HRI NGE KAN HLAUH LEHKHA?
Kan hnathawhna Dept. lamin a zir vang/ zirloh vangin hri kai palh mai thei dinhmunah ding ve reng ṭhina ka inhriat avangin ka fimkhur ve hle a, ka lo kai palh takin mi dang ka kai chhawng palh ang tih pawh ka hlau a, mask ka vuah ngawrh hle.
Tarmit bun reng chunga Mask vuah hahthlak dan chu tarmit bun ṭhin chuan kan hrethiam ang. Kan hotupa ber lah hri lenna hmunah Dak phur turin a kal chhen lo thei si lo. Office a min dawrtute leh khawlaia min hmutute lahin min hlau der bawk si lo.
Kohhran hnatlanga thawk zingah hri vei hmuhchhuah a lo ni hlauh mai a, hnatlang zingah hian ka fapa a tel ve avangin Home quarantine tura tih kan lo ni ve ta thut mai.
VLTF-in kan kawngkaah Home quarantine lai kan nih leh tlawhpawh thiang lo kan nih thu an rawn tar a. Chuta ṭang chuan hlauhawm leh mi hlauh rawn kan lo ni ta reng mai.
Nidanga office lam leh khawlaia min hlau lo fe fete kha kan In bula an lo kal dawn chuan mask an vuah ṭha sauh sauh a, min hlat thei ang berin kawng kawm kil an chuh ta - heng mite hi ka dem hauh lo, kan hlauhawm miau alawm! Mahse, kan kawngka biangah lehkha tar a awm hmaa min hlau miah lo kha ka dem zawk.
Kan quarantine hun chhung a zo ang a, pawn lamah hri kai theihna chance tam tak karah kan chhuak leh dawn a, kan la hlauhawm dawn chauh. Kan kawngka bianga lehkha intar a awm tawh loh avangin min hlau lo leh ngawt awm si ang. Lehkha tar nge kan hlauh hri?
Hri kan hlau tak tak a nih chuan a pu darhtu mihringte hi i inhlau ang u. Home quarantine a kan awm lai, min hlauh em em lai khan keini aia hlauhawm pui pui, symptoms nei si lo khawlaiah zalen takin an vak a, an khuh per ang chuai chuai asin, fimkhur teh.
Mask vuah taimain kut silfai reng ila, office kan dawr dawn pawhin kan hman mamawh tur Pen te hi mahni in ken hram hram ang u, hri vei hum hnu kan hum chut loh nan.
Quarantine laka ka zalen hnu hian ka la hlauhawm dawn chauh a, min lo hlau chhunzawm hram hram ang che u.
- H. Lalthanmawia