Tuichawng bial buaipui luih luih a ngai em ni?

Chakma Auto­nomous District Council inthlang hi kum dang zawng aiin Zoram mipuiin kan ngaihven a, a chhan lian tak pahnih a awm thei awm - Pakhatnaah chuan kum 2018-ah MLA kan thlan dawn vang a ni. Pahnihnaah chuan BJP-in Mizorama beiseina neia inthlan an hmachhawn hmasak ber a ni.

Zoram pumpuiin CADC inthlan kan buaipui luih luih chhan hi chu politics boruak kan buaipui vanglai nen a intawn fuh vang a ni ve leh bawk. Kum dangah chuan CADC-a rorel­tute pawh hi kan hre ngai lo a ni lom maw ni le? Kumina CADC inthlang kan buaipui tak luih luih chhan hi chu hei hian eng emaw ti talin kum tawp MLA inthlan nghawng dawn tlata kan hriat vang a ni a, chhan dang a awm pawhin a tlem hle dawn a ni.

He CADC hi kan lip se ta ila, a area hi a zim hle a, MLA inthlanah he area chhungah hian MLA bial pakhat chiah a awm tih hi mipui nawlpui hian kan hria em aw? Tui­chawng bial chhunga Chakma ho inthlanna pakhat ve mai a ni si a, chutia ralpui phiara phiar tur a ni hleinem. Dr BD Chakma biala inthlang an ni a, he bialah hian MLA inthlan lo awm leh ta se a tawpah chuan MLA ngai bawk pawh hi a la tling leh hial mai thei a, chuvangin Mizo chin hi chuan i buaipui lo teh ang u khai.

Political party zia dik tak kan han hmu nghal pang a, roreltu an nih theih dawn chuan MNF-in “Kan thawhpui lo reng reng,” an tih BJP chu thawhpui an han tum nghal pang mai a. Pu Zoramthanga khan NDA lama an sangawizawnpui an nih thute khan a han pha mar kual vel a, mipuiin MNF leh BJP hi an inkawm tlat tih chu an hai lo. Congress-in vai zia an han chhuah a, an hmelma kumhlun BJP chu roreltu lama an ṭan theihna tur leh MNF tihhniam theihna tur a nih chuan an han thawhpui hreh lo mauh mai bawk a, CADC thu chu a sai sa ta nuai a ni.

Mizo mipui, Mizo dik tak chin hi chuan Tuichawng bial chhunga rorelru thlan mai mai hi chaw tak khukin khuk pui ruai lo ila, he hmuna tlin leh tlin loh hian MLA inthlanah nghawng a nei dawn lo tihte pawh pawm ila, he hmunah hi chuan Chakma lo buai se, keini chuan Tuichawng bial ni lo lam hi i hawi dial zawk tawh teh ang u khai.

- Zothanmawia