Hri do nan: Thil tih nge Ṭawngṭai?

An sawi ṭhin, tak tak ni maw? Venghluiah sawn pa pakhat pa deuh mai Pu Sela hi a awm a. Sela Cowboy an ti ṭhin. Kum a lo kal zel a, Pu Sela chuan hrawk cancer a vei a, a bawk luau mai a. ‘Inentir rawh’ an tih pawhin pa takin, ‘bawk hian tlang a tiat hma chu ka inentir lo ang’ a ti mai zel a. Bawkin tlang tiat thu awm hek suh. A tawpah chuan cancer vangin a thi ta nge nge a ni an ti.

Damlo, inentir duh lo, daktawr hmu duh lo, damdawi ei duh lo, inenkawl duh lo hian ‘ṭawngṭai ila a zia mai ang’ ti ngawt zel se a dik ang em? Pathianin thil danglam bik thlen tir a tum vangin a tidam a nih chuan Pathian ropuina a zarah kan dam ang a. Chutiang a nih loh chuan kan tih ve ngei ngei tur inenkawl kan tih duh tlat si loh chuan kan hmabak chu a hun aia hmaa thih thuai kha a ni mai.

Thufing chuan 'Pathianin mahni inṭanpuite a pui ṭhin' a ti a. ‘Kristiante a pui’ a ti lo a, ‘ringtute a pui’ a ti lo. Kristiante hi a pawng a takin mal a sawm ngawt lo, Kristian lo pawh ni se thawkrimte mal a sawm tho. Mihring hian tih ve tur kan nei a, chu mi ti si lo chuan 'ṭawngṭai ila a ṭha mai ang' tih ngawt zel tur a lo ni lo.

Ram dangah chuan sing rualin inkhel an en leh mup mup tawh a, sikul an hawng leh tawh. Hindu-ho chu hripui thawh thumna atan an inbuatsaih leh vut vut tawh a. Kristian ram, Mizoram chu kan pherh tulh tulh thung.

Vaiho khu an ṭawngṭai rual sek kan hre lo. Thla­muanna thuchah an sawi thum ve dup dup lo. Sual thupha chawi tur an inhrilh chamchi lo a, an crusade ve chiam chiam lo. Mahse, hripui thawh hnihna tudaiin hnehna hlado an chham thei tlat.

Eng vang nge? Mihringin tih tur leh mawhphurhna kan nei a, chu chu ṭha takin an ti a, chutiang mahni inṭanpuite chu Kristian lo pawh ni se Pathianin a pui mai.

Mi thiamte chuan
(i) 2/3 vel hi khawl ṭha (RT PCR) a endik tur.
(ii) District tinah khawl ṭha chu dah tum tur.
(iii) Chak taka hri kai leh kai lo a tam thei ang ber en tur an ti.

Keini mizo Kristiante chuan chung mi thiamte thurawn chu kan ti duh lo a, kan ṭawngṭai rual leh ngawt a, sual thupha chawia sim tur kan ti a. Home Crusade neiin thlamuanna thuchah kan insawi siak a. Kristian ram ber chu hri lakah kan tlawm ta duai duai mai a nih hi.

Mi thiam leh a ngaihna hriate thurawn ai chuan chet fuh loh palha hmai phih nan, natna leh damdawi lam zir ve miah lo pastor leh tlawmngai pawl hruaitute thu kan ngaichang zawk a. A tawpah Minister berin an duh duh dana kal an ni bik lo a, inrawn tlanga kal an nih thu a rawn sawi ta chiah reng a ni.

Mihring hian tih tur kan nei a, chu mi ti si loa ṭawng­ṭai rual lo rawt leh ringawt hi vut laka vawih ang chauh a ni tih hi kan pawm thiam a ṭul. Kan tih tur tiin kan mawhphurhna hlen ila, ṭawngṭai bawk ila a ṭha ber.

- Lalmuanzova Khiangte, Lunglei