Fak phu fak hi i hreh lovang u

Tun MNF Ministry chhung hian Minister fak tur hi an tam vak lo. Minister pathum te hi chu fak tlak ṭhiau an ni a, an fak phu ang hu hian media lamah hian fakna aw ka hi kan chhuah duh lova, insawiselna social media khawvela kan cheng chung hian fak an phu avangin tawi te tein i han fak teh ang.

1. Pu C Lalrinsanga hi Minister thawm na tak a ni lova, mahse tih takzeta hnathawk a ni tih a hmuh theih. A Department chan hi an vanduai a, Agriculture Minister chu pawisa tamna ni awm tak a nih nen pawisa nei mang lovin, Budget-a pawisa tlem awm chhun pawh thawktu hlawh deuh vek ni chungin hmasawnna a hmuh theih a ni. Publicity lam hi a thiam vak lova, intih lar a tum ve lem lova, chuti chung chuan a takin a thawk ṭha hle a ni.

2. Pu Robert Ro­mawia hi Minister thawm na tak a nih ang thovin Minister chak tak a ni. "CM fachuam a ni, CM nen an inkawp nghet lutuka Cabinet tam tak aiin a tlatlum," tih vel mai maia sawisel hi a ṭul lo. CM duhsak hlawh tur khawpin a fingin a taima ve a, a hnathawh hi a ṭha tihna a ni mai. Ṭhenkhat chuan 'CM duhsakna dawng lo se a thawk ṭha bik lovang,' an ti a, duhsak tur khawpin a thawk ṭha tihna zawk a ni. Fak phu chu fak mai tur a ni.

3. Pu Lalrinliana (Rintea) hi Minister taima leh hnathawk ṭha ber pakhat a ni leh a, Pu Rintea hian a hna chanpual hi a hneh hle a ni. Sawiseltute chuan, "Lockdown laiin kawng khar a ni lova, buhfai, gas leh petrol a tlang loh hi central hlauh ber a nih vang a ni. Lockdown laia kan buai lo kha Mizorama Minister chak vang a ni lo," tiin Pu Rintea hnathawh ṭhat hi sawi nep an tum a, mahsela kha chen Supply Minister kan lo nei tawh a, tuna Pu Rintea anga chanpual hlen ṭha, chatlak lova buhfai leh gas ti thleng thei Minister hi kan nei tawh ngai reng em?

I fak mai ang u.

- C Lalsiamliana