Vawk hri pumpelh dan!

Mizote hi vawk sa duh kan ni, thisen sang leh zun thlum te pawhin vawk ti tal an ei loh chuan an ngaih a ṭha lo. Vawk sa tel lo chuan sunday ni khat chauh pawh rei kan ti a, inkhawm pawh kan phur lo. Ṭawngṭai a kal lo a, Sunday school-ah pawh muthlu an vang pharh a, zing thawh phei chu har tak a ni!

Ui sa duh lutuk te pawh hi, vawk sa leh ui sa han chhum pawlh ila vawk sa an thlang leh zut zut tho; Pathian hnam thlan kan nih leh nih loh sawi ka tum lo, mah se vawksa duh mi kan ni a, vawk hri leng sa kan ei fo chuan kan dam reng dawn lo!

Tun hnaiah Mizo­ramah vawk natna hri PRRS leng vangin vawk 1,146 an thi tawh a, kum 2013 phei kha chuan vawk 3,806 chuang an thi. Vawk thite hi AH & Vety Department mithiamten an en fiah ṭhin nia sawi a ni. Hri leng vanga thi vawk te hi phum vek an ni lo tih sawi tur hian zawlnei nih kher a ngai lo lehnghal. Vety lam mithiam te hian vawk hri leng hi Champhai district Zokhawthar khuaah an hmu hmasa ber nia sawi a ni a, vawk hri kan kai ṭanna hi Myanmar ram hnaih lam a ni ta phawt mai.

Vawk kan lakna ber Myanmar aṭang hian vawk lak luh khap ta ila thawk peih lo lo hi a duh tui leh phunchiar hlei hlei kan ni si a, sawrkar kan dem leh luai luai si ang em?

Thil hria nia inngai te hian finfiahna awm miah loin Mizorama vawk hri leng hi Myan­mar aṭanga kan kai ni angin an sawi. Mahse hetianga sawitute hi ‘NLUP - Pathian prog­ramme’ titute ang chauh an ni; khaw khat mi fing pawh ni phak tlat lo.

Khaw khat chu a zau lutuk kei, veng khat pa rawn pawh ni lo hian vawk hri leng, PRRS pumpelh dan ka hrilh dawn che u a nia, in awi ngut emaw chu? Mizoram chhan nan ni loin vawk sa thianghlim kan ei theih nan ka thil hriat hi ka sawi a ngai ta a ni!

Doctor ka ni lo a, damdawi hmanga mi natna zawng thiam pawh ka ni lo; mahse kan buaia kan ṭah pui fo vawk hri leng vanga Mizoram economy tluchhe tur hi keimahin ka vei rei ta viau. Tute emaw angin min do pui ngar ngar turin tumah ka sawm ve lo ang.

‘Sem sem dam dam, ei bil thi thi’ ti ṭhin kan nih angin vawk hri a lo len hmaa in vawk thau nalh tak sa kha kan ei tlan a ngai zawk a ni.

Vawk hri len duh hun hi March aṭanga May thla tir vel thleng a ni a, kan lo welcome viau loh pawhin a lo leng tho ṭhin. Chuti a nih chuan vawk vulhtute hian Christmas leh kumthar vuak veta talh theih turin an ruahman tlangpui a, an talh veleh vawk no te manin an vulh chhunzawm nghal ṭhin. March - May te a lo nih leh meuh chuan vawk laklawk rual an lo ni leh hman der a, sa sat ho phei chuan a neitute hmuh lohin an teh duk duk a, an hual fel leh der tawh ṭhin.

Mahse hetiang an rawn ṭhan chak dawn lai chiah hian PRRS hri leng hian a man a, tleirawl camping pawh lut hman loin an thi leh mai ṭhin. An thlarau lam nun chu eng pawh ni se an taksa itawmna aṭang ringawta teh pawhin an uiawm a, sum zawnga teh phei chuan kan fanu duat lai te man let tam an man tawh ṭhin.

Vawk vulh hlum duh lo chuan vawk vulh hun a thlang thiam tur a ni a, a tlaran zawnga ṭha­hnemngaih hi kan sim a hun. Kum tluana vawk vulha March thla vela ti thi ṭhin ho ai chuan May thla laihawl velah chauh vawk note man a, a ṭhang duh ho zawng Krismas/ Kumthar sa, a budelh chu February thla velah talh zel mai tur.

Tichuan, AIDS lak­ah ni lovin vawk hri leng lakah nang leh in vawk in him ang.

- Ramhmangaiha