Dik lo taka sum la lutte rawn in vai vung suh se

Tun hnaiah Aizawl dai mai ah rangkachak tawlhruk cheng vbc 9 chuang man Customs mite’n an man tih kan hria a, Mizoram hmun hrang hrangah hian a khat tawkin dan loa thil tawlhruk man a nih thu kan hre ta fo mai.

April 24 khan Vanglaini chuan Editorial ah hetianga dan loa thil tih hi na takin a rawn dem a, kha Editorial kha a chhiar te chuan ṭha kan tiin dik kan ti khawp ang. Editorial-in a sawi ang hian dan loa thil tawlhru ṭhin ‘Smuggler’ te hi an zak lem lo emaw tih mai turin an khawsa zui a, mipui nawlpui pawhin ruihhlo a nih loh chuan an en liam a, chutiah rual chuan dan loa thil tawlhruk chu rangkachak a ni emaw, ruihhlo a ni emaw, ralthuam tawlhru emaw pawh ni se mipuiin an en liam mai mai tur a ni lo a tih bakah mipuiin pawhin dan loa thil tih chingte leh ruihhlo hmanga sum siam chingte an hawl ngam tur a ni a, khawtlangah heng mite hi dan pawnlan thiam a ngai a tih hi a dik hle mai a, hetianga dik lo taka sum la luta inti milian ṭhin te kan hnawl ngam loh avang hian kan ram hian hmasawn lam aiin hnungtawlh lam a pan mek a ni.

Editorial tlangkawmnaah “Mizoram hi smuggler te tana hmun him, sum an siam hnua an duha an inti milenna hmunah kan chhuah palh ang tih a hlauhawm,” a ti hi sorkar hian hmuh hmaih suh se.

Mizorama thil tihpui ṭhenkhat pawh tun hnaiah hian dan lova rangkachak leh ruihhlo vawrh thla ṭhin te’n an sponsor niin an sawi ta tlat mai hi a va zia lo in a va ṭha lo em. An sawi hi a tak tak a nih ngai chuan kan ramin kan chhiatpui mek dan loa thil tawlhruk leh ruihhlo hmanga min run dun tute hi kan ramah hian i ti tlangnel lo ang u. Hetiang mite hi mipui te hian i hnawl ngam ang u, kan hnawl ṭhat ngam loh avangin tunah hian an ngampa a, an ngampat zual hma leh min rawn luh chhuah hma hian i do tak zet ang u.

Heti reng reng chuan rawn luh thuk ang tum zel an tih hi a rin theih a, kumin hi Assembly inthlanpui kum a ni a, tlin chaka tui hal kan politician-te ho hi ruihhlo leh smuggling hmanga intilian sum ngah ho hian an rawn vur ang a, kan ramah hian nghet lehzuala bu an rawn khuar a hlauhawm ta takzet mai.

Kan ram hi chhanchhuah theih a la nih lai hian chhan­chhuak ila, sum thianghlim lo hmanga inti milian te hi i hnawl ngam ang u.

- Lalhlimpuia Hmar