KAN FATE HIAN MIN LA DEM NGEIIN KA RING THIN

Tun atanga kum 20 hi liam leh ta sela. Mizoram khawvel hi a la awm ve a nih ngai chuan in kan fate hian kan hripui do dan leh a behbawm hi rawn thlir let sela min nuihzat in dem ngawt in ka ring thin a ni. Khawvel hmasawnna chak takah hian thiamna sang tak hmang hian kan thuziak leh kan kan thusawi te hi dahthat a ni zel tawh a, paih bo a nih loh chuan in kum rei tak chhung chu a awm ve reng tawh dawn si a. Vawiin a kan thuziak te hi a nihna ang ang hian, kan thusawi te pawh fiah tak hian an la rawn chhiar in an la rawn ngaithla let thei dawn a. Heng ka thil sawi leh ziah te hi rawn hai chhuak in uluk takin an la rawn zir chiang ang a, zawhna an va ngah in min va han dem nasa dawn tak em.

A hmasa berah chuan in Kristian ram inti, sakhuaah pawh a tha ber vuan inti si hian eng kawngah mah hian kan hmasawn bikna leh kan ropui bikna sawi tur an hre dawn si lova. Chung hunah chuan kan sakhuana pawh a lo tlahniam viau tawh mai thei e. Kristian heti zat awm si, heti zat rawngbawltu awm inti si hian kan rama Krista hmel hmuh tur a awm loh si zia te hi an rawn hre ve ngei ang a, mak an ti in min va dem nasa dawn tak em. Kan hnam rinawm loh zia leh kan nun lem si zia te, eirukna leh sualna nasat zia te hi zep theih leh thup bo theih a ni dawn lova. Kan dah ang ang, kan ziak leh sawi ang ang hi an la rawn hre ve vek ang a, min dem ngawt in ka ring thin.

Tuna kan sorkar hrawn nawi zia te, laktlak loh zia te hi an rawn hai chhuah vek dawn a, min va nuih nasa dawn em. Chutih hunah chuan kawngchhawng leh leiverh chungchang te, cable car chungchang te hi an la chhiar ve ngei ang a (an siam hmel si loh a) min va ngaisang dawn lo tak em. Rua a puitling pawh Rs 35 a lei tur awm laia, a tiak hlim Rs 85 a kan lei tlat te hi mak an ti dawn lutuk a, eng tin nge kan chhan tak ang le? A pum let hnih aia a tiak a to tlat theih dan hi khawvel dan chuan kan in chhang fiah thei dawn lova. Min va nuih nasa in nep min vat ti dawn tak em. Zan khat thil thu a Secretary level a kai nawlh theih dan te hi min zawt vel ngei ang a. Eng tin nge kan chhan fel ang le? Dan leh dun mumal tak a awm ngai lo nge ni a tiin min zawt min zawt ngei ang a. Kan ne ne kual vel mai mai tawh mai a niang chu.

Hripui heti khawp a kan do dan te hi chhuang takin kan la sawi ve fo ang a. Khawtlang tanrualna te hi an chhiar ang a, ropui an ti ngawt ang. Mahse, zawhna an va ngah dawn si em. Hetih hun lai hian Mizoramah hian sorkar mumal a ding lo em ni? Engati nge Task Force te kutah engkim a awm deuh vek tih te? Retheih kan in tanpui dan te hi an hrethiam phak in ka ring chiah lova, Task Force chhuang taka kan sawi vul karah, Task Force chuan hri dan kawngah an hlawhtling em tiin min zawt ta se la, ka aw ngam kher ang em. Aw pawh lo tih tehreng ila, Task Force in hri an dan hnen si loh zia hi an chhiar ve thei vek dawn a. Min ngaihsan phah ka ring lem lo. Task Force titau te, thingtlang lam in Aizawl lama chawhmeh an pek te hi an chhiar ang a, mahse engati nge veng lian leh larah chuan an pek a tiin min zawt se la, kan ne ne kual mai mai zawng a ngai ngei ang le.

Hripui kan do kawngah RT-PCR pakhat chauh kan neih dan te, ICU khum kan neih tlem zia te, kan intih thih hnem zia leh result chiang lo tak kan nei tak vak vak leh RAgT testna lak tlak loh si zia te, chuti chunga kan la bansan duh loh dan zawng zawng hi chanchinbu ah te, Social media ah te hian a awm kumkhua tawh dawn si a. Awlsam takin an tlirlet ang a, mak an va ti dawn em. Mak ti a, meng phar awn awn chungin chuti chung chuan mipui in engtin mah in ti si lova maw? A van mak em pawh ti se, eng tin gne kan chhan ang, tuna kan awmsan a ni miau a. State khat ve deng duang si in va han ti mak em em, Africa ram dictator ang deuh tho ho enkawl ram ang mai in nih chu min ti se, eng tin nge kan chhan chuan ang. Ka nep em bawk a, kan ngawi rauh rauh tawh mai a niang chu.

He hripui in min nuai dan rapthlak si zia te, kan doctor leh sorkar thuneihtu ten lockdown an uar dan leh a sawt si loh zia te hi an han chhiar ang a, min khawngaih lovang a, min nuihzat ngawt ang. Hripui kan hmachhawn tirh lai hri vei kan awm hma a, kan hlauh dan te, a hnu lama kan hlauh leh tak si lo dan te, khawvela world record lockdown kan siam dan te, ei leh bara kan tawrh dan te zawng zawng hi an rawn en ang a, mak min ti ngawt in ka ring thin. He tih hun laia mi te hi kan nep zia leh kan nikhua loh si zia hi hahip in an sawi lo ang tih tunge sawi thei. Hri pui do laia sorkar in sum a ren laia chutih laia Health lam changtu ten in tha tak an sak te hi a lem nen lam an hmet chhuak ang a, mak an va ti nasa dawn em. Lunglei lam RT-PCR khawl politics zawng zawng hi an rawn hre ve ngei ang a. Min va han hmusit in min va han nuih nasa dawn em. Kan phu ve reng a ni e. A hun laiin awm ve ula, tih ngaihna in hre bik lo ang tih vel bak kan chhang thei lovang a, za lo deuh hian kan nui suk suk thin mahna le.

Tun atanga kum 20 a liam meuh chuan in tun hnai chho a thil thleng ngawt atang pawh hian zawhna an va ngah dawn tak em. A chang chuan ram changkang zawk leh nikhua zawk te nunphung en hian khawvel pakhat ah kan cheng ho ta lo emaw tih mai tur in kan khawvel hman hi a in ang lova, khawvel hmsawnna sang tak leh changkang tak karah kan ram kan nikhua lo fal lutuk te, sorkar lam nep lutuk te hi nakinah chuan kan fate hian min la nuih mak an la ti ngawt ang. Ngun takin han ngaihtuah ve la. Tuna kan sorkar hrawn leh min enkawl dan vel lem lutuk te, an mahni leh a chhungte tanghma an hai dan zawng zawng hi zep theih a ni dawn si lova. Chutih hunah chuan kan fate, thangthar te hian min va dem nasa in min va hmusit dawn tak em.

- John Chawngthu