kan dah chhuak zel tawh mai si a.
Hetiang khawvelah hian mumang ram sawi vak vak chi a ni tawh lo, a tak ram chin zel hi sawi tum ila. Kan innuih zat lo ang a, kan inawisak lo tawh lo ang.
- Ramropuia