RSS/ BJP hi an fakawm angreng...?

Internet hmangthiam tan: RSS hoin an tobulanmahningeiin an ziah, an website-a an dah dan chuan, Rashtriya Swayamsevak Sangh (RSS), a hming dang Rashtriya Seva Sangh hi kum 1925 khan Keshav Baliram Hedgewar-a hoin Nagpur khawpuiah din a ni.

RSS din chhan leh hmathlir chu hetiang hian an dah a:

to
1. Take Bharat to the pinnacleof glory

2. by Protecting dharma

3. through forming a

United Hindu Society.

Sentence pakhat (to take Bharat to the pinnacle of glory by protecting dharma through forming a united Hindu society) kha serial number pathumah an han ṭhen hrang kher a, chhan ril riau a neih hmel. Keini'n 'trinity' kan tih te pawh a ang lek lek a ni.

RSS din chhan tipuitling turin a ṭul phawt chuan tharum pawh thawh mai thei tur ṭha lai pawl (volunteer) an din nghal a, a hmingah Sangh Parivaran vuah a. RSS hming lang hauh lova tual chhung politics pawh luh chilh tura tih an ni. RSS remtih leh remruatna hnuaiah Sangh Parivar chuan parliamentary political wing an din ta zel a, chu wing chu a hming an thlak zeuh zeuh a, a tawpah BJP hi an pu hlen ta tih anmahni website ngeiah chhuang takin tun thlengin an tarlang a ni.

BJP thlahtute chhuina:

RSS-in volunteer chi hrang hrang an neih zingah Sangh Parivar hi an firfiak deuh bik a, politics rawngkai lam bitum tura volunteer group a ni lawi a. Politics khawiha mipui ngheng ber atan Sangh Parivar ber kher han hmatheh chu an ti fuh vak lo tih an hre chhuak thuai ni ngei tur a ni, ko an thlak hret a. Political party anga ngaih theih group thar an siam a, a hmingah Bharatiya Jana Sanghan vuah a, chu chu kum 1951 khan a ni.

Political party dang ang thei ber turin an kalphung pawh an her rem nasa hle. He RSS political wing-ah hian an hotupa ber chu Syama Prasad Mukherjee a ni. A din hunlai hre chiang phak te chuan Bharatiya Jana Sangh chu an ngaina chiam lo a ni maithei, kum 25 chhung la ihu India ram khawi hmunah mah politics lam hawia an hlawhtlinna sulhnu hmuh tur a awm lo.

Kum 1975 khan, Congress sorkar-a Prime Minister Pi Indira Gandhi khan National Emergency a puang a. A fapa Sanjay Gandhi nen an khawsak dan chu India ram mipuiten firfiak uchuak an ti deuh a ni ang, ram pumah non Congress politics movement a lo piang ta hial a. India ram puma politics rim nam pawl hrang hrang an thawk ho a, pawl pakhatah inzawm khawmin Janata party an din a. Kha Janata party-ah khan RSS political wing-te pawh Jana Sangh invuahin an tel ve nghe nghe a. Movement zar zovin MP pahnih an nei ve ta hial a, hei hi India ram politics-a RSS thlah kal zel te lo lan ṭanna a ni awm e.

Janata Party sorkar a keh darh leh takah khan, Jana Sangh party chuan a hming thlakin, tuna a hming The Bharatiya Janata Party (BJP) hi a pu ta a, chu chu kum 1980 April ni 6 kha a ni. MP pahnih chauh nen bul ṭan mah se, an thil tum bulpui kha Hindu kulmuk bitna bialah te chuan thlawptu an lo pung hret hret a. RSS hi enge a nih a, Bajrang Dal te, Sangh Parivar te hian enge an tum tih hre pha lem lo

ṭhangthar an lo tam ta bawk nen, hma an sawn chak ta viau a ni.

Bible ṭawng kau chheh han hawh ve ta ila, RSS chuan Sangh Parivar a hring a, Sangh Parivar chuan Bharatiya Jana Sangh a hring a, Bharatiya Jana Sangh chuan Janata Party keh darh rualin he Bharatiya Janata Party (BJP) hi a hring ta a ni. BJP an invuah hnuah MP 2 chauhin bul ṭan mah se, kum 35 a lo vei meuh chuan, India ram state 29 zinga state 14-ah anmahni hlangin sorkar an siam thei a, an thurualpui party dang nen state 7-ah sorkar an siam bawk a, a vaiin state 21-ah BJP chuan ro an rel mek a ni. State pariat la bang te pawh hneh ngei tumin, hmanrua pawh an duh tui lem lo. Ansorkarlohna state-ah te chuan RSS volunteer pachal deuh zel Governor-ah a dah hram hram a, an ṭang na khawp mai.

Tunah hian LokSabha-ah member 539 an awm mek a, chu'ng zinga 274 chu BJP an ni. An thurualpuite nen 282 an tling a, zaa 52 lam ṭang an nei tawh a ni. Rajya Sabha lamah erawh chuan member 239 awm mek zingah 58 chauh an la nei thung. Rajya Sabha hi India Danpui siam ṭhat tur lo pawmpui vetu a nih miau avangin, India danpui siam danglam turin an pawimawh hle.

Rajya Sabha member-te hi a thlangtu chu state MLA-te an nih avangin, state hrang hranga MLA thlanah hian, BJP chuan nasa takin ṭan an la a, anmahni hlanga an tlin zawh loh pawhin, an thurualpui nen state sorkar din hram dan kawng an dap ngar ngar a, an hmanraw leklam ber chu PAWISA a ni.

‘To Take Bharat to the pinnacle of glory by protecting dharma through forming a united Hindu society,’ atana an inbuatsaihna rei tawhzia, an tlozia, hmun kilkhawr lutuk Chawngte thleng pawha an tih mai mai lohzia hi an fakawm ang reng. Lok Sabha leh Rajya Sabha-ah 2/3 majority an tuak chhuah ve ve hun a, Danpui siam ṭhat a nih hlauh erawh chuan, Biak Inpuia lawite pawh hian Palm Sunday zinga kawng zawh turin, phalna dil hmasak a ngai mai awm mang e?

- K Sapdanga