ATM-a harsatna tawkte tan

ATM avanga ka chet buaizia thu kha, FB group hrang hrang a ka post aṭang khan, comment lamah mi tam takin harsatna an lo tawk ve tih te, ṭhenkhat phei chu pawisa hmu let lo, an pawisa hmuh let loh belh khawm pawh, Rs 1,00,000/ vel lai a tling hman. Chuvangin ka thil tawn ka rawn share ve a ni.

ATM ah pawisa lak chhuah ka tum a, pawisa a rawn her chhuah hma chiahin current a tawp a, ATM hi back up awm lo a lo ni a, danah chuan 24hrs back up awm tur chu a ni. He thil hi bank lam hotute chuan, a khawl enkawltu hi mi dang an ni a, Gwahati lam mi daih niin an sawi, dik tak maw? ATM a chhiat hian a tuk lawkah a lo ṭha ve leh mai ṭhin si a, hriatthiam chu a har deuh. ATM back up dah thuai thuai theih nise a duhawm khawp mai.

Chutichuan, ka pawisa chu lak chhuah angin message a lo thleng si a, current awm leh kan nghak ta ngat ngat mai a, hetiang chu kan account-ah a lo let leh mai ṭhin alawm, te an ti a. Khami ni ber kher khan, whatsapp lamah pawisa her chhuak kalsan avanga a hnua miten, a neitu hnena anmahni hnena lam tura an hrilhna ka hmu a. Darkar khat hnu velah current a lo awm ta, ka lut vat a, computer a chhe zui, a thim ta hmak mai, beidawngin ka chhuak leh a. A hnuah a eng a, a thi leh ṭhin a, hawsan tumin kan chhuahsan leh ta. A lo ṭhat leh thut takin tiin ka va kir leh a, nu pakhat a lo awm a, ani chuan a la chhuak thei. Ka pi, ka pawisa inher chhuah hmain current a tawp a, i lak chhuah rualin emaw ka pawisa a lo chhuak tel lo maw, tiin ka zawt a, a pawisa chhu a chhiar nuap nuap a, a tel lo a nih hi, a ti bawk si.

A tukah ka account neihna Bank-ah ka complaint a, a lo let ve leh mai ang an ti a, kar khat ka nghak a, ka va ngaihven leh chuan, bank manager chuan a mail dawn min han check pui a, he thu hi kan dawng ta tlat mai, transaction is completed, so the amount cannot be refunded. Ka pawisa chu lo kir tawh lo tur ang chhanna ka dawn tak siah chuan, ka mangangin social media-ah min pui thei an awm takin tiin ka au chhuahpui a, thurawn ṭha ka dawng tam lo, harsatna tawk vete thu a tam mah zawk.

Ka ṭhiante hnen aṭanga thurawn ka dawn chu-
1. Branch manager kal tlangin, ATM access emaw CCTV footage chhui turin FIR theh lut rawh u.

2. ATM lam hotute, SBI main branch-ah va hmu rawh.

Thurawn pahnihna zawk hi ka bawhzui a, computer aṭangin a check ta. "Ka pu, transaction a success hlei nem" a ti ta hlauh mai. Ka pawisa chu a inher chhuak lo tih a chiang ta. Ka account neihna branch aṭang chuan complaint theih lut leh turin min rawn a. Complaint chu chipchiar zawkin kan theh lut leh ta. Ka pawisa hloh nia ka ngaih chu a lo let ve leh mai turah ka ngai.

Bank lam thawk­tute hian min puih an inhuam em em a, thil kal sual palh a awm thei, mahse kan pawisa hi chuti ngawta bo tur a ni lo. A chhui chhuah dan a awm zel tur a ni. Hun rei lutuk ami a nih loh chuan, in chhui chhuak thei a nia. Bank thawktuten puih che an inhuam e.

- Lalrinliana Colney