Î

Mi kan va biaka te kan address-na “I lo ên chuan, i lo ên chuan, ka thinlung lâwmin a khat” tiha “i” h kan sawi tum a ni lo a; mahni insawina ṭawngkam “Lâwmin khat miau hek i” tiha “i” pawh hi kan sawi tum a ni chuang lo. Tuna kan thupui ber chu hla thûa an hman “a î emaw” tiha “î” hi a ni. Awithangpa hlaah chuan

“Ka sa maw nuar a chûninu,
A î emaw kan sual le?
Ka tuai duh lai bânah a kai,
Awmlai a nunrâwng mang e”

tih a ni a. Heta “a î emaw” tih hi “a eng nge maw” tih emaw, “a eng kher nge maw” tihna a ni; “a eng thil nge maw” tih te nen pawh a inang tlâng vek mai e. Awithangpa hian a fapa Awithanga a han thi ta mai kha a tuar thiam lo a, nâ a ti a, a rilru chavaiin mawhpuh tur a han dap kual a, “A eng thil nge maw kan tihsual le?” (A î emaw an sual le?) a ti a ni. Hetiang chiah hian Zirsangzela pawhin a hla “Autograph”-ah he hla rua hi a lo hmang ve a,

“A î emaw ka dâwn ni a,
Ṭuanṭul lai tak ka hawn nia le!”

tiin. Hetah pawh hian “A î emaw ka dâwn ni a” tih hi “A eng thil nge maw ka ngaihtuah a” tihna a ni a, hna ṭul neih lai laia ka thingrem ka hawn kher kher ni a ti a ni.

A awmzia lam chu duh tâwk ang. Tunlai hian hla chham mi phuah thiam tak tak an awm. Chutiang mite’na an phuah hla chham mi chu Youtube lamah live-a an chhiar ka en fuh ve a, "A î emaw" tiha "î" hi an lam vanvadâk chiam mai a, hetia lam hi mi nâwlpui lam dan niin a lang lo. An lam dan chu ‘a aw b’ kan han sawi zat zat a, "i" kan lam thleng ta a, heta "i" kan lam ang hian an lam a ni. “Hmarcha thak ei chu an sî hliam hliam zel” tiha “sî” ang hian an lam dingdihlîp a nih chu. Hetiang thlûk hi khawi lam bungrua aṭanga lo chhuak nge ni ang tih chu keini hriat rual a ni lo. A hmang an tam tawh phei chuan hetia ka’n ti ta mai hi an lung a âwi meuh lo ang.

A lam dan dik, a rik dan tur dik zawk nia lang chu ‘bâwng insî, tuidawn insî’ tiha "sî" ri hniam ang hi a ni a. Khawchhak lam chhuak puanthân ‘sîphû, sîkê, sîuaisi’ tiha "sî" nen hian a rik dan a inang. Hetiang thlûk hi ṭawngkam dangah pawh kan la nei a, hla rua ni loin ṭawngkam pangngai a ni thung “Kha thubuai lah kha sawi zui leh î awm loin a reh ta vang vang mai a” tiha “î” hi a ni a. A rik dan pawh “a î emaw” tiha “î” leh “sawi leh î“ tiha “î” chu a inan thlap hi. Hei hi thlûk dan dik ka han tiha chu a ni e.

Ṭawng thlûk dan tur sawi hian fimkhur a ngai hle mai a. A chhan chu chhim leh hmar, chhak leh thlang bakah chumi piah lama mite nen thleng thleng chuan kan inbe pawp thei tawh a ni naran mai lo a, kan cheng ho tawh zawk a. Khawi khawiah emaw chuan mi nâwlpui lam dan ni lem loa eng thumal mal emaw lo lam an awm ṭhin a, mi kan inpawlhsawp na na na chuan tih dan a lo inang diak diak thei si lo. Chu vang tak chuan kan ṭawnga thumal tam tak pawh hian thlûk chi dang dang a nei ta ṭhin a ni awm e. Eng pawh ni se, a dik ber a awm theiha chumi thlûk chu kan la hum theih hrâm hrâm chuan sawi rik ve sek a ṭûl tlat, awmzia a neih tak mialin. Chuti ni lo se kan sawi hauh lo ang.

- Rempuia R. Lûtmâng