Bye Election thusawi leh thutiam

Tuirial Bial Bye Election neih turah boruak a hot chho ṭan dawn a, a seat neitu hmasa ZPM leh MNF-in he seat hi an inchuh dâwn a nih hmel. Congress pawh hi sawi bo chi an la ni bik lova, Serchhip lama an mualpho avang ngawt khan Congress hi an te ta viau anga la ngaih loh phawt tur a ni.

Serchhip lamah khah Chief Minister leh MNF President Pu Zoramthanga kha a han ṭawng sual nasa chei chei khawp a. Bye Election a nih vangin MNF chu chak chiang sâa ngaiin hla key a la sang vai vai lutuk a, Serchhip mipuite chu MNF an thlan tlin loh chuan mi nuihzat an nih tur thu leh Rangvamual pawhin an nuih tur a nih thu a sawi a, mahse Serchhip mipuiin Ruling Bial nih kha khel ve lovin an duh zawng tâk MLA atan an thlang tling nawn mai a, Chief Minister tana mualphona a thleng ta a ni.

A Minister rual ṭhenkhat pawh kha an lo ṭawng uang hman a, ZPM campaigner te tun hma election a vote an hmuh tlemzia te an han au pui a, mahse MNF Vice President zawk chu Ruling ni chungin vote tam takin a chak lovah a ṭang ta si a, ṭawng uan ṭhat lohzia a lang leh ta a ni.

A ziaka awm lo leh finfiah theih loh chu MNF lamin inthlan dâwn khan mi tam tak kha sorkar hna pek an lo tiam a ni awm a, a hmaa an tlinna leh Minister bialah meuh pawh sorkar hna pek theih loh a tam avangin sorkar hna pek in tiama campaign hi chu inbumna a ni a, Ruling an nih chiaha duat tum anga an sawi phei hi chu ruling an nih loh chuan an hmangaih dâwn lo tih Bial mipui hmaa an inpuanna zawk a ni.

Election au hla hi fimkhur a ngai khawp mai. Congress leh ZPM pawh fimkhur hle se, ṭawng sual pahnih khat hi mipuiin an lo hmù fuh tawh ṭhin si a ni. Politician te hi puitling takin campaign tawh ula, ṭawng mai mai lo rawh u, mipuiin kan chhinchhiah reng tih lo hre tawh rawh u.

- Masawmtea