BJP HI A TUMAH A HLAWHTLING TAWH EM?

BJP thil tum ber chu RSS thil tum tihhlawhtlin a ni mai. Chu chu RSS-in BJP an din chhan pawh a ni. RSS-in an din chhan an website-a an tarlan dan chu India ramah Hindu sakhua leh culture chauh tundin a, sakhaw dang leh culture dang reng reng dip ral vek tih a ni. India ramah hian hnam hrang, sakhaw biak hrang kan lo tam viau a, hnam khat, sakhaw khat biakna rama siam tur chuan ṭawngkam ṭhaa inthlem thluk sen rual a ni lo tih leh, tharum hmanga vau khawm chi a ni lo tih hi RSS hian a hre chiang em em a, chu vang chuan Sangh Parivar chu lang lo lamah zar hliahin, a kawrah BJP hi an hmang ta a. Parliament in hnihah leh state zawng zawngah hian, India danpui siam danglam thei khawpa tam member neih an tum ngar ngar a ni.

BJP hian India ram hi supper power-a siam a tum a, chu chu India ram tan a pawimawh tho a, a tum chhan tak zawk chu ṭhangtharte hip a duh vang a ni mah zawk awm e. India ram hi ei leh bara intodelh a, ram hausa taka siam a tum bawk a, chu pawh chu mi rethei tam tak tan a pawimawh em em bawk. Retheihna umbo chu khawvel ngaihah sorkar ṭha tehfung pawimawh ber a ni a, mi retheite lamṭanga siamna pawimawh tak a ni. Hengahte hian BJP sorkar hian a thawk ṭha thawkhat viau a, ṭhangtharte fak pawh a hlawh a, fak pawh a phu tho bawk. Amaherawhchu, BJP hian India ram hi politics-ah leh economics-ah khawvel mit fukna tling khawpin lo siam thei ta pawh ni se, an politics thukphum kha hnam khat, sakhaw khata India ram pum siam a nih miau avangin, hmabak an la ngah hle. MP pakhat chauh neihna state-ah pawh politics-a hnehna chan ngei an duh a, a chhan chu, Lok Sabha-ah danpui siam danglam thei khawpa tam leh, Rajya Sabha-ah hneh taka pawmpui thei khawpa tam member neih an duh a, an tinzawn ngar ngar chu hnam tenau leh sakhaw tenau nuaibo theihna atan tlawhchhan tur India Danpuia dah hi a ni tih, an chet dan aṭang hian a lang chiang viau a ni. Chuvangin, politics-a chakna te, nuclear power neih te, ram tihhausakte hi chu an thil tum ber ni loin, an thil tum tihhlawhtlin nana an hmanrua, mipui an hipna atana chawchah mai chauh a ni.

Kristian tan BJP nih a him em?
Kristian tamna state hi India ramah kan awm nual, Hriat theih chinah India chhim lam state hrang hrang MLA za tam tak awmnaah khuan, BJP ticket-a Kristian MLA tling hi paruk an awm mek. Active Kristiana inchhal, BJP ticket-a MP tling hmasa ber chu Mizo tlangval a ni mauh mai. A tlangpuiin hnam dang Kristian zingah pawh BJP luhchilh pawisa lote hi sakhua la runtlak lem lo, hnam culture hlutna pawh ngaihtuah lem lote an niin an sawi.

BJP-in Hmarchhak lama Kristian tamna state-ah beihpui an rawn thlak tur thu hi kumnga kal ta aṭang khan an sawi lawk a, an tinzawn chu Nagaland, Meghalaya leh Mizoram a ni. An rawn thawk ta ngei a, an ralthuam chak ber chu SUM a ni. Nagaland-ah tualṭo party nen inthlan hma aṭangin an inremsiam a, an hlawhtling thawkhat a, an tum ang erawh an phak lo hle. Meghalaya-ah phei chuan inthlan hmain thawhpui an nei lo a, an tum an phak lo viau, pahnih chiah an tling. Inthlan zawh hnuah erawh NPP an thlawp a, sorkar siamtu pawlah an tel ta tho a.

Tunah chuan, BJP mit fuk lenna ber chu Mizoram hi a ni ta. MP neih theih zat lam ai mahin, nakina an nuaibo duh ber Kristian sakhaw zuitu tamna, Kohhran hlawm nghehna state kan nih vang a ni ang. Kumin November thla tawp lamah MLA kan thlang dawn a, Central BJP hian Mizoramah BJP sorkar chu din rual a ni lo tih an hre chiang, mahse BJP thlawp party-in sorkar an siam theihna turin theih tawp an rawn chhuah ang. Development Scheme ṭha pui pui, kan ramin kan mamawh em emte an rawn zuar ang. Central hotu lian an lo kal zut ang a, an tum ruk leh an din chhan dik tak an thup tlat ang. Kawngpui ṭha tak te, Power Project te, Damdawi in ṭha te, Zirna in changkang takte langsar takin an rawn tiam ang, Pi Sonia-i te, Pu Manmohan-a ten hmana an rawn tiam ang khan. SUM FAI itawm tham tak tak, tunlaia thu maia an tiam kual mek hi an ipteah an rawn ak lang tawh bawk ang. An chaw-chah kan lo barsak mai chuan, Kristian sakhua nuai bo tur leh, kan Zo Nun Mawi phum bo va, Mizoramah hinduva tung ding turin, tha kan thawh ve ta tihna a ni mai. 'BJP is the parliamentary political wing of Sang Parivar' tih hi an website hmatawngah chhuang takin an la dah reng a ni. Kristian sakhua leh Zo Nun Mawi kher kher ngentu 'Huai' -in min sual mek a nih hi. Sakhua leh hnam ralna kawng hial pawh ni se, tuna sum hmuh theihna tur a nih phawt chuan, hnar thei dinhmuna ding tawh lova inhria Zofate zingah hian kan awm nual tawh ang, ram inrelbawl danin min thlenpui chin a ni miau a.

Eng pawh ni se, BJP kan thlan tlin vang chauha hmasawnna hi awm tur a ni lo, kan thlan tlinte azir a ni. Kum tam tak rorel tawhtute ngaihtuah zawng a nih lem loh vanga hmasawnna kawnga hnufual hi kan ni zawk. Eng party pawh ni se, mi dik kan thlan fuh chuan, Kristian sakhua leh Zo Nun Mawi humhim zual sauh pahin, heng hmasawnna project hrang hrangte hi kan nei tho tho ang. SUM peka min thlemtute hian min khawngaih vang ni loin, min nuaibo an tum vang zawka thilphal mai te hi an lo ni palh ang e.

RSS laka Kristian-ten kan zir tur:
Hmasawnna kawngah chuan, Mizoram hian Kawngpui ṭha te, Electric te, Ei leh bara intodelh te, Zirna in ṭha te, Damdawi in ṭhate hi kan mamawh hmanhmawh thlak zinga mi an ni ngei mai. Sorkarna changtu apiangten an tih ngei tura an tiam, mahse vanduaithlak taka an la tih loh palhte a ni awm e. BJP chuan hetiang hmasawnna hi chaw-chahah hmangin, an tum tak chu India ram puma Hindu culture leh Hindu sakhua chauh din chhuahtir a, culture dang leh sakhaw dang chu, dipral mai pawh ni lo, a nuaia nuaibo a ni. Kan sakhaw zui Kristian sakhua hi, Hindu sakhua te aia nasa taka chungnung a ni. Kristian sakhua nghet taka tundinna atan te, thehdarhna atante hian, ram rorelna (politics) hi hmanraw ṭangkai tak leh remchang tak a ni. Chu chu kan politics thukphum ni se, ram hmasawnna atana kan mamawh heng Kawngpui ṭha te, Electric eng te, tui thianghlim te, ei leh bara intodelh te, zirna in ṭha te, damdawi in ṭha te, ram leh hnam himna chi hrang hrangte hi, chak zawk leh thianghlim zawkin kan neih theih phah zawk ang. Kristian sakhua leh Zo Nun Mawi hi kan hnam lungphum a ni. Chu chu kan humhim tlat tur a ni.

Jerusalem Temple din tura Pathian hmanrua chu ram rorel tura hriak thih Lal Davida a ni ang khan, Ram Rorelna (politics) hi Mizo hnam lungphum hum­himna HMANRUA mai a ni tih hi kan hriat nawn fo a ṭha hle mai.

K Sapdanga