COVID HRIPUI SAWRKARIN A HMACHHAWN DANAH KAN THINRIM - I

Thuhma: Kan thunun thei loh hripui lengin min chim mek a. Mi eng zatin nge thihpui ang a, mi eng zat nge dam khawchhuak ang tih pawh kan hre lo; eng tikah nge hri hian min kiansan ang tih phei chu kan hre lo lehzual. Chutiang karah sawrkarin hripui a beih let danah mipui kan thinrim a. Hrileng khuahkhirh chhuan­lama thuneituten mipui min rapbet lutuk hi kan thin a rim tawh bawk.

Sawkar hian healthcare system sawngnawi lutuk vang a ni tih an inpawm duh lo a, mipui laka hmai phihna a la zawng reng a. Khawtlang tel loin hripui a do thei lo a, khawvel lockdown rei ber record min siampui chung pawha hri kai ka tlahniam thei lo hi mipui thuawih loh vangah te an puh a ni. Mawhphurhna la ngam hruaitu kan nei em?

Ni 155 chhung min khar­khip tawh mah se (nikum nen phei chu ni 300 min kharkhip tling tep ang chu) kan thinlung zalenna leh IT in thuthar min pekte an khuahkhirh thei lo hlauh a. Chuvangin, hri kai tlak hniam theih loh vanga mipui thinrim chhan, mipui aiawhin ka’n pau pui leh dawn a ni.

1. Hri kai tlakhniam theih loh chhan ‘Test Strate­gy’ fail vang?: ICMR-in Covid-19 test 70% tal RT-PCR a test tura state tinte a ngen mawlh mawlh chungin Mizoram chuan RT-PCR test theihna ZMC-ah chauh a awm a. Rinrawla kan hman RAgT negative result hi zaa 34% lai chu Rt-PCR test-a positive a ni thei (Times of India, June 21,2021). RAgT hian positive a hmuh hi dik zel pawh ni se, positive reng, negative-a a hmuh si an tam avangin Covid kai reng inhre si loin midang an kaichhawn theihna a sang a. Covid symptom nei si RAgT-in negative a hmuh tlat avanga Covid treatment la thei lo, RT-PCR-a hmuh chhuah meuha lo tlai tawh, nunna chan hial awm nia kan hriat avangin kan thin a rim a ni.

Covid test-na khawl rintlak, ‘Gold Standard’ an tih RT-PCR hi kan mamawh em em laiin state khat ve riang ruang hian kum hnih dawn chhungin pakhat bak kan nei thei lo a. Mi state ah mobile RT-PCR an tlan zut zut laiin Mizoramah chuan RT-PCR khawl bun belh turin high court-ah sawrkar khin a ngai a nih hi! Mizoram pumpuiin ZMC-a mi kan inṭawm a, a thawktute an hahin an indaih lo, Sunday-ah phei chuan test chawlh a ngai ziah a.

RAgT test-in negative result a pek, RT-PCR confir­mation tih zui mumal si loh hi hri kai kan pun chhan a ni tih hi 100% chuan a dik lo mai thei. Mahse, test kalpui dan ṭha tawk lo vangin hri a darh a ni thei em tih hi mipuiten kan rinhlelhna lian ber chu a nih hi.

2. Sawrkar thiam loh nge mipui thiam loh?: Hri darh chhanah sawrkarin mipui min puh ngar ngar a, ‘mipuiin thu an awih lo, mask an vuah ṭha lo, zirchiannaah mask vuah ṭha zingah hri kai an awm lo, etc.’ an ti a. A dik nual ang. Veng penhleh leh thingtlanga kal nikhuain vai ang maia mask vuah ṭha lo an tam khawp mai.

Colony chep tak takah kan cheng a, meizial, sahdah leh kuhva khawr inṭheh, chawhmeh insuah, birthday leh thil dang lawmte pawh sim a har viau. Heng hi mihring nunphung a ni a. Ni 155 chhungin khuahkhirh hian heng zawng zawng aṭanga fihlim reng tura mipui beisei hi thil harsa a ni.

Sawrkarin a tih tur ti se, hri kai leh kai lo test na khawl rintlak tam tak awm se, a kaite enkawl dan tur rua­hmanna fel fai tak siam se. 3C leh 4C-a inlak ringawt ni lo, mahnia inenkawl dan te, khawvel hmun danga an tih angin ruahman ve se, a na zualte enkawlna tur hospital ṭha taka thuam district tinah awm se, tun anga mipui khuah­khirh bur bur lo hian kan kal thei tawh tur niawm tak a ni. Sawrkarin heng a tih tur ti lo a, mipui khuahkhirh ringawta hri do a tum hi kan thin a rim a ni.

Mipui min puh a nih chuan Dhavari Slum Area, Mumbai 2.5 sq kms a mihring 8-lakh chengah engtin nge state sawrkarin Covid hri a control tih zir rawh se. Inlen pawh hranpa pawh an ngai lo, an insi sa vek, Aizawl Municipal area, 400 sq. kms ah mihring nuai 3 vel chauh kan cheng a, engati nge hri an control theih loh?

Inah min khungbet a, kan inkaidarh zel a ni zawk lo maw? Mizote hi vai let 99% in thu kan awih zawk a, kaihhruai kan nuam zawk bawk. Hruaitu ṭha kan mamawh mai a ni.

3. Hri do hneh loh chhan sum neih loh vang em ni? Mizoram pumah Covid-19 veina zualte enkawlna, Covid dedicated hospital pakhat chauh, SRH-ZMC kan nei a. ICU khum 34 telin khum 307 chauh a awm a, chu chu rampumin kan inṭawm a. Damna beseiin chhim leh hmar, chhak leh thlang tawp aṭangin an rawn pan a, a ṭhen kawng lakah an thi a. Eng ngati nge Covid dedicated hospital hi district tina din a nih loh?

Eng ngati nge covid hri kai leh kai leh test-na rintlak, RT-PCR pakhat chauh kan la neih? Eng ngati nge 2nd wave lo thleng tur hriatsa renga inbuatsaihna an neih loh? Sum a awm lo nge an ti duh lo? Khawtlang leh mipuiin theihtawpa tha leh zung, sum leh paia kan puih bakah Central sawrkar leh ram dang aṭangin ṭanpuina a lo lut ṭeuh ṭeuh a, mahse kan hri vei enkawlna kawngah hmasawnna hmuh tur a tlem em em thung a. State dangte en phei chuan lung a awi thlawt lo. Sawrkar enkawl 3C-a awmte'n mahni ei-in intumchawp a ngai a, khawtlang enkawl, 4C-ah damlote'n damdawi intum vekin, khawtlang ṭhenkhatin chaw an tumsak a. Vengchhung mi nurse leh doctor ten volunteer-in an hna karlakah an vil a, sawrkarin kutkawr tak ngial pawh a pe lo. Khawtlang enkawl 4C neih hi sawrkar tan thil zahthlak leh mualphona vawrtawp a ni.

Covid hripui kan do hneh loh chhan hi rukruk (corruption) vang a ni ngei ang. Rukruk (corrupt) chingte'n kan hmasawnna tura sum ruahman an ru zo zel a. NEIGRIMS, Meghalaya leh State Referral Hospital, Falkawn din kha a inrual thuak a, anni chu khuti khu an ni a. Keini chu heti kan la ni a nih hi. Heng zawng zawng hi hun rei taka ta tawh, damdawi inenkawlna tura sum ruahmante rukruhoin an lo ruk zawh ṭhin vang a ni.

Sawrkar hmasa khan theihtawp chhuahin MIMER saw lo sual chhuak lo phei se eng nge kan an ang? Ngaihtuah ngam pawh a ni lo.

4. Thenawm state chief minister te chuan heng hi an puang a, an ti ngei bawk:
i) Meghalaya: “Covid 2nd wave do-na turin health infrastructure leh hmanrua mamawh dang atan cheng vaibelchhe 240 kan ruahman a. 2020-ah cheng vaibelchhe 400 kan hmang tawh” CM Conrad K. Sangma (PTI 10th July 2021.).
ii) Manipur: “COVID do nan cheng vaibelchhe 60 kan seng tawh. Kan sawrkar hian sum lamah hatsatna tawk mek mah ila, hri do nan a ṭul angin kan inseng zel ang” CM N. Biren Singh (PTI, 8th October 2020).
iii) Nagaland: “Covid-19 do nan cheng vaibelchhe 139 kan seng tawh a, chu'ng zinga cheng vaibelchhe 112 chu state own resource aṭangin a ni. Medical infrastructure tihchangtlun nan cheng vaibelchhe 62 kan hmang tawh. Revenue deficit state kan ni a, sum hmuhna hnar kan nei ṭha lo. Mahse hei hi covid donaah ṭhuanawp phah nan hman kan tum chuang lo. Kan mipuite himna a nih chuan a remchan dan ang angin hma kan la zel ang” CM Neiphiu Rio (PTI 13th August. 2020).
iv) Tripura: “Corona package atan cheng vaibelchhe 579 kan ruahman a. Public distribution system (PDS) kaltlangin mirethei harsa zual mi nuai 7 hnenah cheng 1000 leh thil dang sem a ni bawk ang” CM Biplap Deb (PTI 27/ 05/21).
Tripura sawrkar hian kan ti ang an tih chu an ti ngei a. Covid vanga thite cheng nuai-10 in a ral a, covid hrikai hospital leh 3C a enkawl ngaite, damdawi, ei leh in, mutbu, ha nawhna leh a hlo thlengin a tumsak vek a, damlote tum ve chu dama an chhuah huna an hawnna tur lirthei leh an ke thiah chiah a ni. 4C phei chu a hming pawh an hre lo ang.
v) Mizoram: Chief Minister Pu Zoramthanga chuan “Covid do nan pawisa limit a awm lo ang” a lo ti tawh a. Kan awih lo a, kan dan pangngaiin kan nuih a za a, kan awih lo dik hle a ni.

5. Sawrkarin mipui hmakhua a ngai lo lutuk hi kan thin a rim!: Heti khawpin hripui leng harsatnain min tlakbuak a, nikum tel loin thla thum aia rei hnathawk thei loa lockdown tawh kan nih avangin ei bar kan zawng thei lo a, ni tina inhlawhfa chawp leh sumdawnna zawng zawng a chawl vek a. Kan tangka khawlkhawm zawng zawng kan ei zo tawh a. Chuti chungin sawrkar chhiah, tui bill, electric bill, telephone bill, kawngkal man, zirna leh damdawiin enkawlna senso a ngai reng a. In leh dawr luah man pek a ṭul reng a, loan rulh ngai kan tam bawk. Hetih laia electric bill a han tisang vak maite hi mipui rawk zui zelna bak eng nge ni se kan tih? A theih chin chinah mamawh tak takte tal hi heng sensote hi awl âwm tak zawk a nih laiin min ṭhing ṭawk ṭawk a, pe thei lote connection tihtawpah a vau bawk a. Rei lutuk min khuahkhirh a, min ngaihtuah zui leh si lo. Chaw ngheiin thi vek mah ila pawi an ti lo a nih a rinawm rum rum mai. Heti ang ema mipui hmakhawngai loa ro an rel hi kan thin a rim a ni.

6. Politicize & Religionize: A tir aṭangin a fuh lo. Science thiamna hmanga do tur an politicise a. Tun ang hunah ruling leh opposition sawina hun a nih loh tehlul nen opposition tih a nih chuan RT-PCR khawl mamawh em em pawh kan dah ṭawl hmiah duh a. Mithiamte thurawn pawh an duh chin chauh an zawm a. Hri vei kan tlem chhan chu ‘Kan chief minister ṭawngṭaina vang’ te an ti ta mai mai a. Kan politics rilru dik lo leh sakhuana nena kalpuiin inphihfai nan MKHC an hmang sek bawk a. Heti anga hri do dan dik lo taka an do hi kan thin a ti rim a ni.

7. Covid vanga tite ral ngha zel rawh se: Nunna hlu tak hi eng zat maha lei theih a ni lo. Mahse, Supreme Court thupek anga state sawrkarin covid vanga thite zangnadawmna, Rs. 50,000 pek tur a tih tal hi lo pek thuai thuai ni se, kan thinrimna a ziawm deuh mahna!

8. LRM hospital chungah kan lawm: Hripui vanga lungngaihna leh thinrimna karah lawmna tlem pawh sawi kan chak. Mipui healthcare system tlukchhiat mek vangin private hospital te pawh covid do kawngah inhawng turin kan phut mek a. LRM hospital-in FIA test, sawrkar nen rate inang renga a kalpui hi a lawmawm hle a. FIA khawl hi Korean company-in state sawrkar pathum a pein ka hria a, test kit erawh an intum a. Test man cheng 300 ve ve an la. Tun hnaiah LRM hospitalah RAgT test-in negative result a pek pawh FIA-in covid positive tih a hmu nual a. Private hospital-te hian RAgT hmang tawh loin FIA emaw TrueNat emaw tal hmang thei se a duhawm hle! RAgT chu mass test-na tawk chauh a ni a. RAgT test negative RT-PCR a confirm leh vek tur tih lah mumala kalpui a ni si lo!

9. Insiamṭhat ngai private hospital: Social media lama darh, Aizawl khawpuia private hospital pakhata inentira tura kal, RAgT test man cheng 300 laksak a, test si lo kha a pawi hle a ni. Tunlai khawvel hi information war a nih vang ni loin, dik tak leh rinawm taka engkim tih hi Lal Isua hnung zuitu, Kristiante tihtur a ni a. Kristian ni lo pawhin Mizo a nih vang talin dawt leh dik lohna hi i mausam ang u khai.

- Ruatfela Nu