COVID-19, HEIHA- HUIHA!
Covid 19 hripui zet chu a va ninawm zozai ta ve le! Nitin mai chanchinthar han thlir ila - hri kai tam lam lah a sangbi teh meuh kan ni zel mai si nen! A thihpui lah kan pung chho thur thur mai a, zathum lai kan thleng chho chu a ni ta mai a, a va han luhaithlak tak em! Nikum lam kha chuan kan la hawi champ viau a, a vei lah kan la tlem a, thihpui lah kha kutzungṭang thliah tham lek kha kan la ni a, kan hruaitute thleng pawhin kan la hawi champ viau a nih kha maw. Khatih lai kha chuan ram dang leh kan ram chhung state dangte han thlir khan kan ziaawm em bawk a ni. Kan ram hruaitute pawh insawi thei viau pawh ni se khatih lai na na na kha chuan a âwm ve reng bawk a ni. Kan ram chhung state dang reng mai an tuar nasa a lawm le!
Tunah zet erawh thung chuan boruak a dang zo ta! Ni tin mai hri kai a sangbi zet a ni chho ta reng mai. A dam lam aiin a hrikai kan tam ziah zel lehnghal a, a va hahthlak tak em, Hei ha, hui ha! tih mai loh chuan tihngaihna pawh a hriat theih ta meuh loh chu a ni ber e. Kan sorkar pawh he hri kai tam a hlauthawng a, total lockdown lah thla tam a záwnin kan kalpui a. Khati taka inkharkhip kha chuan ziaawm ve deuh mai awm kan ni asin le! Kan Task Force-te pawh an thawk rimin an thawk hah a, a tir lam an nihna pawh lam thiam mang hlei lo, "Tak Fawr" inti mai mai chunga sawisel bo khawpa an duty an thawk ṭha site kha; an lo va chhuanawm tak em! Mahse khati chung khan tun hi kan thleng chu a ni ta si a, a lungchhiatthlak hle a ni.
Sawi hmaih theih hauh loh leh chhuanawm em em kan ramri dutyte kha, a thim a var thlu lo, a sur a sa hnuaia rampalailenga a zum a hriam hnuaia kha chen an duty maite kha a va ropui em! An inpekna zawng zawngte kha fak an va phu tak em. Mahse khati khawpa an beih nasat hnuah hetiang dinhmun kan ni leh ta mai si te hi a lungchhiatthlak rum rum mai dawn a lawm le!
Kan sorkar pawhin a theih ang tawk chuan a invenna lamah a thawk tih loh rual chu a awm lo. Mipui lam vengthawng tak chungin total lockdown pawh kha chen chen kha a kalpui a, a ropui khawp mai. Mahse mipui lam pawh hi kan chiau hiar mah mah a ni awm mang e a tihtheih tlat. Lockdown kan ninzia leh kan sorkar sawiselna lam social media lamah kan vawrhdarh chiam chiam a, a ziak thei nazawngin sorkar sawiselna kan ziak kur ngiai nguai a, sorkar pawh awmngaihna hre lo lekin kan sawisel a, tichuan lockdownte pawh thlah dul a lo ṭulin, hri lah kan tipherh chho ta zel zawng a nih ber hi maw! A chang leh test runpui neih pawh ngam lo ti hialin kan sorkar kan sawisel leh a. Kan cho chhuah ang ngeiin test runpui chu kan han nei chho ta a, hri kai chu a sangbi hlirin kan kal chho ta zel zawng a nih ber hi maw. A lan dan chuan sorkarin khuahkhirhna khauh taka a kalpui lai chuan hri kai pawh kan ziaawm chho viau zel a, mahse khuahkhirhna an thlahdul deuh chuan kan pung leh thur thur thin niin a lang tlat. Kan Mizo zia leh kan sakhaw zia hian awm fal hi kan tlin lo a ni ber awm e a!
Tunah chuan kan ṭhenawm state-te hrikai dinhmun han thlirin an ziaawm em em tawh a, hri vei lah an tlem em em tawh hlawm a. Kei ni ve lah chu kan la tam tial tial mai si hi kan inenfiah a ngai khawp awm e. Tun hma lama Zangkawltukho kan tih mai Arunachal-te pawh thihpui an tlem em em zawk mai a, hri vei lah an tlem tawh bawk. Kei ni, intichangkang tak, Pathian nung bia ti a, ṭawngna lama sawi zen hnam si hi engti zia nge heti taka kan chhiat mai le? Mi state-in nunphung pangngaia kal an tum tawh mek lai hian heti zat zat hri kai an la awm reng mai site han thlir hi chuan kan tan vanpui a chim a ni ringawt a lawm le. Eng nge tihdik loh kan nei ta em ni ti thleng pawhin a dàwn theih awm e. Heti taka kan insawiselna leh kan inpuhmawhnate hi bansan ila, inpumkhatna nen hmangaihnain rorel khawm ila, thil eng emaw hleka sorkar leh hruaitute sawisel a rel vak vak lo hian thawk khawm ila, Lal Isua min zirtir ang hian hmangaihna nen inpumkhatna leh inlungrualnain ro rel ila, thawhhona ṭha nen kan hripui hi i do tlang teh ang u. Tichuan kan Hripui hi kan umbo thei ngeiin a rinawm zawk e.
- Patrick Z, Chhingchhip.