Inkhawmpui leh sum senso

Presbyterian Kohhran chuan tun Pathianni hmang khan Pastor bial inkhawmpui an hmang zo chiah a, sum senso chungchang bik i'n thlir zui lawk ang. Social media lamah Pastor bial hrang hranga inkhawmpui thlalak kan hmu a, a bikin ṭhalai lamin an post nasa a; hmuh a nuam fû mai.

Tun hma deuh lawk khan pastor bial level-a inkhawmpui hrang hrang - kohhran bial inkhawmpui, KṬP conference leh hmeichhe khawmpuiahte khawpui lamah chuan rorel ní (Inrinni)-a rorel palaite zanriah siamsak an chíng riau a; an intihhmuh viau hman a ni. Mahse, ṭul loa sum sênna mai a ni tih an hre chhuak a ni chék ang chu, tunah chuan zanriah buatsaih an awm ta meuh lo niin a lang. A lawmawm hle.

Eng level inkhawmpui pawh ni se, a mawi thei ang bera inkhawmpui thlen kan duh vek a, sum lamah pawh, uikawm viau lo a, thil ṭulah chuan sen huam ve zel a ngai ang. Chutih rualin, kan sum hmanna chu a ṭul rêng em, kan mamawh a ni em, a tel loin tih theih a ni em, tihte uluk taka ngaihtuah hmasak zel a ngai. A chhan chu, Pathianin sawma pakhat pe tura min tih anga kohhran mipuiin Pathian ram sawma pakhat an pekte hi holam tak emaw, thil ṭul lo emawa hman chi a ni lo.

Tun ṭuma pastor bial inkhawmpui thlalakte pawh social media hrang hrangah kan hmu a, hmuh a nuam. A bik takin, a hmei a pà-in usher-te an nalh thei hle mai. Pastor bial eng emaw zatah chuan a thlengtu kohhrante'n an usher-te uniform atan kawr tur an leisak a nih hmel a; kawr inang ṭhap mai ha hmuh tur a awm nual. Chutih laiin, usher uniform atan usher kawr inleisak lo a, usher-te'n kawr an neih sa, rawng inang tlang hmang mai tam tak an awm bawk.

Presbyterian Kohhran bika Mizorama inkhawmpui lian ber, Synod Inkhawmpuiah hian a thleng tawh kohhran/ bialte'n an usher-te uniform tur kawr an leisak tawh ṭhin. Hei hi chu Mizoram pum bakah, Mizoram páwn thleng huap a nih avangin tih âwm takah ngai ta ila. Chutih rualin, Synod inkhawmpui angahte chuan usher atan mihring an lo ngai tam a, sum senso nasa takin a tam phah tih erawh a chiang. Synod inkhawmpui la awm leh turah, usher uniform tur kawr inleisak lo ngam kohhran/ bial awm tak ang maw?

Synod inkhawmpui an thleng ta emaw tih mai tura pastor bial inkhawmpuia usher-te tana sum senso a tam tak viau hi enfiah a ngai. Uniform tur kawr/ puan inleisak loa tih dan a awm. Pastor bial inkhawmpui hi a nêp tihna ni hauh loin, a huam chin a la zîm bawk a (Aizawla pastor bial

ṭhenkhat phei chu local council leh YMA anga veng/branch pakhat huam chhunga mi vek an ni), inséngso nasa lo zawng zela inkhawmpui thlen chîn a ṭha khawp mai.

A tak takah chuan, usher uniform atana kawr kan inleisak hian, usher-a ṭangte'n (a bikin nula lam) an kawr dawn chu hun dangah an ha chhuak zen duh tawh lo. Mahni veng chhungah ngat phei chuan, a ang (ṭhui dan inang chiah lo mah se) nei eng emaw zat an awm tih an hre kar a, an ha zui duh lo fo; hmun dang, khaw dang, an veng mite awm lohnaah chuan an ha duh tho mai thei e.

Inkhawmpui reng rengah ushering hi ṭhalaite buaipui a ni tlangpui. Ṭhalai hruaitute pawh inenfiah a ngai, koh­hran hruaitute aṭangin phût leh beisei ngah lutuk a hlauh­awm. Kohhran mi vek an ni a, ushering lam buaipuitute pawh a tam zawk chu kohhran/ KṬP-a chanvo nei, rawngbawltu kan tih ang ni pha an ni hlawm ngei ang; chu avang chuan usher ni

ṭhinte leh a buaipuitute pawhin uniform tur kawr lei turin beisei rûn lo ila a ṭha. Kan neih sa i hmang thiam ang u.

Usher-te kawr leisak a, duat bik anga lang theia an tana kohhran sum hman leh vak ṭhin hian hlet ṭha lo a nei thei bawk. Inkhawmpuiah hian chanvo leh mawhphurhna chi hrang tam tak an awm a, ushering hi chanvo/ mawhphurhna pakhat ve mai a ni. Thil dang tam tak a awm a - publicity, hospitality, reception duty, medical duty, sanitation duty, traffic duty, etc. Heng zawng zawng hi ushering ang thoa pawimawh vek an ni a, a ṭhente phei chu usher-te ai maha hahte pawh an ni mai thei. Thil danga duty-te tana an neih zui tur thil tihsak ve si lo a, usher-te chiah an neih zui tur thil tihsak hi a fuh lo thei a, inthîkte pawh awm thei a ni tih hriat a ṭha bawk âwm e.

Chuvangin, pastor bial inkhawmpuiah tun hma deuh lawka rorel palaite tana zanriah siamsak kan chîn kha, thil ṭul lem lo, a loa kan awm theih, ṭul loa sum sênna a nih avangin pastor bial tam zawkin an titawp leh ta ang hian, usher-te tana uniform tur kawr inleisak an chíng chho ta pawh hi thil ṭul tak ni lêm lo, a loa tih theih a nih avangin, chîn zui zel loh atan a ṭha zawk mah âwm asin.

- K.T. Zoramchhana