Chakma Nation bawk kha

Mizo mipui thin tiurtu leh Mizo ṭha­laite thin tirimtu chu ‘Chakma Nation’ an tiamna banner kha a ni. Hman ni lawkah Chakma zirlaite thlavang hauhin Congress sorkarin zirlaite an vaw tawh a, chutihlaia pâwr taka lo ṭawng ṭhin MNF chuan inthlana vote an zawn meuh chuan ‘Vibrant Chakma Nation’ pek an tum thu zak miah lovin an au chhuah pui ta a, he Mizo ṭhalai rilru hi chu a na vawng vawng ka ti lo thei lo a ni.

A chhan chu Mizo ṭhalaite hian ram leh hnam hi kan vei ve tak tak tawh a, tun hnaiah phei chuan Mizoram hi ṭhalai zingah vei tak tak a tam tawh a, college bakah university vela titi nikhua pawh hian ram leh hnam hi kan sawi a, kan phak tawk tawkah kan chai ve nasa a ni. Mizoramah hian Chakma te hnawksak kan ti em em mai a, Mizoram chhunga Chakma vote duh vanga Chakma Na­tion din pawm tute hi chu Mizo ṭha­laite hi chuan kan dem kumkhua tawh ang.

Central YMA pawhin Chakma Autonomous District Council chu ṭhiah an duh thu an puang a, tun hnaiah Chakma Council inthlanna atana campaign tur hian Chakma awmna lamah kan party lian pahnih hruaitute an liam phei vut vut a. MNF President chu a kal ngei tih a banner ah khan chiang takin a lang a, Congress pawh an president hova an awm bakah minister pahnihin an ṭhutchilh a, MNF lamah hian MZP president hlui tun hmaa Mizoram tan tia pen chhuak ṭhinte kha Chakma tan an campaign an ti bawk a, a rilru nat thlak khawp mai.

Kan ramah hian Chakmate hi kan lo va dah sang em em ve, kan sorkar neih mek hian Minister-ah an dah tawh phawt a, chuan tunah Chakma vote duh vangin ‘Mizo National Front’ inti ngam party chuan Mizo Nationalism kalsanin Chakma Nationalism lamah an lut a, Chakma Nation min din sak an tiam a, a rapthlak ka ti khawp mai kei chu. Hei hi kan ngawih bo pui mai mai chuan ngaiah kan nei anga nakinah chuan ‘Chakmate hi Mizo an ni’kan la ti duh hialin ka ring.

Kan ramah hian mikhual an ni a, Bangladesh aṭanga pem lut an ni a, tun hnaiah dan lova pem lut an pung a, vote bank an nih ṭhin avangin kan vulh zel a, tunah chuan Chakma kan tlawn rawn ta a ni. Aw Zoram, harh rawh, Chakma vote duh party-te vang hian Mizo ṭhalaite hi kan harh a hun tawh a ni.

- Joseph LRM