Zu khap bur hi a lem sawt hle a ni

Tunlai hian Mizo­ramah zu khap burna chu hman a la ni chhunzawm zel a, kei zu in ngai lo hian Congress party kha zu an zawrh ngam law law avangin ka ngaisang leh hnuhnawh tih ka sawi hmasa duh.

Zu hi engtik lai mah hian ka support ngai dawn lova, mahse zu khap bur inti si a, zu khar rem chuang si lova dan bawhchhiaa zu zuar ngam leh zu zuar hreh lote an hausak thur thurna rama kan ram chhuahtute hi ka dem zawk mauh mai a ni.

Zu zawrh kha a ṭha hranpa miah lova, zu hi awm lo se a ṭha ber, mahse an tih rêm theih loh avangin an zuar ta law law zawk a, chu mi hmang chuan zu chhiah kha sorkar lamah a lut ruih ruih a, chu pawisa chu ṭangkaiah hmang in Congress an tlak hnu thlengin pawisa kan neih theih phah tih kan hmuh kha a ni.

Zu chhiah it loh tur kan ti kan ti tak nangin zu chhiah aṭanga pawisa tling khawm huitu Central sorkar hnen­ah pawisa kan dil reng thova, hei hi chu Khehpuam do inti Khehpuam khehtute thawhlawm lawm taka lo pawm leh nen a danglam lo hle.

Zu khap bur chu Politics nen an han kal kawp tir ta a, MNF chuan zu zawrh ve loh an intiam a, Kohhranin a support bur bawk nen Congress an tla a. Zu dawr an khar a, sorkar thar chuan kil tinah zu a dap ta chum chum a, zu a rem tawh dawn nia miin an ngaih laiin Covid-19 avanga Total Lockdown a motor a kal theih miah loh lai pawh khan Aizawlah hian a duh tan zu lei tur a awm reng! A sen chi leh Local hi pawi­sa nei tan chuan English ṭawnga "Just a phone call away" an tih ang tak tak hian vawi khat biak zeuhva dah thei hi an tam.

Hei vang hian zu khap hi a lem ka ti. Khap a nih chuan dan lova zu zawrh hi ti tawp se, zu hmun­pui tih tur khua tawp tawp awmna ram kan la ni si a, lemchang mai mai kan ang a ni.

- Zosangliana