Ambulance pek hun hi

Tuirial Bialtu ZPM MLA Pu Andrew Thangliana chu vanduaithlak takin a boral hlauh mai a, Bye Election neih a ngaih ta. Chu Bye Election a ding tura MNF in candidate atana an puan tawh chuan Tuirial Bial mipuite hman turin candidate a an puan tawh hnuah Ambulance a pe a, chu Ambulance chu khawtlang hruaitute hnenah hlan lovin MNF Block hruaitute kutah a hlan.

MNF candidate-in Ambulance a pe rup mai hi Tuirial bial mipuite tan thil lawmawm tak a ni dawn a, a thlawn liau liauva Ambulance rawn pe nawlh duhtu Aizawl pa an han nei hi an nihlawh em em a ni.

Mizoramah MLA bial 40 lai a awm a, chu tah chuan a thlawna Ambulance dawn duh lo pakhatmah an awm dawn lova, Bial 39 dangin an dawn ve loh a thlawna Ambulance an rawn pe ta mai a ni a, a petu thilphalna hi a dawngtute tan chuan hahipa lawmthu sawina tur a tling a ni.

Zawhna lo piang a awm nghal thung a - "Tun sorkar kumah hian kum 2018 leh kum 2021, August thleng kha hun a awm a, khatih hun chhung zawnga Ambulance pe lo khan engvangin nge tunah tak a pek?" tih zawhna hi a ni zawhna awm ta chu!

He zawhna chhan­na hi chu, "Inthlanah a din dawn vang a ni," tiin awlsam taka chhan theih ni mah se, chumi phenah chuan, "Tuirial Bial mi­puite vote hi Ambu­lance hmanga lei a tum em ni?" tih zawhna a lo piang leh a, a tum kher lovang. A rilru ṭhat vangin Tuirial Bial tan a pe ve liau liau pawh a ni thei a, mahsela social media lama mipui reaction han en hi chuan Tuirial Bial vote hi Ambulance hmanga lei tum angah an puh a, a petu rilru a lo nih kher loh pawhin mipuia a tlak dan chu hetiang hi a ni ta a ni.

Ambulance hi kumin kum tir te khan lo pe tawh se, nikum kum tawpte khan lo pe se, Covid-19 hri len tirh Mizorama Ambulance indaih loh em em lai te khan lo pe se a ṭhat dawn nen, tuna a pe pawh a ṭha thova mahse mipui rilrua a tlak dan hi a negative ta si a, a petu sum tam tak senga Tuirial Bial mipuite tana insengso pawh hi a zahawm letling tawh a ni.

- Lalremruata