COVID19 LAKA INVENNA LEH INENKAWLNA

SARS-CoV-2 hrik ti-a kan hriatin Covid19 ti-a kan hriat tak natna a thlen hian damlohna leh thihna a thlen tak tak a. A tira khawvel min barakhaih khan doctor-te pawh hlauhnain a man a, a tam zawk chuan tihngaihna an hre lo tak tak a ni.

Loh theih loha damlo enkawltu doctor leh nurse te pawh khan enkawl dan tur tak an hriat loh avangin an damlo enkawlte kha an thi phuk phuk reng a ni. Kawng hrang hrangin damlo enkawl dan tur an han ngaihtuah a. Mahse, natna tharlam a nih avangin tihngaihna tak hre loin hun rei tak an awm a ni.

Khatianga chiai leh ralṭi taka kan awm lai khan WHO leh US lama Health department thuneitute chuan inkaihhruaina dan te an siam ve a, khawvel pawhin an inkaihhruaina dan siamte chu kan zawm ve ta hlawm a ni.

A tira kan hriat dan kha han ngaihtuah let leh chhin ta ula, Covid laka invenna emaw inenkawlna damdawi a awm lo tih kha a ni deuh tawp mai a. Tichuan, khaw­vel pum mai khan damdawi emaw invenna tur vaccine kan nghak ta thup a. Vaccine siamchhuah a nih hma phei kha chuan kan ralti tlang vek a ni.

Mizoramah phei chuan ral lo lian tur laka inveng ang maiin kan ramri te kan veng hial a nih kha.

Amaherawhchu, damlo an thih phuk phuk a, WHO leh USA-a Health depart­ment lam hotuten invenna emaw inenkawlna tur damdawi him leh ṭha awm lo anga an sawi lai khan "Hetiang ngawt chu a ni thei lo" ti-a tlawm tum lo, "Ka damlo te hi enkawl lohvin ka vuiliam ngawt dawn lo" ti pawl khawvel hmun hrang hrangah doctor an awm a. "Covid doctor" kha tumah an awm bik loh avangin an damdawi lam zirthiamna te kha Covid donan hman an tum ta hlawm a. Chutianga ngaihtuahna nei pakhat chu Bombay-a doctor Darrell DeMello-a a ni.

Nikum kum tir khan Melbourne khuaa Monash University-a Biochemistry leh Molecular Biologist Dr Kylie Wagstaff-i leh a thawhpuiten SARS-CoV-2 hrik darh zel tur dona tur damdawi hi an ngaihtuah a. Virus hrik chungchang a nih avangin research lo bei tawh scientist ten virus hrik that theia an hriat damdawi pakhat chu enchhinah an nei ta a.

Laboratory-ah damdawi chu SARS-CoV-2 beihnan uluk takin an enchhin a. Hei hian Dr Kylie Wagstaff-i'n an zirchianna aṭanga an thil hmuh a sawi a - "We found that even a single dose could essentially remove all viral RNA by 48 hours and that even at 24 hours there was a really significant reduction in it.”

He damdawi dose khat ringawt pawh hian darkar 48 chhungin SARS-CoV-2 hrika a RNA zawng zawng kha a that fai thei deuh vek tih an hmu a, darkar 24 chhung ringawt pawhin a that teuh thei tih an hmu bawk a ni.

Chu research chu chhan hrang hrang vangin chhunzawm mumal a ni lo va, amaherawhchu an hmuh chin ringawt pawh khawvelin a ngaihven a nih avangin doctor-te chuan an hre deuh vek tura ngaih a ni. Amaherawhchu, sawi tawh ang khan, chiaina leh hlauhnain kan doctor-te pawh a man deuh vek avangin bawhzui tak tak ngam an tam lo va. A ngam zinga pakhat chu Bombay-a clinic nei Dr Darrell DeMello-a hi a ni a. Dr Kylie Wagstaff-i te research aṭanga an hmuhchhuah hi a lo hriatin, "A ni maw!" tiin doctor a nih angin a damlote enkawlna'n chu damdawi chu Covid damlo a enkawlteah an SARS-CoV-2 hrik pai thahnan a hmang ta a. Fimkhur takin, inzir pah bawkin, damdawi dangte nen uluk takin a damlote a enkawl a. Doctor a nih anga uluk taka damdawi hrang hrang hmangin vawiin thleng hian Covid19 damlo 6000 chuang a lo enkawl dam tawh a ni.

Damlo sang tam a enkawl tawh aṭangin a inringtawk hlein a inhria a, a tawnhriat aṭanga a hmuh ngei finfiah theih tam takte hi Mizoram sorkar leh kan doctor te hian an duh phawt chuan a phone number 8097249586 ah hian englai pawhin an zawt thei reng a ni. Pathianni tih lohah chuan zing dar 10 aṭanga tlai dar 7 thleng a inhawng a, drdarrelldemello@gmail.com ah hian kan Chief Minister emaw Health Minister emaw Chief Secretary emaw Health department lama kan hotute hian hrechiang turin email hmang pawhin thu an zu zawtchiang thei bawk a ni. A hmuna kal ngei an tih pawhin Bombay-a Mizoram House enkawltu ber hian a clinic-ah ngei a va kal theih bawk, a address "RH1, Avon Plaza-2, Thakur Complex, Kandivali (E), Mumbai" ah hian. Mizoram House aṭanga km 25 vel lek chauh a ni nghe nghe a ni.

Dr Darrel DeMello-a leh amah anga Covid-19 damlo sang tam tak lo enkawl dam tawhten an hmuh leh hriat an sawi dan chuan kai palh pawha natpui vak lohna tur te, thihpui lohna tura pawimawhte hi mawlmang angreng deuh deuh a ni a. Ho tea thihpui theih natna a nih lai hian enkawl vat chuan awlsam tea dam theihna a ni thung a ni. He’ng doctor ten an hmuh leh hriat aṭanga chiang taka an pawm leh a taka an hman chu Vitamin D nei tha tura damlote enkawl leh thurawn pek te, miin Covid-19 natna veia a inhriat veleh virus hrik inthlahpung tur lo thata lo dang tur Dr Wagstaff-i’n damdawi a enchhin dose him tak ei nghal vat tihte a ni a. Hma taka enkawl a nih chuan damdawi in lam luh ngai miah lovin in lamah an enkawl dam deuh vek a ni. Damlo enkawlnaa an thupui ber chu "Early Treatment" rang tak, hma taka damdawi mumal hmanga enkawl hi a ni tawp mai a ni.

Khawvela doctor tam zawkin Vitamin C leh Paracetamol vel bak an chawh loh lai khan Dr.Darrell DeMello-a hian scientist Dr Kylie Wagstaff-i research beihna aṭanga a hriat kha a takin a lo hmang tawh a. Dose dik leh a hun tea ei phei chuan SARS-CoV-2 hrik kaite enkawlna'n a him mai ni lovin awmzia a nei em em (effective) tih kha laboratory piah lamah pawh hmuh a ni ta zel a, chu damdawi chu Dr DeMello-a hian hman hmasak berah a nei ta a ni. Amaherawhchu, virus hrik avanga natna "viral disease" kan tih ang chi hi damdawi pakhat chauhva enkawl a ni ngai lo tiin doctor te hi chuan an sawi ṭhin dan a ni a. Antiviral damdawi hmanga bul ṭanin Covid19 damlo 6000 chuang teh meuh a lo enkawl dam tawh a ni.

Dr DeMello-a hian damlo sang tam tak a lo enkawl tawh aṭang leh khawvel hmun hrang hranga hetiang zulzui thova damlo lo enkawl dam tawhte pawhin an sawi aṭanga chiang taka a hmuh chu Vitamin D nei tlemte hian an la na zel tih a ni a. Vitamin D nei ṭhate hian he natna hi an ngam ṭha deuh zel bawk niin a hmu a ni. A sawi dan chuan he damdawi hi a tira virus hrik inthlahpung tur khapbeh vatna'n damdawi ṭha tak a ni a, taksa tihchaknan erawh chuan Vitamin D hi a ṭha ber niin a sawi a ni.

College-a an senior pakhat, chumi nu, pitar kum 91 Covid19 hrik hi a enkawl tawh a. A la na em em tlat lo chu mak tiin a fanu a zawt chiang a. A fanuin a lo hrilh dan chuan kum tam tak a nuin tihdan pangngai ve renga a neih chu tuk tin bathlarah hian darkar 1 nilum ai a ni. A damlo enkawl pitar kum 91 chuan Vitamin D level 89 a lo nei daih mai a. Chu chuan Covid hrik a kai pawh khan nasa takin a do let niin Dr.DeMello-a chuan a rin thu a sawi a ni. Mithiam hrang hrangin an sawi dan hi a inang lo deuh va, a sawi dan chuan zing dar 7:30 leh dar 8:30 inkar hi nilum ai hun ṭha ber a ni. Hriselna'n hrim hrim leh Covid hrileng dona'n pawh hian Vitamin D hi kum 10 chin chung lamah a hniam berah 60, a sang berah 100 ni se a ṭha tiin a sawi bawk a ni.

USA lamah pawh Dr. DeMello-a hmalak ṭan lai vel thova lo bei chho hi an awm nual a. Chutianga hma la, doctor leh mithiam rual intelkhawm lian leh mumal ber pawl chu Front Line COVID-19 Critical Care Alliance (FLCCC) hi an ni awm e. UK lamah pawh pawl pakhat British Ivermectin Recommendation Development Group (BIRD) a awm a, FLCCC nen hian thil tam tak an ti ho ṭhin. August thla tawp khan Australia sorkar Health Minister Greg Hunt-a hnenah lehkha inṭawm an thawn a. Chutah chuan FLCCC leh BIRD aiawhin Dr Pierre Kory-a leh Dr Tess Lawrie-i ten he hri lenga inenkawlna'n mai pawh ni lo, a invenna'n he damdawi hi hman a ṭhat thu an hrilh a, enchhinna (trial) hlawhtling tak tak an lo neih tawh aṭanga an hmuh dan aṭangin invenna'n bika an dose chawh pawh an ziak lang tel a. Kar khatah vawi hnih, 0.2 mg/kg ei hian nasa takin Covid hri lakah min veng thei an ti a ni.

Heng kan han tarlante hi a sawitute ngeiin an sawi leh ziahte hi finfiah theih vekin an website ah an dah vek a. Vaccine full dose la leh la la ve miah lote pawh hi kan kai theih vek avang hian invenna ṭha hi kan mamawh a, kan duh tak tak chuan heng doctor rual, ngaihtuahna nasa tak senga tihdan thar ṭha zawk lo hmuchhuaktute tih dan hi ZMC-a kan doctor-te pawh hian entawn se an tisual lo vang.

Invennan hian vaccine leh C.A.B. chauh kan sawi erawh chuan a lehpek chu lockdown kha a ni leh mai tih kan hre vek awm e. “Positive case” a tam khan hlauhnain min man a, lockdown kha hmanraw ṭha berah kan ngai hrih bawk si a. Amaherawhchu, mihring nunah hian inkhunghran tlat ringawt te, laina hnai inhlata han ṭhut ngawt te, mihring mamawh oxygen a nih laia carbondioxide zawk hip tura hmaituam tlat mai te, kut a balh loh pawha kutsil reng maite hi thil nihphung pangngai a ni lo va. Invenna damdawi ṭha a awm a, inenkawlna damdawi ṭha pawh a awm a ni. Chu damdawi chu Mizoramah khan awlsam tein a lei theih a, ZMC-in Covid treatment protocol a siamah pawh khan a chuang nghe nghe. Ivermectin damdawi hi a ni. He damdawi hi khawvela damdawi him berte zinga mi a ni a. A lehpekah khawvel ram zau zawka Covid-19 damlote enkawlna'na hman a nih dan leh doctor-te rilru tibuaitu a nih dan kan en leh dawn nia.

- Laltanpuia Pachuau