KA NGAWI THEI LO (Lusun in aṭangin)
Kan khuaah mi fel tak, nat lawk nei miah lovin a thi thut mai a. A chhungte chauh lo pawh min ṭhawng nasa hlawm ngei mai.
Vuinaah chuan le...kan kalkhawm ta, hri kai leh vei nei miau hek lo i le, tumah kan inhlau lo. Hrehawm ta ber mai chu darkar engemaw zat chhung chu a thia chhungte ṭap rawih rawih chu ngawi rengin kan ngaithla tluan parh mai chu a ni, tih theih dang kan nei si lo!!
Hmanah chuan thihna leh nakin hun hla te, vanram ngaih hlate sain zaiin kan inawi a, lusunna karah vanram kan in thlirpui a, tuartute tan leh mipui tan pawh a kalh a kim thlap mai. Tunah erawh lusunna hi a va lungrun zual tak êm!
Hetiang kan nih chhan hi Covid 19 do nana sorkar order vang a ni. Thingtlang kilkhawr, thil dang zawng kan tihho ngamnaah zâi an han khap vek mai hi zawng roreltute hi ka dem lo thei lo a ni.
An thu chhuak reng reng lah chu sentence khat bawhchhiat pawh kan Task Force lamten an hreh si. Pathian thil phût pawhin SOP phal loh thil a nih chuan mi mâwl thuhla pawh a tluk pha ta lo ve!
Zai, hlasak hi Pathian thil leh khawvel thilah pawh hmanraw pawimawh tak a ni a, Kristiante tan phei chuan Pathian thil phût pakhat a ni ve. Hlauh kan nei a nih pawhin mask vuah chunga ṭawng thiamte hi mask vuah chung pawhin kan zai thei. A engtizawng pawha kan fakna aw bawm min kharsak hmiah mai hi zawng khita mi khian engtin tak ngai ang maw le?
Hri awm miah lohna, hmaichhana kan in titi pui luih luih ngamna, dâr insi khupa kan ṭhut ngamnaah hian zâi avanga hri a darh ring tlatte hian in va han dawn chiang lo tak êm! Hri hi inkâi tur ni ila chuan zai lo mah ila kan kai lohna tur chhan pakhatmah a awm lo!
Roreltute, ka ngen a che u. Khawtin hian kan dinhmun ṭheuh chu kan inhre chiang viau mai. Kan khaw mil zela kan inrelbawl min rawn phalsak tawh teh u. Kan VC te, Task Force te hian an rel thiam dawn chiang.
Khawpui aṭangin min control in tum a, hri kai leh kai lo khua zawng zawng min hrûtrual pawp zel mai hi zawng rorelna fing a ni thei mawlh lo. In dawhkan aṭanga kan kristian nun mawi leh Mizo nun mawi in rûnna hi titawp tawh teh u.
- Mama pa