2018 MLA election atana rawtna (Part 1)

Kan hma lawka ram hruaitu MLA inthlan lo awm tur hian ngaihven leh buaipui a hlawh a, a pawimawh ngiang reng a. Kum 30 chuang State Sawrkar neia ralmuang tak hnuaia kan ram hruaitute min lo hruai dan han thlir hian, Zoram hian hmangaihtu, hruaitu ṭha a mamawh tih chu mi pangngai chin chuan hai rual a ni lo.

Kohhran lian ber Synod pawhin in­thlanna ralmuang leh felfai nei tura MPF hmanga hma a lakna chu a hlawhtling tih hrereng mahse ram hmangaihtu ram hruaitu thlanchhuah ṭul tiin sum tam tak sengin Zoram dung leh vangah beihpui a thlak mek a nih hi.

Rorelna dik leh ṭha nei tur chuan hruaitu ṭha leh chak dikna ngaina mi kan neih a pawimawh hmasa ber ang. India ram puma BJP heti taka an chak chhan chu Prime Minister atan Pu Modi-a hmathehah hmanga inthlanna an hmachhawn vang a ni. Bihar State

ṭawp leh hnufual tak, inthlan apianga buaina avanga thihna awm ziah ṭhin chu Nitish Kumar hmatheha neiin then fai a ni a, state hmasawn chak leh felfai a lo ni thei ta a ni. North East State hnufual leh hel tamna Tripura chu CPI-M in Manik Sankara hmatheha hmangin kum 20 chuang ro an rel a, tunah chuan khi-ah khi-ah an ni tawh.

Zoram pawh hian mi chak, dik leh huaisen leh hmang­chang hria hruaitu kan mamawh. Chutiang mi dap chhuak a hma la tura mipuite beisei leh innghahna chu ZPM (Zoram People Movement) hi an ni. An chet vat vat pawh a ngai ang, anmahni huang chhungah hian mi fel leh mi ṭha tak tak te awm bawk mahsela member engemaw zat neia Party lo vahvaih puitute an ni a, Party Unit System hmanga hawlh buaitu tur mipuite avang hian rorelna a lai thei dawn lova neautral tam tak tan innghah ngam a harsa ang.

Sakhaw rawngkai Rev leh Upa te pawh an awm, mahse koh­hran hruaitu MLA kan lo neih tawh dan thlirin kohhran ho te kan lungrual tlang thei lo ang. Mi dik leh huaisen, thulai la thei leh hawi zau zoram siamṭhat duhtute tan inngah ngamna mihring an vawrh chhuah a ṭul ang.

Zoram hian chu­tiang mi a neih te zinga pakhat chu Dr. HT. Sangliana hi a ni. Hetiang mi hmingṭha leh huaisen hmangchang hria Pathian tih mi hi kan ram tluchhe mek tung ding leh turin Chief Minister ni tura koh chhuah ni se. Pu Lalduhawma te, Pu Lalhmangaiha te, Pu Dr. Lallungmuana te, Commissioner Lal­kiamlova te, Pu Lal­fakzuala te, Pu Van­lalruata PRISM Presi­dent leh Pu Lal­manzuala te ho hi Cabinet Minister atan lo pen chhuak sela.

ZPM chhungkaw zinga mi dang ṭha tak tak te bakah Pu HV Lalringa te, Pu PL Liandinga te, Pu HC Vanlalruata te hi sawm chhuakin 2018 MLA inthlan hi thlur thum ZPM aṭangin Pu HT Sangliana, INC aṭangin Pu Lal Thanhawla, MNF aṭangin Pu Zo­ramthanga te target-ah hmangin mipuiten kan duh ber vote ila, Zoram hawiher hi a danglam ngei ang.

- PC Muankima, Saitual