I BEIDAWNG LO VANG U

Upain “Hlau suh u” an tih tawh hi chuan hlauhawm a awm a ni ṭhin, an ti a, chutiang deuh chuan, “I beidawng lo vang u” han tih pawh hian thil beidawn thlak tak a awm a ang hle mai. Kan hriat angin kan Hripui, (Covid-19) bawk hi maw le. Hei hian kaihhnawih a ngah hle lehnghal a.

Sorkar, sum, medical team-te a kaihhawiha hri endikna khawl, tlawmngai pawl, chhungkaw eirelna lam a kaihhnawih a. Mipui leh kohhran thlengin min kaihhnawih ta vek a. Heng lo pawh hi sawi tur tam tak a la awm ang. Mang a an tawh chuan dem tur kan zawng a, sawi ngai kan sawi kan sawi mai a nih hi. He hri hi chuan kaihhnawih a ngah a nih hi.

Sorkar lakah hian kan beidawng a ni maithei, post ka hmuh pakhatah chuan, Minister ei leh bar min petu hian min pe zel se la. CM hi chu lo CM ve mai mai rawh se, a rawn ti a, a beidawng awm mang e aw, ka ti rilru a. Opposition-hovin thurawn an pekte chu tur angin an run emaw tih mai tur a ni a. Pawisa tih loh chu an thilpek lah an dawng ṭha duh lo. Chet chhiatna sawi duh si lovin an thiltih ṭha lai hlir an sawi bawk si a, kan ti a. Kan bei a va dawn hmel ve. A ni tak a, hri vei lah state dang an hniam rawih rawih laiin kan pung tual tual a. September thla chhung ngawt pawh hian ni 7 niin ni khata hmuh chhuah tam ber ni a thleng a, mi 1468 (11.92%), ni 14 ah a tam ber ni thleng lehin mi 1502, (16.39%), ni 21 ah 1731, (18.53%), ni 28 ah a san ber ni thleng lehin mi 1850 (19.44%) Hemi ni hi chuan enkawl lai (active case) tam ber ni niin mi 15847 lai an awm.

Ni 27 zing dar 7 report-ah mitthi 3 leh tlai dar 5.00 report-ah 6 an awm bawk. Sept. thla tawp ni 30 zing dar 7.00 report-ah pawh kai thar 1741 (18.44%) kan la ni ta fo mai. July thla chhunga hri kai 17,989, Aug.-21,056, Sept- 34,542. Health Minister pawhin result hniam hriat a duh ngei ang a, mipui pawhin hriat kan va duh tawh tak em!

A beidawng zawnga thlir chuan, eng hi nge kan nghah chhuah ang? tih mai awl tak a ni. Mahse i beidang lo vang u. Sorkarna chelh mektute pawhin an ko an thlak thut thei a, a nih loh pawhin thawktute thawh rimna Pathianin mal a sawm hun a thleng ang. A nih loh vek pawhin tu emaw Pathianin a hmang mai ang. Kan lawmnaah a la chang thei a nia. Abrahama pawh, “Beiseina awm a awm loh pawhin ani chuan beisei takin a ring a, chi tam takte pa a lo nih theih nan” tih a awm a. (Rom 4:18) Mi bei­dawng hi khawvela mi hlauhawm an ni ṭhin. Keini zawng rinna nei pawl a mi kan nih hi i hre reng ang u.

Sum lam a kaihhnawih nasa hle mai. Budget a sum awmsa hmang duh lovin, mi inphalte thawh khawm sa chauhin hri do kan tum, ti pawl an awm bawk a, a dikna chen a awm maithei. Mi thilphalte inpekna hi a ropui reng a ni. Hei pawh hi kan Pathian hnathawh a ni. Henghi pe lo ta se, a pulhin kan pul thei ang tih tur a ni tawh reng a ni.

Hri do nana budget sum hmang phal lovin, anmahni leh an mi duhsak zawngte vur nan sum an ren leh si lo, an ti a. Hei hi dik pawh lo ni tehreng se, an tih tihin an ti a nih pawhin, keini chu i beidang lo vang u, chhel takin nghak ila, Chhelna chuan hriat fiahna a siam a, hriat fiahna chuan beiseina a siam a (Rom 5:4). Pathian zarah ni tin ei tur bar tur nghei lovin kan la awm hram hram hi. Hun ṭha a her chhuak mai ang.

Heti zawngte hian ngaih­tuahna hmang ve ṭhin ila. Sorkar (medical team) lam hi chuan tih tur chu an ti tha hle a ni lawm ni? Damdawi in lama thawk lah an hah em em. Hridanna (vaccine) lah 82% aia tam mi pe tawh a, containment zone ni se an luhchilh chat chat a, hri kai an hlau lo a ni bik lo. Zanah pawh veng hla tak takah, ruah sur hnuaiah, nupui fanau/ pasal fanaute kalsanin an thawk a. Heti zatin hri danna la tawh siin khawi a mi zozaiin nge maw la kai tih mai awl tak a ni. Thingtlang lam lah an la pung ve fo tho bawk.

Thawktuten thawk rim si, Vaccine la ṭha bawk si, mass testing ti ṭha bawk si, state dangte ngaihtuaha mipui pawhin thu awih bawk si, engvangin nge maw hri kai kan la pun zel chhan ber ni ang le? Hri kai kan la pun zel chhan ber hi chu Pathian hmaah kan la tlawm tawk loh vang a ni lo’ng maw?

Kan ei leh bar thlengin min nghawng a. Kum dang­ah ṭanpui ngai bik ṭhin loten tunah mi vehbur khawnsa ṭanpuina pek an ngai ta, a tha nat thlak hle mai. In luahman awltir ngai bik lo kha in luah man awltir an ngai ta. Tunhmaa anhnah in thartem leh tuna inkhung rei vanga anhnah inpek chu a boruak a dang ta. Indem zawnga kan kaltir chuan dem tur an tam ta hle mai. Inkhawmin Biak inah ngei Pathian au ila, hriin min kiansan rang zawk ang, ti kan awm a. Biak ina inkhawm chu hri inkaina awlsam ber a ni, ti kan awm bawk a, rin thu vek a ni a, a dik ber kan hre lo.

Mahse maw, Luka 2:36- ah, hmeithai Anni kum za chuang tawh tur, Pathian Biak buk chhuahsan lo va, achhun azana chaw ngheia Pathian be ṭhin (Lal Isua nghak tlattu) chuan Lal Isua a hmu ta. Chutiang chuan tunah hian kan hriat loha Pathian be ṭhin, a chhun azana Pathian pawl ṭhin tam tak an awm a. Heng miten Pathian an auhna azarah kan rama hri pawhin min la kiansan ngei ang.

Chu chauh ni lovin, kan mi selte leh a seltuten rilru hmun khat pua Pathian lam kan hawi hun pawh a thleng ang. Chuvangin, i beidawng lo vang u.

- V.L.Hruaia, Tuikual South