Football vs Lehkhazir!

"Lehkha zir phawt hi a ṭha ber. Football in thiam tak tak a nih chuan coach leh scout lamin an zawng hmu tho ang che u. Lehkhazir chawlhsana football-a kal hi naupang leh tleirawl tan a ṭha ka ti ngai lo," tiin min dawrtu ṭhahnem tak hi ka lo chhang tawh. Lehkha zir phawt mai hi a ṭha ber.

Ni e. Football buaipuitu ni ta chu nu leh pa tam takin min be tawh a, a ṭhenin min len chilh a, a zina rawn zin vang vangte pawh ka tawng ta nual mai. Naupang tam takin football hi eizawnna a nih tawh avangin tihtakzeta luhchilh an duh a, ngam pawh an ngam. Lehkhazir chawlhsana luhchilh kher an tum ṭhin avang hian a ṭha ka tih loh thu ka hrilh mai ṭhin.

Football tâna ṭhahnemngai ber tura ngaih zinga mi ka lo ni a nih pawhin, kei chuan football lama kal turin tu fa mah hi ka fuih (encourage) ngai hranpa lo a, an zirna lama theihtawp chhuah phawt turin ka fuih ṭhin. Mizorama eizawnna kawng ṭha ber chu lehkha zir hi a la ni si a, chuvangin lehkha zir tura infuih hi ka duh dan a ni. Lehkhathiam pawh ni se, football-a eizawng tur khawpa football thiam tel na na na chu an zawng hmu em em tho ang.

Ka thukhawchang veah chuan, "Football hi ke nei zawng zawng pet tur pawh a ni lo. Ballboot in pet chhe hnem ang a, hun leh sum in khawhral ang a, awmzia a awm lo. Football-a eizawn chu mi bikte tan a ni," tih hi a ni. Sports hrim hrim hi mi zawng zawng tan a ṭha a, hriselna leh inthununna atan pawh a ṭha a, ṭhanlenna atan a pawimawh a; nimahsela mi zawng zawng eizawnna tur a ni lo - talent nei bikte tan chauh a ni.

Khua leh veng hrang hrangah thu ka sawi ve zauh zauh a, ṭhalai leh tleirawl/ rawlthar bulah a ni tlangpui. Hengho rual bulah hian lehkhazir a ṭhatzia leh sports chu mi bikte kalkawng a nih thu ka sawi tel deuh ziah.

Lehkha thiam thei ber ni lem lo pawh a taimak a, a zir hram hram a, mi aia a thawh hma a, mi aia a men rei phawt chuan a tawpah eng result emaw chu a hlawh chhuak leh nge nge ṭhin. Ka zirpuiah pawh a hunlaia 'bright' ber bera kan ngaih ni si eizawnna kawnga hlawhtling zui lo an awm laiin, a hunlaia thiam thei ber pawh ni lo, nimahsela an taimak vang liau liaua hlawhtling a, eizawnna ṭha tak nei ta ka hre nual. Sports hi chu a dang daih - hrât laka hlawhtlin theih vek a ni lo. Talent neih hmasak a ngai.

Sports-ah reng reng chuan a zei mi, a thiam mi hi an awm. Tharum, chakna, tlan chakna leh chet ranna, thiam thil hrim hrim hi pianpui a tam hle. Zir belh theih awm bawk mah se, mi bik tan lo chuan sports hi eizawnna a tling lo. Mi bik tan chuan eizawnna a ni mai tawh lo a, hausakna a ni tawh. Football-a eizawng mai ni lo, football vanga hausa Mizo tlangval kan nei ta nual mai. A ropui e. Chutihlaiin kan zavaia kal hum hum chi a ni lo a, ke nei zawng zawngin, "Football-ah ei ka zawng dawn" tia bawh huam huam chi a ni hauh lo. A line hi a dang a nia - ka unau!

Kan talent hria ila, football-a eizawng thei tura talent nei lo na na na tân chuan lehkha zir peih loh 'chhuanlama' football hi hman ka'n phal lo! Football khelh nasat vanga zirlai inthlahdah, eizawnna khawpa football thiam leh si lo i nih chuan, nangma thiam loh a ni mai. He thu hi tunlai hian kan Zoramah tlangaupui chiam a ngai a, mi ṭhenkhat hlawhtlinna tlang hi kan zavaia lawn sup sup chi a ni lo a, a lawn thei deuh tur tan erawh lawn zel chi a ni - Mama leh Jeje-te lawn chhuah theih aia sang lawn chhuak thei tur ṭhangthar ṭhahnem tak an awm ang tih ka ringhlel lo. Talent nei tan chuan luhchilh ngam, atchilh tham, tui chilh bur a pawi hauh lo.

Football leh IAS
Kan thupui chu a mak hle mai. Football leh IAS hian inzawmna a nei lo. Aw, a nei lo takzet. He ti chung hian, tun hnaia Mizote IAS leh central service danga tlin theih loh chhana football lo puh ṭalh pawl 'pa fing' hi tam tak an awm asin.

"Football-ah chiah hmasawn, central service-ah pawh tling thei lo," tihte kan sawi duh dan a ni. Ṭawngkam thiam deuh leh hawi zau deuha inngaiin, "Football kan buaipui ang hi chuan zirna hi buaipui ila chu, central service-ah pawh Mizote hi tam tak an luh belh ang," an ti. An thlirna atang chuan a dik a ni mai thei a, ka thlirna nen chuan a dang daih. An thil hmuh hi a dik lo tiin ka puh lo ang a, ka hmuh dan nen erawh a inang lo tih erawh a chiang - ka hmuh dan hi a dik loh bik erawh ka ring lo!

Heti zawnga thil sawi ching 'pa fing' i hmuh fuh leh hunah chuan maw, "Ka Pu, Jeje hi awm lo se IAS kan tling sup sup dawn tihna em ni?" tiin zawt chhin teh aw. Football thiam lo bawk, lehkha thiam lo bawk nih ai chuan, football tal kan lo thiam hi lawm tur asin. Football kan thiam avanga thil dang hi hlamchhiah kan ni reng reng lo - football kan thiam angin thil dang kan thiam lo mai a ni zawk a, a football-a kha va puh daih chi a ni lo.

UPSC hnuaia exam-a central service-a luh tuma insawr bing Mizo ṭhalai ṭhahnem tak an awm a, an la taima tawk lo emaw, an zir dan a fuh lo emaw a ni mai. Football khel ngai reng reng lo, football-in a tihbuai loh, I League-a Mizo team an champion pawhin a tihbuai loh, central service nih tuma coaching-te kala inbuatsaih mi ṭhahnem tak an awm reng. Hengho an tlin zawh loh avang a, an tlin loh chhuanlama, "Football ringawt kan buaipui a..." lo tih hi chu a inzawm lem lo. Football, miss, youtube, fashion, volleyball, basketball etc buaipui ve miah loa civil service lama luh ngei tuma inzir bing hi mi ṭhahnem tak an awm mek a, an la taima tawk lo pawh a ni mai thei, tun hnaiah central service kan nei khat ta hle mai. Football kan thiam vanga lehkha thiam lo chu kan ni lo ang!

Zirna lama kala insawr bing, tun hmaa kan ban phak ngai loh India ram zirna in ṭha ber bera zir phak tawh, sports leh huau huauin a tihbuai miah loh ṭhalaite zingah ṭhahnem tak an awm. Hengho rual hi IAS kan tlin theih loh chhana mawhphurtute chu an ni zawk - footballer lam ni loin!

Ka sawi tum chu hei hi a ni - kawng khata kan hlawhchham chhan hi kawng khata kan hlawhtlin vang a ni lo a, khami kawnga kan kal dan a fuh loh vang a ni mai.

Tih tak takah chuan football lama kalho chuan thang an chhuah a, India rama a thlen tawp an thleng ve ṭan tawh. Indian Footballer of the Year kan kawl a, Young Player of the Year kan chher chhuak a, India rama 'Best Grassroots State' a puan hmasak ber kan ni a, state inelna leh club inelna kan tel tawhnaah kan champion vek tawh bawk. Football inelna hi UPSC examination ni ta se, Mizo footballer zingah IAS ṭhahnem tak kan nei tawh ngei ang. Tute emaw hlawhtlin theih loh avanga a hlawhtling tate lo va dem emaw, inzawm lo pui inzawmtir tuma lo va puh ṭâlh chi a ni lo ang.

Mizo chu 'fing' tak tak leh 'thlir zau' tak tak hi kan tam. "Zonet a ni em? Engvangin nge naupang exam dawnah Mizo Idol in chhuah? In ngaihtuah chiang lo lutuk," han ti thei mai tawk hi an awm nual mai. A TV chhuahtu lam va hau lo khan, patling a nih chuan a ina TV zawk kha off 'ngam' ta mai se a awlsam ni mai tur.

Mi programme siam turte, TV lama eizawngtute'n mipui tana hmuhnawm an zawnte hi, "Huau huau lamah kan kal nasa lutuk a...," kan han ti hmanhmawh zel a. Huau huau hi chhuanlama kan hmang dawn a nih chuan, thiamna lama kan tluk loh kumkhua tur, lehkhathiam leh thiamna sang danga khawvel chung en USA-te khu he khawvelah hian an 'huau huau' ber mai awm e.

Anni chuan an tih tur leh tih loh tur an hria. An en tur leh en loh tur an hria. TV off hun pawh an hria. Zir hun leh thawven hun an hria. Hetiang hre hrang lo leh hre hrang peih lo ṭhalai kan kawl nual avang hian, tute emaw hlawhtlin theih lohna avang hian a hlawhtling tate hi kan sawi hnawm lek lek mai.

Mizote hian football hi thiam ta miah lo mah ila, kan ṭhalaite'n tun ang leka lehkha an zir chuan IAS hi kan neih belh kher lo ang a, central service pawh kan pung chuang lo ang - zirna luhchilhtute hian football luhchilhtute angin India huap thlen tumin bei ve zawk rawh se!

Thil pakhat, “Idol, Icon, sports person miss etc angin kan media-te hian lehkhathiam leh officer tling tharte hi chawimawi ve se, ngaihsan tur dik kan inhrilha kan inkawhhmuh a ngai, heng mite hi tihlar a ngai,” te kan ti a, hman deuha ka ngaihdan a ni. Nimahsela ka ngaihtuah chiang a, khawi ramah mah hian zaithiam aiin lehkhathiam an lar ngai lo a, sports star aiin beurocrats an tilar ngai meuh lo - entertainer an nih hi pawm mai ila, lâr lamah khin phêt tum lo ila a hahdamthlak zawk awm e!

IAS loh chhan chu maw?

Ka inâng tui laklawh. Thil dang pakhat belh leh lawk teh ang. Central service-a kan tling tlem ta hi zirna lamah kan hnam a hniam ta duai tihna a ni kher lo a, zirna lamah kan tlachhe hle tih entirna a ni vek bik lo. Chhan dang a la awm - a langsar tak chu ‘Kan lehkhathiam ber berte hian central service nih hi an châk ber tawh kher lo’ tih hi a ni.

Zirna line dang ṭha tak tak a awm tawh a, sum hui luh theihna hna ṭha dang a awm belh zel a, hnathawh tur duhawm zawka ngaih pawh a pung zel.

Tunah chuan doctor hi kan bawh huam huam a, kan zirlai thluak ṭha ber berte hi an doctor zo mai dawn. Private-a an thawh pawhin an hlawh a ṭha a, an duhna ber hmunah an la awm thei zui. Sorkara an luh pawhin duat an hlawh a, IAS niha Bihar vela district kilkhawr tak DC vela bul ṭan aiin an thlang pawh a ni thei asin - Mizote hniam ta ngawih ngawiha ngaih tur a ni lo ang.

Central service hi tehna sang bera ngai lo zirlai an pung ve zel bawk. IIM vela luh theih hi zirlai tam takin central service-a luh aia an thlan chu a ni a, hengte hi chu a khat tawkin kan nei ve reng a nia. MBA thiam tak tak chin hi chuan khawi hmunah pawh hna an hmu a, Uttar Pradesh district langsar loa SP aṭanga bul ṭan tura IPS-a luh ai chuan, lehkhathiam tak nih tho chuan IIM-a zir theiha he lama kal hi a thlanawm zawk thei tlat a ni. Zirna leh eizawnna kawng dang hi sawi dawn ila, sawi tur a tam ta mai.

Chhan dang pakhat chu maw - kan state service-te sorkarin a duat 'over' a, central service nih a chakawm vak tawh bik lo. IAS chawl tawh pakhatin min hrilh chu, "Mizoram sorkara MCS senior lam nih hi Delhi vela IAS aiin an nihlawh zawk. Lirthei piah lamah engkim mai an dawng a, Delhi-a awma Central Secretariat-a awm phei chuan motor kawl chu sawi loh mahnia room hrang nei lo IAS hi a awm theih asin. Chutah MCS senior-te chu IAS an la ni chho thei tho a, state-ah an awm zui tlangpui a, anni tan vairama hnathawk tura central service thlan kha a chakawm chuang lo," a ti. A dik ang.

Kan state service hrang hrangte hi an hlawh a ṭha chang ni loin anmahni hamṭhatna tur zawng hian an invulh thiam em em a, heta tling thei kan ṭhalai tam takte hi UPSC hnuaia exam-a central service lam pawha tling zui leh thei tur an awm tih ka chiang; nimahsela state civil service hna hmuh hnua central service-a tlin tuma bei leh peih hi tun hma angin an tam tawh lo - an vang pharh tawh - Mizoramah an nuamsa em alawm.

- Lalnghinglova Hmar (Tetea)