MNF PIANTHARNA

Ni 16 April, 2018 niin Khanpui Community Hall-ah Pu R. Tlanghmingthanga, MNF Vice President chuan ‘MNF a piangthar tawh a, mipui duhdan ti puitling turin a sorkar leh dawn’ tih thu a sawi chu ka rilruah a riak reng mai a. A sawitu hian thu fahrah te te a sawi pawh ka la hriat ngai loh avangin thu tak takah ka ngai a, amah hi Pastor fapa a ni bawkin Mizo pa tak mai niin ka hre bawk a, he thu a sawi pawh hi a thinlung tak aṭanga sawi niin ka ring bawk.

Hetiang hian piantharna chungchang hi Bible lamah ka han en a, Chanchin Ṭha Johana Bung thum chhunga Lal Isua leh Nikodema inbiakna chungchangah hian a lang chiang viau. Nikodema hnenah chuan Lal Isuan ‘I piangthar tur a ni’ a tih hi ṭawng bul zawk (greek ṭawng) lamah chuan ‘Ean me tis genethe Anothen’ tih a ni a, ‘Anothen’ tih hi ‘Ano’ tih aṭanga lo kal niin ‘upward, on the top, above, brim, high, up’ tihna te a ni a, if not anyone be born from above tiin English lamah chuan an dah bawk a ni. A awmzia chu ‘Mi tu pawh chunglam aṭanga a pianthar loh chuan…’ tihna a ni.

MNF Pianthar dan hi misual pianthar danin nge ringlo mi pianthar danin a pianthar ang? Tih ngaihtuahna ka nei a, thil ti sual leh sual lo tana piantharna thuhmun a ngaih tho avangin ‘piangthar’ tih ṭawngkam hmang tur hian MNF Vice President thusawi hi khel zui tlak a ni ang em? Nge Politician ṭawngkam a nih avangin thutakah kan ngai lo mai zawk dawn? tih te thlengin ka ngaihtuah a ni. Rul piangthar chuan a vun a lip a, a ze ngai a thihsan chuang lo ang hian emni zawk MNF hi an pianthar ang? tih te pawh tih te pawh ka rilruah a awm tho mai. Eng pawh nisela, pianthar chu thil lawmawm lam a ni hrim hrim tho.

MNF sorkar hmasa kha Pu Tlanga sawi ang hian pianthar a ngai a ni tih chu a chiang reng mai. Kuminah General Election a awm leh dawn a, he hunah hian MNF tan chuan tlin leh ngei an tum avangin ‘piantharna’ hi an mamawh a, an piangthar a ni tih an Vice President sawiah hian a hriat theih nghal bawk. Zep thu a cheng lo - MNF Party te khan sorkarna fawng an chelh lai khan Zoram mipui te hian thlaphanga kan awm a tam em em mai a, Aizawl khawpui ngei-ah ‘hel’ an tlangnel thu kan hria a. Edenthar lamah hel an training tih thawm leh MLA Hostel-ah ‘hel’ an riak tih thawm te kha a ri a, chutih laiin Chief Minister ber lah inti Lal em emin a zing exercise la tur ringawt pawh vengtu motor nen a kal ka hmuh te khan MNF hian pianthar chu an mamawh a ni ka lo ti em em a. Pu Tlanga ṭawngkam ka hriat takah hian ka lawm em em a ni.

Hei chauh hi a ni lo a, MNF Party ten sorkarna an chan lai khan Pu Tlanga ngei pawh ziak loh dan lamah a lo kal thui deuh ngei a nih kha. Bajay Allianz vanga Pastor fapa tih awm loh deuh a tih thu a darh chiam bawk kha. Khangte avang kha a nih ngei ka ring a, hetia ‘pianthar’ thu a han sawi hi ka lawm em em a, a sawi tur awm ber niin ka hre bawk. Mawza manto leh Aii Puk lam chu sawi hman lohah in ngai ta ila, Court lamah Case kal mek niin ka hre bawk. Chief Minster Banglow chhuahsan chungchang kha sawi leh hram ka duh a. Pu Zoramthanga te chhungkua khan Banglow-a an awmlai kha chuan ‘ṭawngṭaina pindan’ te an nei a, ka rin dan chuan zing thawh hlimin urhsun takin Pathian biakna atan an hman ka ring nghe nghe a. Thingthlang leh hmun hrang hrang aṭanga amah dawr tur leh biak tum tan pawh ‘ṭawngṭaina pindan’ a luh kha chu a ngaihṭhat thlakin ram hruaitu tan chuan thil inhmeh tak ni bawka hriain lut rei deuh mahsela dawh thei taka lo nghah kha tumah khan an pawi tih ka ring lo.

Nimahsela, sorkar a lo inthlak a, Chief Minister Banglow chhuahsan a ngaih meuh kha chuan ‘ṭawngṭaina pindan’ a nitin lut ṭhin kha a zia a lo danglam ta tlat mai a, chanchin ngaihnawm lo tak mai kan hriat phah ta a nih kha! Kei ngei pawh hi kum 2004 aṭanga tun hun thleng hian vawi 4 lai ka inluahna ka sawn a, carpet te pawh ka khawk ve tho mai a, nimahsela khatiang em em kha chuan ka la chhuahsan ve lo a ni. Ni 15.9.2010 a amah leh a nupui hausakna zawng zawng belhkhawm chu Rs. 882,67,213/- niin an chhut sak bawk si a, ka beisei ang lo takin bungrua an hnutchhiah tlem ka ti a, mak ka ti hle a ni.

Nula hmelṭha tak mai, thuam mawi chikima thuam reng ṭhin, mi tinrengin an ngainat leh a kianga awm thlahlela mipaho an in zial tup tup reng ṭhin leh a ṭawngkam khat pawh an lawm em em a, vantirhkoh ang hiala an dah chungnun kha saruaka hnutchhiahin a mawilohna zawng zawng pawh hliahkhuhna pe hauh lo ang mai hian ka tehkhin hial a! Hetiang a nih avang hian MNF hian ‘pianthar’ hi an mamawh a tih loh theih loh a ni.

Keia lo sawi tur a awm lohzia chu ka hre reng a, nimahsela hetia MNF Vice President meuhin a sawi takah chuan Party pumpui aiawha a sawi ni turah ka ngai a, ka lawmzia hi ka thup reng nain ka thup thei ta ngang lo a, ka han puang chhuak ta mai a ni. Congress party tih lohah chuan Party lian ber an ni bawk a, hetia an lo danglam tak a, sual hawisanna thinlung an neih takah chuan (an hawisan tak tak pawh ka ring a) mipui duhdan an tih puitling ngei pawh beisei ila a ṭha ang.

Bible ziak anga an pianthar ngei pawh ka ring a, an President Pu Zoramthanga ṭawngkam pawh a danglam tawh ngei ring ila, ‘Vibrant Chakma Nation’ tih thuziak Banner intar chu a hunlaiin ka lo hmu reng reng lo. Lunglei kan thlenin Whatsapp aṭangin ka hre ve chauh a ni tih pawh hi ring ngam bawk ila, a hunlai khan a hmu lo a ni mai.

- Mahmuaka Chhakchhuak