Mipui leh police inkar a ṭhat a ṭul

Buaina emaw, po­litical party leh NGO ten kawng han zawh hlek se, an kawng zawh chhan chu thu­hran, a tawpah chuan buaina chhuak se mipui leh police kan inhmachhawn nghal hru zel a. Eng thilah pawh nise, police lam chet chhiatna awm zeuh chu social media hrang hrangah mawi lo tak taka pholan a ni nghal zel te hi a nalh lo khawp mai.

Hmanni deuh khan Aizawl SP Pu C Lalzahngoa chuan SP a nih thar denchhen pah ni fawmin media-te lengah a sawm a. Media leh police-te thawhhona ṭha chu vawn nun pui zel turin a sawm rualin, engemaw hleka thil finfiah lem lo leh police-te thil chhui mek lai ti sukuk thei zawnga news report lo turin a ngen a, a ngenna hi thil pawimawh tak a ni a, a dik viau bawk.

Kan ramah hian thil rapthlak tak a thleng a, eng thil pawh thleng se social media-ah kan thawn darh a, Zoram dung leh vang hian kan hre nghal vek zel a ni ta ber mai. Police-in an la finfiah loh rinhlelh thilah mi an man a, zeldin thubawlin an mi man leh a kaihhnawih awihawm em ema social media lamah nasa takin a lo lang nghal chuai chuai zel a. Media tak tak, print leh electronic lamah lang mang si loin mipui tih chiai theihna khawp kan thehdarh ta ṭhin hi a pawi ngawt mai.

Tin, inrawk emaw, pawngsual chung­changah police-in rinhlelh an man a, a veng neitu lamin an hmel an hmuh reng ṭhin pawh a hmel hmuh leh ngei chakin police station-ah kan han phungkhawm a. Police lam kuta a awm tawh chuan eng anga mi sual pawh ni se an mi man sahimna kha an ven tur a ni tawh si a.

Mipui pung­khawmin a hmel hmuh duha police station kan hual titih tawh chuan police tan chuan kha rinhlelh an man kha a sahim nan jail-ah magistrate phalna-in dah luh rum rum a ngai ta ṭhin a ni.

Jail-a khung a nih tawh chuan kha pawng­sualtu emaw, misual emaw nia puh kha thil sual titu a ni tak tak em tih finfiah hman loin zan khat jail-a a riah tawh chuan evidence awm thei ang pawh a chingpen zo ta ṭhin a ni. Hetianga mipui chetlak hi a finthlak ber lo tih mipui lamin kan hriat nawn fo a pawi­mawh ngawt mai.

Mipui mimir hian police lam hi kan ngam mah mah ni pawhin a lang. Pawl ang emaw in engemaw ngiata nawrhna huaihawt reng reng hian police hmingchhiatna zawng hrim hrim pawh kan awm ta nuk mai. Police chetsual palhna thlalak theh darh nghal chiam chiam ching pawh an awm tawh ṭhin a, hetia mi thlalak thehdarh hi dan kalh a ni tih pawh kan hriat fo a ṭha khawp mai.

Mitin hian dikna te, zahawmna te kan nei ṭheuh a, khua leh tui te'n kan chan ang hi sorkar hnathawk leh a bik takin police lam pawhin an nei ve vek tih hi hriat a ṭha hle.

- Lal Rinmawia