CHAWNGPHUL SIHSAWM

27 November 2020 Zirtawp chhun 11:00am khan Mizoram State Legislative Assembly Speaker Pu Lalrinliana Sailo chuan, ZPM  Legis­lature Party Leader Pu Lalduhoma MLA chung changa thutlukna a siam chu Speaker Office aṭangin a puang chhuak dawn. He programme hi Mizoram Television Network lian zawng zawng ten live telecast-in an pechhuak dawn. 

Pu Lalduhoma MLA hian, independent MLA ni chungin, Party pakhat ZPM tan ṭhahnemngai takin activity a nei a. Party-ah mitharte lawmlutin nasa takin a chevel ṭhin a, hei hi Independent MLA te awmdan tur a ni lo, tiin MNF MLA 12 laiin thu inang vekin Speaker hnenah an hek a ni.  

He thu hi hun rei tak chaia ngaihtuah a nih hnu leh dan lam thiamte biakrawn an nih hnuin thutlukna siam a ni ta a ni. 

MNF MLA te hian, Pu Lalduhoma an hekna hi Indian Constitution 10 Schedule para 2(2) tlawhchhanin a ni. 

He dan hian inde­pendent MLA chuan party zawm a nei thiang lova, eng party activity leh function-ah mah telin a inhmang tur a ni lo tih lam a ni awm e. 

Pu Lalduhoma hian hemi chung changah hian insawifiah in, independent candidate ni mah ila, ZPM Party hnuai aṭanga MLA a thlantlin ka ni a, Independent tak tak ni lovin, Supported by ZPM (sponsor tu nei) ka ni a,  chuvangin ZPM tana ka thawh hi a thiang a, eng dan mah bawhchhiat ka neih ka hre lo a ti ve thung. 

Speaker chuan, he thil hi politics ni lovin,  dan hmanga inbeihna a ni  tiin a lo sawi tawh a, Dan hmanga hek a nih angin dan hmanga rorel a ni dawn tihna a nih hmel. 

He thu mi ṭhenkhatin in chhiar meuh chuan, thutlukna hi puan chhuah a ni tawh maithei a, thutlukna siam dan tur hi, Chawngphul Sihsawm (mi ṭawngduh huang chuan) hetiang hian prediction a lo nei ve a. Chu chu a hnuaia mi hi a ni:- 

Pu Lalduhoma hian, Constitution 10 Schedule of para 2 (2) hi a bawhchhia em tih ngun taka ngaihtuah a, he dan behchhana thutlukna lo siam tawh hrang hrang ngun taka zir a nih hnu leh mithiam rawn tur chite biakrawn an nih hnu-in, he dan hi a bawhchhe ngei tih finfiah a ni a. Chuvang chuan danin thuneihna min pek (a bung leh chang , ziah a ni maithei) hmangin MLA aṭangin 'disqualify a ni' tih ka puang e, tih a nih duh hmel hle. 

Hetiang hi thil awm­dan a nih chuan, ZPM hian a ṭhatpui ang a, Pu Lalduhoma lainatna thlarau hian ram pum tuam chhuakin, MNF huatna thlarau leh Speaker demna tuipui angin a fawn zawk dawn tih chu hun reilote-ah lo lang mai tur a nih hmel.