COVID-19 MIZO HMEICHHIA MANGANG AU KA HRIA

27th Sept, 2021 Whatsapp kan hawng a "Covid Hripui sawrkarin a hmachhawn danah kan thinrim" By Ruatfela Nu tih ka hmu a, news paper lamah pawh ka hmu zui.

Ruatfela Nu hi Congress sawrkar lai (2008- 2013) PRISM ten sawrkar lai an lepse na discussion buatsaih ṭhinah khan, keini ruling lam tan a hnawksak fe ṭhin. Thawhpuite mit kha a thip deuh fo a, keiin "Sawrkar leh rulling te min khalh ngiltu a nih hi" ka ti mai ṭhin. Kan la inbe ngai lo, Whatsapp Group ZDF ah erawh kan titiho ṭhin.

Writer ṭha leh thiam tak, thil bul leh bal chik mi, hla tak aṭanga thlir, hnai tak aṭanga thlir thiam tak, rilru sehhel leh taima tak, Mizo writer ropui tak niin ka hmu.

Wuhan (China) kha 23rd January 2020 ah Lockdown a ni. Internet social media chhungah mipuite tawrhna sawrkar hmalakna dik lo leh chaklohna a ri chhuak nasa a. Chinese hmeichhe Writer & Journalist Wang Fang-i (Fang Fang tia hriat) hian nitin dinhmun leh sawrkarin mipui a rahbehna a rawn sawi ta fak fak a. China sawrkar khan internet an han block sak a, Wuhan mipuite internet an han censor vek zui a, in chhunga lockdown beh chung pawhin "Dear internet censors, you should let Wuhan people speak" tiin a la tlangau a. China sawrkar pawhin Internet Block & Censor a titawp a, Covid do dan kalphung thlakin a ti nem ta deuh a ni.

23rd January aṭanga 8th April 2020, Wuhan Lockdown (ni 68) kha Covid natna chhungkua a luh leh thihna bakah, mipui economy-in tuar tak a ni. Fang Fang hi Ruatfela Nu nen kan sawilang dun duh a ni. Indona, mihring leh ran chunga hripui leng a ni emaw, sawrkarin a hmachhawn dan fel lo thuah mipuiin sawrkar kan demna sawichhuah hi, sawrkar chuan ṭha zawka kalphung leh inherrem dan kawng a dap turah mi tam zawk chuan an dah a rinawm.

Covid 19 vangin US mipui an thi zawih zawih a, Donald Trump kha 23rd February 2020 ah India ramah vote zawngin a la rawn campaign. US ram Covid dona a ngaihsak lo tia puh a ni. US mipuite bakah India mipuite dem pawh a hlawh nasa, PM Modi sawrkar pawhin sawiselna a phurh phah hle. Trump kha November 2020 US Election-ah a tla, a chhan pakhatah US mipui Covid tuar nasa ka puh.

India ramah Covid 2nd Wave March 2021 ah a rawn inṭan a, June & July khan India chuan tuar nasa tak kan ni. Union Health Minister, Harsh Vardhan leh Minister of State bantir a, thlak tawp an ni. Engatinge PM Modi leh HM Amit Shah ten an rin ngam Gujarat CM Vijay Rupani term pawh hmang zo lovin an thlak a, Karnataka Senior BJP & Strongman- CM B.S Yediyurappa leh Uttarakhand CM, Trivendra Singh Rawat thlak bawk a. Congress lamah Punjab CM, Capt. Amarinder Singh thlak tawp a ni. Chhatisgarh leh Rajasthan Congress sawrkar pawh an chhugkua a buai nasa tih kan hmu.

A ṭhen chu nakum lama Assembly Election hmachhawn turte an ni, Karnataka, Chhatisgarh leh Rajasthan chu an ni lo. Mahni state len leh mihring tam dana Covid darh leh tuar nasa an ni, ngatinge election hmachhawn tur mihring tam ber UP CM Adhityanath Yogi hi vawrh nawn a nih bik dawn? UP hian Covid an control niin a ngaih theih.

Communist, Democra­cy, Taliban leh sipai sawr­kar pawh nise mipui enkawlna kawnga mipui ngaihthah emaw mipui tawrhna thlenga sawrkar chunga thinrimna thleng hi venthawn ngai ber a ni.

Ruatfela Nu hian Mizoram State mipui tawrh mekna a sawilang thiam ṭhin. India ram pum mipuite hriselna kawng vengtu leh thuneitu sangber ICMR hotupa, Head of Epidemology & Infection Desease - Dr Samiran Panda chuan Rt PCR leh RAgT dinhmun hetiang hian a sawi "Rt PCR test should account for 70% of all test and RAgT for not more than 30%. RAgT - It performs well on Symtomatic people, it does not work well an Asymtomatic population. It is upto the states how they implement it" Mizoram Covid test kalpui dan chu nitin a lan hi.

Mizo hmeichhia mang­ang a au a, ngaithlain inbih let teh ang u.

- Lalrozara