STAFF NURSE LAK CHUNG CHANGA KAN BUAINA HI CHINFEL HRAM NI SE AVA DUHAWM DAWN EM!

Dt. 14.06.2021 khan Joint Director(N) DH&ME Mizoram Aizawl chuan lehkha chhuahin, State Referral Hispital/ ZMC leh Dedicated Covid Health Centre, MINECO a thawk turin Staff Nurse lak a nih tur thu tarlan a ni. Hetah hian points-4 tarlan a ni a.

Tichuan, Mizoram sawr­kar chuan, contract basis a Staff Nurse 50 lak tur thu 21st September 2021 khan a tichhuak leh a. Mawh­phurhna la turin DP&AR (GSW) kutah a dah. He hna diltu hi 1201 awmin mi 50 lak an ni ta a ni.

Hetah hian ZMC a Volun­teer-a thawk 103 zingah mi-14 an la a, Penal list-ah mi 25 lai an awm bawk a ni. Hei tak hi lungawilohna rawn irh ṭanna bul chu ni tain a lang. A chhan ber nia lang chu, Covid volunteer-a thawktu lak a nih dawn kha, advertisement-ah khan points-4 an ziak tel a. Point 3na:- "Govt of Mizoram hnuaia hna an zawn hunah ngaih pawimawh an ni ang," tih kha a tel si a. Sawrkar khan beiseina tlem a lo siamsak ve a tin a ni. ZMC aṭanga 103 aṭangin 14 lak an ni a, Penal list-ah 25 an awm hi sawrkar hian a thutiamah dingin a ngai pawimawh thawkhat viau alawm le tih leh a ngai pawimawh tawk lo deuh tihah hian controvertial thei tak tur niin a lang bawk a ni.

Staff Nurse lak chung changa lungawi lohoten an karna point ber chu, 3na - Covid enkawl tura lakte hi Appreciation Certificate pek an ni ang. Govt of Mizoram hnuaia hna an zawn hunah ngaih pawimawh an ni ang, tih lai tak khi an ṭanchhan ni ta berin a lang.

ZMC bikah hian Volun­teers 103 an awm nia hriat a ni. Volunteers a thawk nimah sela sawrkarin Rs 22,000/- honorarium a pe tho a ni. Hmundanga thawkte hi engzat chiah nge an nih hriat a ni lova. Mahse, diltu 1201 lai an tlin dan aṭang hian an tam thawkhat hle dawn a ni tih hi thil chiangsa a ni.

Lehlamah chuan, Volun­teer a thawk tur hi chuan training chhuak thar deuh an ni tlangpui a. Senior-ho hi chu pasal fanau (nausen) te nena lo khawsa tawh te an nih hlawm avangin, ZMC a Volunteer a thawh chu duh hle hlawm mahse, rem lohna chinte an tan a lo awm ve tawh a. Mahse, ZMC kher loah pawh lo thawk ve mekte leh nausen pawm avanga in volunteer ve thei lova, contract a hna an hawn huna dil tum ve tam tak an lo awm ve bawk a ni.

Chungho chu a tlangpui thuin dil ve lo ta sela, senior lamte an lo ni tawh a, an kum te a over ve thuai mai dawn si a, an dil ve chu a ngai ta si a ni. Chuvangin, tuna lungawi lo lam chan hi an mawh loh em em rualin Seat-50 ah diltu 1201 an awm ta si a. ZMC aṭangin diltu 103 awmin seat 14 an chang a, a bak mi 1098-in seat 36 an inchuh ve ta a ni. A awm lo lutuk lem lo niin a lang.

Tin, lungawi lo lam hian, interview a tel lo mi 3 hming lang anga sawi a ni a. Hetiang serius case-ah chuan an hming leh address pawh hi an hriat chian chuan sawi lang tlang mai se ṭha tur.

Sawrkar lam lah chuan an tihsual an hriat chhun, Sl no 32 Lalhruaizeli Pachuau tih turah Sl no 29 Vanlalhruaizeli Sailo chu kan tihsual a ni e tiin corrigendum an rawn siam leh nghal a. Midang-2 te erawh an hre chhuak thei lo nge? Hriat chhuah tur an awm tawh lo hrim hrim zawk hriat a ni tawh si lo.

Tin, Party ang zawnga lak ni se, Congress Mahila President fanu te leh ZPM bruaitu fanu te hi an tel a rinawm bawk si lo.

Minister-hoin an bial tan an chuhhelh deuh a ni ti dawn ila, CM bial 3, HM bial 2, a changtu ber Dr Thangte bialah Nil a nih laiin; ZPM Dr Mathlana Bial 6, ZPM Lalsawivunga bial 6, ZPM Vanlalhlana bial 5 etc a ni lawi bawk si. A, hriatthiam a har a ni ber e.

MNF Party angin Staff Nurse hi lak ni ta se, Health & Family Welfare Deptt changtu Minister bial hi chu an NIL a rinawm bawk si lo. Chubakah rulling MLA Bial 5 te hi an NIL vek chu a rinawm lo bawk.

Chuvangin, opposition tena Party beih nan taka an lo hman vak pawh hi a ni em em dawn emaw ni le? tih zawhna hi rilruah a lang lo thei lo a ni.

Chuvangin, tuna Staff Nurse lak chung changah hi chuan sawrkar kan tih Rulling MNF Party hi an inrawlh lo lutuk zawk a. An aiawha mawhphurtua an dah DP & AR (GSW) hi an ring tawk a, dik taka la turin an kutah mawhphurhna hi an dah tawp a ni zawk mai lo maw?

Amaherawhchu, mawh­phurtu tura an ruatte lam zawk hi mihring ve mai an nih avang hian an hna an sincere tawk lo deuh nge ni ang a, an lo tihsual palh liau liau zawk nge? Thil dik lo lo awm hlek erawh hi chu a pawi em em a, sawrkar mualphona tak pawh a ni.

A nih leh interview hi neih ṭhat leh ni ta ngat sela, tuna tlingho tam tak hi tling leh lo tur tam tak an awm ngei dawn a, an staff nurse puite rilru ava dam leh har dawn si em.

Chuvangin, eng pawh nise, ZMC a volunteer-te August leh September hlawh lak theih rih loh avanga an rilru natna erawh hi chu Sawr­kar hian a rang lamin ngaih­tuah­sak hram sela, inremna kawng hi dappui hram se a va duhawm dawn tak em.

Tin, staff nurse contract a lak leh hunah pawh, tuna ZMC a Volunteer-te hi sawr­kar hian hre reng hram se a duhawm hle dawn a ni tiin kei mimawl hian duhthu ka lo sam ve a ni e.

- CL Hranga