P.W.D Engineers vs LṬP

Lunglei Ṭhalai Pawl (LṬP) leh Lunglei P.W.D Superin­tending Engineer (SE) inkara thil to thleng chungchangah ngaihdan leh sawi dan hrang hrang chanchinbuah leh khaw­lai titiah a awm thei awm e. Thil dik ber leh sawi dan dik ber pawh mipui tan hriat a har ang. Hetiang thilah hian Mizo­ram chu kan zalenin, inhriat­thiamna thui tak kan nei zel a, inngaihhnathiam leh inngaih­dam mai pawh kan harsat lo.

PWD-a SE hna ka thawh laiin, Delhi-a kan kal ṭumin Mizorama PWD Chief Engi­neer lo ni tawh B.G.Karna chu pu hluite tiin, a office-ah kan tlawh a. Er. Robula (RIP) leh Pu R. Sangkhuma, Class-I contractor-te nen kan ni. B.G. Kama chuan, "Min rawn tlawh a, a va lawmawm em, hna inspect-in ka kal dawn a, lo kal ve hlauh rawh u, heng laia kan hna thawh dante pawh in hmuh ve a ṭha alawm" a ti a. Tichuan, kan zui ve ta a. Kan hna en chu R.C.C Building construction a ni a. An hnathawhna area chu rangvain an hung kual vek a, gate kalh theihin an siam a.

Keini chuan, "Engatinge hetianga in hung bur mai" kan ti a. Min chhanna chu, "Hna hi tute emaw inti hotu deuh deuhten rawn en a, sawisel tum an tam a, contractor leh hnathawktute tan a buaithlakin hna a ti khaihlak a. Chuvangin, PWD Engineer-te leh hotute lo chu tumah en leh lo inrawlh ve kan phal lo a ni" a ti. Mizoramah erawh chuan kan zalenin kan inhrethiam thei khawp mai a. Sorkar hna, contract etc. te hi inhung khip khekin kan thawk lova, hnathawh laiin a duh duhin kan tlawh a, kan ngaihdan leh ṭha kan tih dan te, sawisel duh te kan sawi ve mai zel a, kan inhrethiam zel mai. Fur laia PWD kawng nal leh diaka buh lo phun duh mai tawkte kan awm zel a. PWD kawng phah lo kar khawk mawlh mawlhte pawh kan awm zel a. Hetiang titute hi thuneihna nei lo leh engineer thiamna nei lote an ni duh viau lehnghal.

Hetiang zela kan kal dawn a nih chuan, ram danga an tih angin contract hna, etc,. thawh laite hi, a theih phawt chuan, ram danga an tih angin, midang luh leh en ve theih lova inhung khip khep a ṭul ang. A nihna takah chuan eng hna pawh lo thawk nise, a ṭha lo lai leh a dik lo kan hria a, kan hmu a nih chuan, hotu lal zawk leh action la theitu hnenah report pek vat a, endik hna leh siamṭhat hna an kuta dah thiam chu a kawng leh tih dan tur niawm tak a ni.

PWD-a SE hna ka thawh laiin, khaw pakhata Damdawi in quarters sak lai chu, a chhuat cement concrete phah a ṭha lo tiin khawtlang hotuten an rawn report a. A hmunah kalin ka endik nghal a. Chhuat cement concrete chhun mai niawm taka lang chu, thirtiangin ka han chhun khawk a. Cement concrete reng reng a lo awm lova. Chhuat lei chu lo chhu belin cement leh balu-in an lo zut mam mai mai a lo ni a. Ka siam ṭhat tir leh vek a. PWD hotute hna enkawltute pawh na taka zilh leh warning pek an ni. Khawtlang hotu leh hruaitute chuan direct action lain PWD hotute leh hna viltute an bei ve vak lo. Thuneitu leh action la theitu kutah report an pe mai a ni.

Lunglei kawng thil thlengah pawh hian, LṬP-te hian Chief Engineer, PWD hnenah report ta se. Chief Engineer, PWD hian a ṭul angin action la mai se, a kal hmang tur niawm tak a ni. Chutichuan, Lunglei Ṭhalai Pawl leh PWD engineers zawng zawng a wholesale-a in epa badge dum inbel khum ser ṭha lo hnutchhiah hi a pawi hle a ni. Lunglei Ṭhalai Pawl-in hna ṭha leh tlo an duhna hi a ngaihsan awm rualin, direct action-a an che mai hi chu a fuh lo deuhin a lang.

Mizorama kawng siam chungchangah PWD a ni emaw BRTF-in a ni emaw kan hriat ve ṭul pakhat a awm. Mizorama kan lung leh balu-te hi a quality a sang lo hle. Chief Engineer ka nih laiin, Central Road Research Institute, Delhi-ah kalh leng a. Chuta min lo hrilh chu, North Eastern State zingah Mizoram State-a lung leh balu quality-te chu kawng siam nan a hniam hle a. Indian Road Congress Specification anga road construction siam chuan a tlo lo ang tiin an sawi a. Chubakah, ruahtui inngah bawk si an ti.

Mizoram lung, state dang aia a sanna ve erawh chu Bitumen hi Mizoram lungah chuan a bet ṭhain a chiah hneh zawk tih a ni. Zorama, Black-top road kan han siam ve te hi a nih dan tur dik taka Road Roller-a chil chuan kan lung te hian a dawl lova, tam tak a keh sawm hman a ni. Tin, kan lung a no bakah kan lei pawh hi a nghet lo. Lei min leh lei tlahniam kan ngah em em a. Kawng chhuat te hi a khuar hmain a tlahniam thuai thuai a, furah tui a tling leh a, chu chuan, kawng a chiah chhe thuai thuai a ni. Chutihlaiin, India ram puma hman tur Road Specification, Indian Roads Congress siam chu kan zawm a ngai bawk si a ni. IRC specifications chu quality ṭha materials base-a siam an ni.

Hma kan sawnin Depart­ment pawh ṭhangin an chang­tlung zel ang a, laboratory ṭha zawkte neiin research-te beiin kan rama lung leh balu, lei thlengin, tlo zawk leh ṭha zawka siam dan, kan engineer-ten la hmuchhuak turah i ngai ang u.

- Er. K Thangzuala, Comm-cum-Secy, PWD (Rtd)