RAgT test kit lo supply ve ta ang ni ila...

"RT-PCR khawl Mizorama pakhat chauh a awm rei poh leh RAgT Test Kit supply-tu a hausa tulh tulh dawn tihna a ni"

Kei ni ta ila, ka sumdawnna hlawk lutuk mai chu RT-PCR khawl a rawn awm belh vaih chuan nasa takin a kiam duak duak dawn a. High Court meuh pawhin RT-PCR khawl din tura tih hnuah a kawng kual zawnga ka kal kualpui theih chhung chuan nitin sum a rawn lut zel dawn a. Mipui lamin RT-PCR khawl ngenin sawi luih luih mahse, a theih chhung chu RAgT Test Kit hman zel turin ka ti ngei ang.

Nikumah MLA pakhatin chhim lam tan RT-PCR khawl a pe ngawt maite kha RAgT hmanga sumdawnna hlawk dawn chauh lai a nih vangin thil ṭha lutuk ni mahse, a theih chhung, ni lo kum khua pawn kha thil kha hman loh ka duh ang.

Formosa Com­pany-in Mizoram tana RT-PCR khawl kal thei pahnih a rawn pek a tum, ka zep ral ṭep dawn emaw tih laia MLA ban tawh, lak luh lehin a rawn sawi chhuak kha chu RAgT sumdawnna hlawkzia hretu tan chuan ngeiawm a tling.

Anni lamin min pek an ṭhulh leh ngat phei kha van vawra ke khaina tham tak a ni ngei ang.

Dik tak chuan Zoram khawtin mai RAgT hmang ngei mai hian Mass Testing han nei reng mai ila, Mizoram mipui hnar arh vek khawpin RAgT hmawlhte hawlh lut mah ila, a pawi ka ti teuh lo. An hawlh ngun poh leh RAgT test kit hmanga sumdawnna a hlawk tihna a ni ang.

He sumdawnna fuh lutuk mai, tuma chuh ve theih rual loh hi ka nei a nih ngat chuan Mizorama RT-PCR khawl lakluh belh theitu, sorkar hotute chu sum tam tak sengin an ka ka hup sak hmiah hmiah bawk ang.

Mipuiten RT-PCR khawl lo ngen luih luihin, eptuten mipui fuihpawrh viau mahse, RT-PCR khawl chu a kawng kual thei ang berin ka phurh kual tir ang a, kei ka hausak chuan mipui lungawi lote chu lo au mai mai mahse engnge pawi?

RAgT hmanga sum ka hai luh a, ka hausak tulh tulh chuan mipui bengchheng chu lo in au puar mai mai ang hmiang, engnge pawi?

A theih chhung chu RAgT ka supply dawn tho tho... tiin duhthu ka sam ta a nih hi.

- Maro Colneya, Bungsut