LABORATORY BUILDING PAHNIHNA TUR?
Lungleia Rt-PCR Laboratory building tura June 17, 2021-ni aṭanga a hmun laih ṭan chu vawiinah hei hi kan thlen chin a ni.
June 11, 2021ah khan Rt-PCR For Chhimbial te chuan High Court-ah PIL an thehlut a, chumi hnu lawk June 17, 2021 ah kan Health Minister berin phur takin Tweeter-ah a tarlang nain hmalakna erawh a chak hleithei lo a, a chang leh sorkar lamin Lunglei lam hian tun dinhmunah Rt-PCR hi an mamawhna a awm rih lo an ti bawk a.
High Court lamin Mizoram sorkar chu June 23, 2021 hmaa Rt-PCR Laboratory building tana hmalak mekna report pe turin hriattirna a lo pe tawh a, chawpchilh taka drawing pawh buatsaih a niin contractor pawh hmanhmawh taka pawh chawp nia sawi a ni.
He building sak mek hi chhawng 5 thlenga sak tur a niin a bul ṭan aṭanga thla thum ral hnu, October ni 1 khan a ban tur phun tura la ruahman mek a ni.
Thawnthu sei tak sawi tur a awm a, tunah High Court thupek angin Tourist Lodge chu temporary anga Laboratory tura buatsaih leh mek a ni a, chutih laiin Lunglei District-ah hian Covid vangin mi 17 in nunna an chan tawhin mi 6950 laite chu an lo positive tawhin tun dinhmunah hian active case 966 an awm mek bawk a ni.
Building tura buaipui mek hi engtika zawh tur nge nia engtika luah theih nge a nih ang tih ngaihtuah mek a nih laiin kan Health Minister chuan September 29, 2021-niah khan Mizoram chhunga District zawng zawngah Rt-PCR Laboratory din tura sorkarin hma a lak mek thu a sawi leh a ni. Hei hi Tuirial By Election neih dawn vanga sawi a ni mai em? tih zawhna lian tak a awm thei ta a ni.
Kan hriat ṭheuh angin ZMC ah chiah Rt-PCR Laboratory hi neih a ni a, zoram hmun tin aṭanga pan khawm a niin kawng laka nunna chan te pawh sawi tur an awm zauh zauh nghe nghe a. District capital tina Laboratory neih theih hun hi nghahlelhawm tak a ni. ZMC baka a pahnihna tura ngaih ber Lungleiah hian tun hi a thlen chin a la nih rih si avangin District danga Laboratory din tur anga sawi hi thil huphurhawm tak a ni thei a, a nih loh vek chuan a awlsam dan a lo awm leh thut pawh a ni mahna le...
- Mahmuaka Chhakchhuak