National Technology Day
Kum 1998 May ni 11 khan Dr. APJ Abdul Kalam hruaina hnuaiah nuclear missile Shakti I chu Pokhran Test Range of Indian Army-ah enchhina hlawhtling taka neih niin ni hnih hnuah nuclear ralthuam pahnih dang hlawhtling taka enchhin leh a ni.
He hlawhtlinna leh hmasawnna ropui tak vang hian India chu nuclear state a puan a lo ni ta hial a ni. Heng bakah hian May ni 11, 1998 ah Defence Research and Development Organisation chuan Trishul missile test-fire top ber hlawhtling takin a lo kalpui bawk a ni. Hemi nia India-in science lama kan hmasawnna tam tak hriatreng nan kum tin May ni 11 hian National Technology Day hman ṭhin a lo ni ta a ni.
Ministry of Science and Technology hnuaiah kum tin National Technology Day hi huaihawt ṭhin a ni. Mimal leh pawl science leh a kaihhnawih thiamna lama thawk ṭhate hnenah National Technology Award sem ṭhin a ni.
May ni 11, 2017 khan National Technology Day vawi 19 na chu Vigyan Bhawan, New Delhi-ah hman a ni a, thupui-ah ‘Technology for Inclusive and Sustainable Growth’ tih niin hmasawnna huam zau leh tlo nei tura thiamna sang zawk hman ṭangkai a ṭulzia uar taka sawi rik leh tar lan a ni.
He ni-ah hian Prime Minister Narendra Modi a kaihhruaina hnuaiah France leh India-in technology lama inpui tawn turin thuthlung an siam nghe nghe a ni.
Mizoramah pawh National Technology Day hi May ni 11, 2017 khan I&PR Auditorium-ah hman a ni a, science tana thawk ṭha te mimal leh NGO lawmman hlannain a chhunzawm a ni. He hun hi NIELIT leh Women Polytechnic zirlai te leh midang science lam tui leh ngaipawimawhtu mi ṭhahnem takin an chhim a ni.
India hian science lamah nasa takin hmasawn tawh mahse ram dang nena tehkhin chuan hmabak kan la ngah hle a, ṭan lak ngaihna tur a la tam khawp mai. Kan hmalam huna harsatna leh buaina lo thleng tur te awlsam zawk leh thiam zawka kan lo hmachhawn theih nan science hi tun aia hlawk zawk leh hautak lo zawk a hman thiam lehzual kan inzir a ngai a ni.
- Lalruatngheta Kawlni