Lumeh man leh a behbawm
Tun hnaiah Mizorama lumet inzawmkhawm pawlte chuan lumeh man an tisang a, sawizui a hlawh hle. Aizawl City Local Council Association chuan lumette biain, lumeh man tur an siam rem a nih kha.
Lumeh man an bithliah thar kha to ka ti ve tho a, chutihrual chuan ngam zawng hi kan nei deuh em aw ka ti. Sa man, chawhmeh man, hmeichhe sam tan man, taxi fare etc. pawh bituk nimahse zawm a hlawh lem loa, hmalakna hriatzui tak tak tur a awm ṭhin lem lo. In luah mante hlei hlei hi control ngai tak a ni a, miretheiten man to tak takin in kan luah a, an duh hun hunah min la hnawt chhuak zui.
Vawi leh khata lumeh man sang thut hi ṭha ka ti bik hauh lo, mahse mi hnuaihnung zawka kan ngaihte hi he thil thleng aṭang hian kan zuam deuh em aw tih ka ngaihtuah. Kan local council-te hian an huam chhunga in luah mante hi an bituk ve ngam dawn em le? Phal lohna hmuna lirthei dahte chungah hian action an la tak tak a ngem aw... Mi hausate'n in an sak avanga kawngpui an tih chhiat mante hi chawitir an ni ṭhin em?
Democarcy ram kan nih ang ngeiin mirethei leh mi hausa kar hi hla lo se tih hi ka duhthusam a ni. Kan ngam zawng pawng nek vak a, mi neinung leh thil ti thei deuhte kan en liam mai mai a nih chuan kan ram tan a pawi thui deuh deuh ang tih ka hlau hle.
Tin, thil pakhat mi hausa leh retheite ang khata en vek hi ka ngaihdan a nih rualin, sumdawngte chu an sumdawn dan a zirin an rate bituk se pawi tihna erawh ka nei lo. Hei kan sawina chhan chu lumeh man ang khat hrut rual tawp hi ṭha ka ti loa, an hmun hma a zirte, an thiam dan a zirte, an customer-te an care dan a zirte hian an rate hi danglam se ka duh dan a ni.
Lumette hian an duh zat rate in chhiar se, customer-te'n kan duhzawng kan pan mai dawn a ni. Lumeh man bituk a nih hma pawh hian Rs. 100 a lumette pawh an awm. Anni chuan an hmunhma fai takin an ti a, an customer-te malis-in, lu sukna hmun an nei thlap a ni. Khatiang hmunah khan keichuan powder chulh thuak thuak a, puana vuak fai thuak thuakna hmuna Rs. 50-a meh aiin ka thlang zawk daih.
Tin, mihringte hian thiam tih zawng leh duh zawng kan nei ṭhin. Chungmite chu kan mi hriat chian loh ai chuan inchhiar to zawk mah se, kan pan duh ngei ang. Mihring talent a in ang loa, rate in ang in chhiar sak ngawt hi thil fuh ber a ni lo thei. Pan hlawh lo deuh an awm a nih chuan anmahni in enfiahin, ṭan lak an mamawhna laia ṭan an la mai turah ka ngai.
A tawp berah chuan sumdawngte pawhin mahni hamṭhatna tur ringawt ngaihtuah loin, mipui rawngbawl kan ni tih inhre telin thil man/kan hlawh bituk ila, chuti chuan kan ram hi ram nuamah kan siam ngei ang. Chutiang a nih loah mahni ṭanghma ṭheuh kan ngaihtuah a, midang kan care loh chuan kan ram hi chenna hmun hreawm takah kan chhuah ang tih a hlauhawm.
- Lalrinthanga