Election awm apiang A serh zinga a mei, Tripura a Tuikukte

Ṭhangkhat lian election awm a pianga kan sawi lan loh theih loh Tripura a awm Tuikuk, Mizoram Electoral roll a hming chuangte hi an ni.

Kum 2018 khan hemi chungchang hi CYMA hmalakna in buaipui a ni a, khatih lai khan CYMA khan Lunglei, Kolasib leh Mamit District a Bru Tripura camp a vote neite Form 7 hmanga a hlawma complain thehlut turin hma a la a. Kolasib District ah pawh YMA Branch hrang hrangin hnatlangin Foram fillup kan nei a ni. Amaherawhchu, kan han thehlut a, ECI chuan bulk application tiin min hnawl (reject) sak a nih kha.

ECI-in a chhan a sawiah complain thehlut tur hian roll a hming chuang ngeiin mi 8 bak a complain theih loh a ti, hei vang hian ECI-in min hnawl sak.

A hnu lawkah roll revision neih a ni a, Tripura camp a Tuikuk te chu Kanhmunah hearing nei turin 2019 February ni 26 ah koh an ni a, kei leh Sub Hqrs YMA Kolasib hruaitu, khatih laia Asst. Secretary Pu R.Lalzokima nen objection siam turin Pu Zotea motor-in Kanhmun panin kan kal a. Khatih laia Bairabi Group YMA President Pu Zawma chu hrilh lawk lem lo in kan sawm thla bawk.

Objection kan neih thu Mamit lama Election hotute kan hrilh lawk vangin hearing ṭan hmain min lo nghak a, hmanmawh a tlanthla kan nih vangin Tripura (Damcherra) lamah kan document te kan va print sawk sawk a, Kanhmun ah print na tur kan hmuh mai loh vangin, Tuikuk hruaitu Pu Sawibunga te Pu Dawnga leh hruaitu dangte pawh an awm a, min nghak rei ang reng khawp mai. An lo lungawi lo hman viau a, kan in zim deuh hman a, an tam bawk si a, a zam awm duh viau.

Objection chu kan han thehlut a, kan document neih ang ang te nen, chutah Election Offier Hearing nei a kalten kan lehkha thehluh te CEO la ah an han hriattir leh a. Phone a rawn ri nghal a, khatih laia kan DC khan lo ti tawp turin min rawn ngen. Aizawlah Election CEO te nena meeting kan neih lai a ni a, pawnah ka chhuak a ka rawn call vat che u. A zahthlak ka tan pawh tiin min rawn call a, mahse kan in hnuh dawh loh tur thu kan hrilh. A hnuah khatih laia Sub Hqrs YMA President-in a rawn call ve leh a, ani kha chuan a rawn call ngun khawp mai, ti tawpa in hnukdawk mai turin min rawn ngen a ni.

Kan tih tawp loh tur thu kan hrilh. Hei leh chen kan thleng tawh a, ECI-in bulk application pawm theih loh thu a chhuah a, eng vangin nge Tuikuk hruaituten a hlawma form an fillup mi pakhatin a thehluh hi an pawm bik ang, dan angin ECI hian ro a rel tur a ni kan ti a. Kan ṭang kawh tlat a, a hmuna awmte tan a hlauhawm zawk tehreng nen, ral aṭangin an lo phili buai ve em em ringawt.

Hemi kum hian roll a luh dil Tripura a awm Tuikuk te hi Kolasib District Serlui A/C ah 211, Kolasib A/C ah 159 Tuirial A/C ah 89 an vaiin mi 459 an ni. Lunglei District, West Tuipui A/C ah 117, Lunglei South A/C ah 6, Thorang A/C ah 59 an vaiin 182.

Mamit District Dampa A/C ah 164, Mamit A/C ah 697, Hachhek A/C ah 1110 an vaiin 1971 - District pathum belhkhawm hi 2612 an ni. Hei hi kum khata roll revision neiha dil awm zat an ni kum tin, engzat tak dil thar awm ang maw?

Chutia Hearing neih kan phal tak lohah chuan thuneitu sang lam aṭangin Kanhmun OC hoin Police ṭhahnem tak an rawn tir thla a; min man turin, mahse kan dikna ECI order ziakin kan hmuh a, min man ta lo chuan hun eng emaw chen kan inchai hnuah Tuikuk hruaitute leh Mamit Election thuneitu hearing nei tura kalte nen sawiho an rawt ta a. 'Tah chuan kan ṭhukhawm a, kan ṭanchhan kan sawi a, keini chuan Mizorama awm tawh lo Tuikuk Tripura camp-a awm mi eng emaw zat roll-a paih turin Form 7 hmangin kan thehlut a, ECI-in bulk application tiin min hnawl (Reject) sak a.

Vawiin niah hearing nei turin Kanhmunah ṭhahnem tak an kalkhawm a, vawiin nia hearing nei tura kalkhawm zawng zawngte hi Mizoram sorkar Election thuneitute'n hruaitute hnenah a hlawmin form an rawn dahthla a, chu chu hruaituten a hlawmin in ziah khahsak a, a hlawm vekin Election thuneitute'n mipa khat kut aṭangin an rawn lam leh a, kan dinhmun a inang chiah. Kan huat hrim hrim vang che u ni loin dan chuan rualkhai takin ro a rel tur a ni tiin. Kan Form thehluh bulk application a nih chuan nangni pawh bulk application a nih lohna a awm lo, danglam bikna in nei lo tiin kan sawi a.

Bru aiawha thu sawite chuan in ṭanchhan chu a dik, mahse hetiang hian ngati nge Mizoram Election thuneitute'n min tihtir, a dik lo a ni tih hria ila vawiinah kan rawn kal lo ang. Vawiina kan rawn kalna lirthei pawh harsa te tein pawisa kan thawhkhawm a, kan rawn thleng hram a ni a. Kan senso hi sorkarin min pe se kan haw leh ang an ti a, mahse sorkarin a pek theih tak loh avang leh chunglam aṭangin phone hmanga nawrna a rik reng avang te, Hearing nei tura kan Mizo officer rualte'n dik takin kan ti ang a, document fel lo pakhat mah kan la lut lo ang tia hearing neih tlangtir tura min ngen avang te, YMA lama kan hruaituten phone hmanga inhnukdawk tura min rawn ngen reng avangin kan inphah hniam ta a, roll revision chu neih tlang a ni ta a ni. Hemi ṭuma roll-a luh dil mi 2612-ah khan eng zat tak lut ta ang maw? Khami hnu khan YMA lam chuan Form 7 hi kan buaipui chhunzawm ka hre ta lo, kan reh zui ta niin a lang.

Hemi hma Kum 2018 November ni 14 khan Bru Tripura camp-a awm te roll-ah document felhlelte hmanga thunluh an nih vangin FIR thehluh a ni a, FIR thehluh tichak turin Tripura Agartala lamah kan zuk kal vang vang a, khami ṭuma kan hmalaknate pawh a zuih ral ta a nih hi. Thawm hriattur a awm zui ta lo, Bru vanga NGO-ten kan sum sen zo zaite pawh zahawm tham a ni ta.

Tuirial A/C ah bye Election October Ni 30 ah neih a ni dawn. Tripura camp-a tuikuk vote 663 lai a lo lang leh, NGO leh Political party-ten harh tharna kan chang leh, roll revision laia Form 7 hmanga delete an nih loh chuan eng dan mahin Vote kan thlaktir lo ngawt thei tawh lo, an thlak dawn; an duh chuan! Kan hruaitute pawhin inenfiah nan hmang se, thir lin laia kan den loh chuan awmzia a awm lo, a hma zawng zawnga hmalakna pawh bawhzui a nih loh vangin a thamral, hun leh tha, sum tam tak kan sengral thlawn.

NGO hmachhuana haw hawa nawr ngawt chi a ni lo, kum 2 hnu lawkah inthlanpui kan hmachhawn dawn a, Tuirial A/C ah 660 chuang Roll-a chuang Mizoram mi ni lo, Tripura State mi leh sa an la awm chuan District dangah pawh eng emaw zat an awm dawn tih kan hriat a ṭha.

NGO hruaitu a ngaihna hria kan mamawh, kan ramin. Tin, Political party tin pawh, in aiawha meeting-a tel tura in tirh ṭhinte hi a ngaihna hria ni rawh se, a hran hran party aiawha nil loh nan ti ni awm fahranin in tir ṭhin a, thu pawimawh sawi tur hre lo fe fe, rawtna pawimawh thlen huna sawi tur pakhat mah hre lo in aiawh turin in tir a, a sawt tawh loh hnuah ram pum anga kan buai a ngai leh si ṭhin, i ṭhangharh teh ang u. Election awm dawn apianga Bru Chapter hawn ziah ngai hi khar a hun ta.

- Manghaka, Kolasib