Bru-Tuikuk chungchangah Corruption a inzep em?

Kum 1957 vel khan Tlabung MDC biala Chakma voter thun lo tura mi ṭhahnemngaite thurawn pawisa lovin khatih laia Politician pakhatin Roll-ah a thun lui a. Kum 1972 ah Chakma Autonomous District Council, Central-a lo recommend an awm leh a, a ṭhen an la dam nghe nghe. Hengho hian mahni ṭanghma sialin Mizote tana thil pawi tur dawn lovin thil an lo ti ṭhin a.

Kum 20 lai kal ta aṭang khan Tuikuk hovin fin kherek an thawh a, anmahni intihṭhaih derna hmangin Tripura-ah an pem thla a. Mizote min tih buai chhoh zel dan ngaihtuahin ECI chuan dan hmang dik lovin heng Tuikuk hote hi (anni chuan Bru an inti) Roll-ah min thun tir a. Chu mai ni lovin Postal Ballot te hmangin Tripura a mi ni si kha Mizoramah vote an thlak tir a.

Mizoram sorkar official leh Politician ten Tuikuk lak letna atana sum chetla vel it ve vang nge, ECI thu chu dan dik tlawhchhan a ni em tih pawh mithiam (Lawyer etc) te rawn lek lovin an aw e mai mai a. Tunah chuan heng Tuikuk-te hian demand phawk phaw hraw pui pui an nei ta a, ni 2 April chhuak Vanglaini-a kan lo chhiar phei chu a buru ta hle mai.

Zangnadawmna Rs. 10,00,000/- te Autonomous Dis­trict Council pek te an phut ta zel a. Khaw khata awmkhawm te, ram acre 5 theuh pek te, thing leh thlai zalen taka lak phalte an dil ta zel a. MHA Central lam lah chuan Rs. 1,30,000/- ṭheuh peka kum 2 chhung thla tin Rs. 5,000/-, Ration free te, Rs. 3,500 te a rawn phal ta zel a. Vanglaini headline hi a dik a nih chuan Bru hruaikirna atan vbc 924.2 hmuh a ni nghe nghe a. Mizoram sorkarin inpuahchahna atan ringawt vbc 9.7 hman a nih thute hriat a ni zel a. He inpuahchahna tangka hi voucher a awm ang em? UC a awm ang em? Dan lama ṭan chhan tur kan neih ṭhat em em laia chu lam ngaihsak duh lova, Tuikuk ho vote neihtira central sorkarin min chiah dalna tura an hmalakna apiang kan aw vel mai mai reng chuan kan hnam tan hling lianpui kan la pai phah dawn a ni.

MP leh MLA te thlan dan tur leh vote awmdan tur chu Representative of the People Act, 1951 Parliament in a passed a. Hei hi Danpui Article 327 tlawhchhana siam a ni a, Conduct of Election Rules, 1961 siam a ni a, he rule 18(a) hian (i) Special voters, (ii) Service voters, (iii) Voters on election duty leh (iv) Electors subjected to preventive detention, to be persons entitled to vote by post tih te a ni a. Section 60 clause (c) hian special procedure for voting siam theihna a keng tel a. Mahse, chutiang dan chu siam ala ni lo.

J&K tan bik chauhva siam, an state pawna awm te, ram danga awm te tana J&K a vote thlak theihna (Postal Ballot etc) chu Mizorama Bru, Tripura-a awmte tan hian ECI chuan min hman luihtir a. Hei tak hi thil dik lo chu a ni a. Mizoram sorkar hian pawm awzawng loh tur a ni. Article 324 hian heng election chungchanga thuneihna ECI hnena a pek hian dan dinglai leh rules awmsa a tlawhchhan tur a ni a. Dan dinglai kalhin emaw tlawhchhan lovin a duh duhin election a buaipui ngawt thiang lo.

Kum 1997 khan Bru hote chu anmahni duh thuin Tripura camp-ah an pemthla a. Heng mite hian 1998 leh 1999 MLA leh MP thlanah khan vote an thlak lo. Kum 2003 ah chuan Mizorama vote an thlak theih nan J&K chauhva hman tura dah kha, kawng ṭhenkhatah inanna lai a awm e tih avangin ECI chuan vote a neih tir ta a. Mi 4265 lai Tripura-a awm si kha Roll-ah an rawn thun tir ta a ni. Kum 2003 MLA leh 2004 MP thlanah khan Mizoramah vote an nei ta tlat mai a ni. Dan behchhan dik lo hman vang a ni.

Hetia 2003 leh 2004 a vote an han neih tak ngawt behchhan hian 2013 ah chuan Mizorama lo cheng ve pangngai (ordinarily residents) angin a ngai lui ta a. Kum 2003 a voters 4,265 kha kum 2013 ah chuan 11,243 an lo ni ta daih mai a. Kum 10 chhungin zaah 163.61 in an lo pung ta hluai a ni. Mizorama pun dan pangngai let engemaw zat a ni ta.

ECI chuan dik lo tak leh uchuak taka Bru ho duhsakin, 1951 dan section 60 clause (c) tlawhchhanin Bru ho te chu Postal Ballot a hman tir ta a. Conduct of Election Rules 1961 rules 17 leh 18 chu a palzut ta hmiah hmiah mai a ni - Mizote tana pawi turin.

ECI chuan Special Sum­mary Electoral Roll Revision-ah Tripura-a Bru ho chu 1.1.2016 a Mizoram Roll-a thun lut turin CEO Mizoram chu a rawn hriattir ta a ni.

Hetiang hi thil awmzia a nih laiin, Home Minister-in chu e, kha e tih nachang hre hek suh. Kan official dan leh hrai hre awm pui pui ten hnial khan hrilh hek suh. Ka rin dan chuan he Bru lak let velnaah hian sum langsar si lova paipawn ruk tur ita mual mual kan awm a nih ka ring ber.

Vawiinah chuan refugee a inchhal 10,052 an awm ta daih mai. Hruaikirna tur sum vbc 924.2 te hi (Rs. 9,24,20,00,000) a kawng lakah ei ṭhen theih a mual mual neih kan inring a nih mai a va hlauhawm em? Kan sum it hian khua kan hmu lo a nih ber hi a!

Bru hote hi anmahni insawiṭhaihna leh duh thuin Tripura-ah an pem a, chu chu India ram tho a ni. An lokir duh loh a hnu, chutah chuan ṭha takin in bengbel ve mai sela. Gas te, power te a awlsam a, kawng ni se a ṭha zawk bawk a, Bru ten awm an duh zawk bawk. An duhsak puiawm ngawt zawk alawm.

Anmahni lak letna tur sum tlafual a tam dawn hmel em a, tuman i it lo law law mai ang u. Central dawr hian tute nge kal ṭhin reng reng? Eng thute nge maw in zu sawi ṭhin le? Hnam tana la pawi tur a nih dawn chuan sum leh therhlo te hi kan officer te hian it viau lem teh suh u. Dan te hi kan hre tawk lo hlawm ṭheuh ang. A hriate rawn hi tlawmah i la lo ang u.

- Rualkhuma Hmar