CHAPO TAKA TLAWM

Mizo ten Social Media kan hman thiam loh thu kan sawi fo a, kan la hmang thiam tak tak chuang lo a nih hi.

Engemaw thil thleng leh issue hlek­ah, dengkhawng leh lei kuai thei berin thu kan han post pawp a. Huaisen leh dikna duh nihna emaw kan ti ṭhin nite pawhin a lang a, ṭhenkhat chuan lansarh an khelh vang te a ni ṭhin.

Phone leh hmanraw dang, medium ṭha kan neih tak avang hian, duh duh sawi ve theiah kan inngai a, kan sawi te chu miin ngai pawimawh hiam hiam turah te pawh kan inngai bawk niin a lang.

Ram hruaitute bei ngar ngar mai te, kohhran bei ve ngar ngar mai te, YMA leh khawtlang ṭhatna duhtute lo bei ve ngar ngar mai mai te hi kan awm kum tluan a. Thu dik tluantling lo deuhte hi uar deuhin kan han bawlphuan a. Kan sawi lo tuipui tawk te te hi chu kan hmu ve zel bawk a. Social media khawvelah hian kan so ve bulh buh mai ṭhin.

Mimal demna leh khawtlang hruaitute chet dan te leh Dam­dawi In thawkte chet dan etc demna han post hluai te hi miin huaisen leh dikna duh min tise tih vanga han post hluai ching hi kan awm a. Rin ang ngei ngeiin, FB ah te, Whats app-ah te, Chanchinbu-ah te Ngaihdam dilna an chhuah leh hna hna ṭhin.

Ropuia kan inngaih ang ai hian kan ropui lo. Keini aia Force chak leh lian zawk hi a lo awm zel a; chapo tak hian kan tlawm leh zal zal ṭhin a. A hma lawka pa em em mai khan, ‘Ngaihdam’ kan dil leh nge nge ṭhin.

Dik lo kan hmu tak zet a nih chuan, a beihna tur dik zawk leh a siamṭhatna tur kawng mumal zawk hi a awm. Khawvel hi kan ngaihdan angin a kal vel dawn lo a, kan ngaihdan lo anga thil thlengte hi a dik lo vek tihna lah a ni hek lo.

Nung ho tur chuan mi dangte kan ma­mawh a, khawtlang inhruaina hnuaia kan kun te, sawrkar thu kan zawm te, kohhran kaihhruaina kan zah te hi a ngai ṭhin.

Thu hnu dawn lek loin kan han phul ve chiam a, a hnu lawkah ngaihdam kan dil leh a; mipa dik tak tan chuan tlawm thlak lutuk a ni tih hi hriat tur a ni.

Mi an hlim viau laia lo thinrim em em mai, Mizo te thil tih apianga phunna tur lo hmu ve zel mai te hi nih loh tur. Thih hnuah ruh a mawih chak bik ṭhin!

Mihring hian dis­cipline te hi kan mamawh a. Mi dang­in min rawn dis­cipline hun nghah loh tur, a zahthlakin a tlawm thlak a, inti pa tak maiin, chapo taka ngaihdam dil a ngai ṭhin. Mahni in discipline mai hi a ṭha.

Social mediaa kan tel ve vang te, smart phone kan hum a, whatsapp leh FB a mi lian leh mi ropui ber ber te kan pawl ve phak avang hian anmahni ang kan va ni ve ta e tihna a ni lo. Tia pui en a han en a, mi lian tak nia kan inhriat chiah phei hi chuan, kan che sual ṭhin. Chapo taka tlawm leh vawng vawng a ngai ṭhin.

Hlauhawm a hnai, bawk rawh.

- F Vanlalrochana