A LÊNG LÂWK E

Rihsang mual liama thangvan kâi tûr ṭheuh ṭheuh chu lunglen hre lo khawpa thawveng tluan chhuak kan awm kher awm lo ve. Ziaktu pakhat phei chuan, 'Lunglen hre ngai lo chuan hringnun nawmna zahve pawh a la tem lo a ni,' a ti e, an ti em ni kha? Chuvangin, lunglenga kûr hi i zak lo ang u aw! Khi thangvanpui kan thlen hmaa tu thinlai mah kan inhliam tawn lohna awmchhun pakhat chu, hringnun leh khuarel mawina vanga lunglenna ruama thu mawi lo lang te hi an ni si ṭhin a. Ti teh, heti hian i kûr leh teh ang. 

Hun a inher zêla favâng ni êng mâwi a lo herchhuak leh ṭan ta. Nakin lawkah chuan tuten emaw 'masi rim a nam ṭan' an tih ang hun kha kan la thleng leh ngei dawn a, a rim a nam leh veng veng ang le! Hmun dang aṭanga mahni khua ngêia Krismas hmang tûra haw hun ang te kha a lo thleng leh vek dawn. 

Thlasik ni chhuak sârah maimawm ril an han inphan tle leh neuh neuh ang a, lui dung zawh zai zai chunga chinrâng hram lauh lauh ri pawh kan hre leh ngei ang. Sikni êng thlangtiang mual liam tûr a kal dul ruih mai tûrte chuan lung an ti lêng lâwk mang e. Tuna hrilêng vânga kan hun tawn mêk hian eng thil nge a la hrin chhoh zêl dâwn hre lo mah ila Krismas hun duhawm zawng a lo la thleng ngei dawn si. Tahchuan, a hma ang khân nang leh kei hi hlima lâmin lâwmna ruai kan kil ho leh thei ang em le? 

Thlasik thla êng hnuaiah zâi kan vâwr leh thei ang em? Kan duhthusâm ang ngêia hlim leh nuamin hmang thei pawh ni ila hmana kan lenrûalte zingah kim lo an awm tawh si chuan; aw, chu hun lo thleng tûr chuan lung an va ti lêng lâwk si em! Enteh, a lo herchhûak leh dâwn asin.

Hla lama kan thiam puipa pakhat Awithangpa khan mi vanneite tana kan hun tawn ngei ngei tur thil pakhat a ngaihtuah a, a lung hial a lêng lâwka a lung reng a awi thei lo a ni mahna. Chu thil lo thleng tur chu 'tar hun' hi a ni a, heti hian a han chham chhuak a : 

Ni e, kan vânneih chuan kan la tar ve ngei ang a. Tuna ṭha leh mawi kan tih te hi an la chûaiin an la châu zo ngei dawn. Nuam hian nawm loh hun a la nei ang a, hlimna hian ho mai mai nih a chan hun a la thleng ngei ang. Chuti ang hun a lo thlen rual chuan ṭhangthar lungfing leh no nalh tak takte chu laitualah lêngin tuallai an la chhir per sek sek reng mai dawn si. An khawivah lâwi leh an ṭangnêmte chu han thlir ve pawh ni ila 'tar lerh' nih kan lo hlawh tawh dawn si a maw! 

Vânglai kan nei ve a ni tih hre lo ni awm takin chak zet zetin min pel fûa fûa ang a, dîm leh dûat taka kan lo chen tawh hnu kan khawvêl ngêiah khân dim hauh loin min han nêk per lawp lawp mai tur chu! An rimtuina belh châka kan hnim hnaih apiangin 'tar rimchhia' tia kalsan kan la ni ang. Thahrui aia thlan tui a lo far hnem a, thisen zâm aia vun chuang liam a lo lansarh hunah meuh chuan thlir lam apiang a ninawm hun a thleng thei a, kan hmuh châk apiangten min tawlh bosan hun a lo la thleng mai thei. 

Mahni tâwka vânglai nei kan nih ve miau avâng hian kan duh aia hmaa vânglai a han chûai raih raih mai tûrte hian lung an va ti lêng lâwk êm! Amah Pu Rokunga tih dan takin :

Huphurh leh hreh êm avâng ngawtin kan thih ni tûrte hi pumpelh theih an ni mawlh si lo. Nakinah chuan damna zawnga damna dawihlo ei ṭhintute hi dam zo loin kan la thi ngei ang. Chutih hunah chuan, lei dâiah kan la zâl vâwt raih raih ang a, lungngaihna leh lunglên khawharnate chuan min hneh thei tawh ngai lo ang. Demna aiah damna kan chang ve tawh ang chu. Hlimna aia hlîamna min thlensak châktute chuan min tinâ phâk tawh lo ang. Mûanna ramah chuan mûangin kan lêng ve thei tawh ang a, lungngaih vânga ṭahna aiah lunglâwm vângin kan mittui a far tawh ang. Thihna ṭihbâiawm tak pawhin min ti hlum thei tawh lo anga, chatûan atân kan nung tawh zawk ang. Mahse, chu hun a lo thlena kumkhua atân i ṭang bêl leh ngai tawh lo tûra ka liam hunah pawh nang zawng, awi maw, ngâite'n i la vul reng dâwn si. 

Favâng ni êng no nghial mai leh thla êng mâwi takte chu an lo vul leh ṭhin ang a; mahse, ka tel loa khawhar taka i thlir ṭhin tawh turte hian ka lung an ti lêng lâwk mang e!